عالم البنات النسائي كل ما يخص المرأة العربية من ازياء وجمال والحياة الزوجية والمطبخ
ازيكم يا احلى فراشات
النهاردة ان شاء الله حنعمل فلافل بيتي جنان اتمنى تجربوها
المقــاديـــــــــر
ا كيلو فول بصارة (مدشوش)
2 بصلة
راس توم
حزمة كسبرة خضراء
حزمة كرات
قرن فلفل اخضر
(لو ما فيش كرات ممكن تستبدليه بحزمة بصل اخضر وتشيلي بصلة عادية من فوق )
المهم ماتكتريش الخضرة عشان الفلافل ماتفرولش منك وقت القلي
انا هنا استخدمت نص المكونات اللي قلت عليها
للتتــــــــــــــــــــــبيل
كسبرة ناشفة حصى
كسبرة ناشفة ناعمة
شطة
كمون
ملح
وفلفل اسود لوحابة
الطـــــــــــريقة
في البداية انقعي الفول من بالليل في مية كافية وطبعا بعد غسيله كويس ولو تحبي تحطي معاه شوية حمص مافيش مانع
اغسلي الخضرة كويس وقطعيها وقشري التوم والبصل وقطعيه
في الكبة حطي كمية من الفول والخضرة والبصل وافرميهم ولما يتفرمو حطي كمية غيرهم لحد ما يخلص المقدار اللي عندك
بعد ما تخلصيهم ارجعي افرميهم مرة كمان عشان تكون ناعمة
وحطي عليها التتبيلة
اعجنيهم وقسميهم على اكياس وشيليهم في الفريزير
وقـــــت القلـــــية
بتاخدي كمية من الفلافل وتضيفي عليها ربع ملعقة بيكربوناتو وشوية سمسم
ولو تحبي تضيفي بيضة اوكيه
جربي تقلي واحدة لو فرولت ممكن تزودي عليها شوية دقيق او نشا
الاختراع ده لاقيته في كارفور بيستخدم لقلية الفلافل عشان تتطلع كلها بنفس الحجم
لوتحبي تحشيها بسطرمة او جبنة كيري اوحشوة من البصل والتوم والفلفل الحامي وبهارات
برضه ممكن
وتقليها
ودي المحشية كيري
وبالهنا والشفا
