طريقة حمل بعد طول انتظار

حبيباتي وخواتي آنا أدري ان حلم كل وحده ان يكون عندها عيال يملون عليها البيت ويحسسونها بعاطفة الأمومة آنا مثلكم مريت بنفس هالمعاناة وتعبت نفسيا الين الله رزقني الحمدلله خل أقولكم قصتي

من أول ما تزوجت وآنا أفكر بالحمل كل شهر أحسب أيام التبويض وأنام على ظهري وأرفع رجولي وأنطر كل شهر وبموعد الدورة اذا صار الليل ومانزلت على طول اسوي تحليل منزلي ويطلع خط واحد وكل شهر على هالحالة كل يوم أبجي وأقول متى أحمل أبي يكون عندي عيال حتى وآنا مسافره أحسب وأعد الأيام رحت بعد فترة من زواجي تقريبا 8 شهور لدكتورة عاليه الفضلي وسويت تحاليل وفحوصات لي ولزوجي كلنا سليمين والتحاليل تمام بس كان عندي هرمون الحليب مرتفع تدرون ليش يرتفع من كل التفكير بالعيال بس والله هالتفكير لعب فيني لعب عطتني حبوب وبعد اسبوعين سويت تحليل ثاني نزل الهرمون وصار طبيعي عطتني ابر تفجير وابر تبويض انتفخت وزدت عشر كيلوات من الابر بعدها تعبت الصراحه وحسيت بكل مراجعه تبي اطلع فيني عله وانا الحمدلله مافيني شي طنشتها ووكلت أمري لله وبعد فترة دخل علينا رمضان وكنت كل يوم أدعي وأصلي بالثلث الأخير أدعي بالفطور أدعي بكل سجده أدعي وبعد اسبوعين من رمضان نزلت علي الدورة تدرون شصار فيني انهررررررررت بجيت بجيت بجيت لين طلعت عيوني واستغفر الله الشبطان بدا يوسوسني ان الله ما استجاب دعائي بعدها قررت نهائيا اني ما أفكر بالعيال والله قلت لنفسي حملت والا مو لازم تعبت من التفكير وطنشت روحات وطلعات والله ما تتصورون اني من قطعت التفكير وآنا مرتاحه بس كنت أسوي شغله نزلت بتلقوني سورة البقرة للسديس وصرت أحطها بالسماعات قبل لا أنام واسمعها وما أحس نفسي إلا وآنا نايمه بسابع نومه حسيت براحه مو طبيعية دخلت علينا العشر الأواخر وكنت أصلي وادعي بكل خشوع لدرجه أحس برجفه مو طبيعية أحس اني قريبه من الله حييييييل وخلص رمضان وبأول يوم من أيام العيد رحت أصلي وقاعده بروحي بالمصلى ألتفت يميني ألاقي وحده معاها بنتها مكشختها للعيد وعلى يساري وحده مكشخه ولدها ورفعت ايدي ودعيت قلت يااااااااااااااااارب لا تحرمني ان العيد الجاي يكون عندي بنت والا ولد اكشخهم بالعيد ومشت الايام وخلص العيد وصار موعد الدورة مانزلت قلت مو لازم نزلت والا مانزلت ماهمني قمت سحبت القنفات ورتبت البيت ولما خلصت حسيت بتعب بظهري أول مره أحس فيه دقيت على زوجي وجاب لي تحليل ودخلت الحمام طلع الخط الأول وقلبي يرقع نطرت الخط الثاني ماطلع قطيت التحليل وطلعت وزوجي ينطر بره قالي بشري قلت له ما كو شي قال لي مايمديج دخل وراي الحمام وانا رحت غرفتي مضايقة والا أسمعه يناديني الا الخط الثاني طلع ما أقدر أوصف شعوري يومها ما كنت مستوعبه رحنا ركض على مستشفى الشفا أسوي تحيل وال20 دقيقه كانت جنها 20 ساعه ولما طلع الريال اللي كان على الرسبشن معاه الوقه قالي مبروك possitive يعني حمل والله من الفرحه مسكت ايده وزوجي من الفرحه ما استوعب انا شنو سويت والحمدلله ودلدت وجبت بنت وبعدها ب5 شهور حملت وجبت بنت ثانية وهذا انا ألحين أتحسر على الأيام اللي كنت فيها بروحي انام على كيفي واسهر على كيفي انا معاكم بدونهم حياتنا مالها طعم بس والله آنا قاعده أكتب وحدهم مطفريني ومنرفزيني كسروا علي مواعين رمضان ،،،

واتمنى منكم ياحبيباتي تستغلون الشهر الفضيل بالدعاء وتحطون سورة البقره جايز تكون نفس وحده فيكم العين حق اقلها راح تحسون براحه نفسيه ويااااارب الله يرزقكم بدرزن يهال يعفسونكم ويكسرون كل شي بالبيت وتقولون ياحليلنا قبل كنا مرتاحين

وآسفه طولت عليكم بس حبيت أفيدكم ،،،

منقووووووووووووووووول