طريقة جديدة وشيك وسريعة لعمل صنف حلو

السلام عليكم عندي طريقة جميلة وسهلة وشيك في نفس الوقت
وكمان ممكن تكون مكوناتها عندك او تعمليها او تشتري المكونات جاهزة وتحضريها في ثواني
الطبق ده الصراحة معرفش اسمه بس انا اكلته في محل حلويات اسمه الي فرانس ومن يومها عجبني اوي وبقيت اعمله في البيت
ولما بيبقى عندي ضيوف واقدمه شكله حلو
نبدأ بسم الله
اولا اعملي كيكة شوكولاتة عادية بس تكون في صينية مدورة وكمان ساعات اعملها من بيتي كويكر ( كيكة بودرة جاهزة اخلطها مع ماء وزيت وبيض بتطلع حلوة وهشة وطرية ) ولما تبرد اقطعها مثلثات زي التورتة.
ثانيا اعملي ايس كريم شكولاتة وممكن تشتريه جاهز من باسكن روبنز مثلا او الايس كريم البودر وتخلطيه بالمضرب مع الحليب وبعدين تحطيه بالفريزر .
ثالثا : في صوص شكولاتة بيتباع جاهز او ممكن تعمليه تجيبي كسرولة وتحطي فيها مكعب زبدة ونص كوب سكر و2 ملعقة كبيرة كاكاو غير محلى واحلى نوع هو كادبوري وملعقتين ماءأو حليب وتقلبيهم على نار هادئة لحد ما تطبخ الشكولاتة وتسبيها تبرد خالص
التقديم
تجيبي طبق لفرد صغير وشيك تحطي مثلث الكيك وجنبه بولة ايس كريم الشكولاتة وفي الجنب التاني تجيبي موزة كاملة تقشريها وتحطيها في الطبق وتقطعيها ترانشات وفي النص ممكن تحطي ترانشتين كيوي وفراولةوبعدين رشي عليهم كلهم صوص الشكولاتة رايح جاي تخيلي الوان الطبق روووووووووووعة ده غير ان طعمه خطيييييييييييييروبالهنا والشفا