طائر الاشجان للشاعر سعد الشعلاني

أبي منهو عطاك الحق تحرمني من النسيان
وانا من عادتي لامن نويت انسى قدرت انسى
اثر بعض الغلا لازاد عن حدة يصير ادمان
مثل ماعمى غلا صخر وفراقه اخته الخنسى
انا ماودي افارق عيونـك وارجع خسران
وانا مالي بعد مارسى عيونك يالغلامرسى
علامك كل ماقربت لك خطوة تروح اوطان
علامك كل مالينت لك راسي تصير اقسى
علامك كل ماغنيت لك ياطائر الاشجان
تطير ولاتوقع لك على غصن ولاترسى
صباح الطيب ياحلى طيب شفته في شكل انسان
صباح الملح ياملح الوجيه الناعمة الملسى
احبك كثر ماحب العرب زايد بن نهيان
كثر مامر هالقلب بليالي مظلمة وشرسى
احبك كثر ماعاشوا يتامى من كرم سلطان
احبك من هنا لـ الصين لـ اليابان لـ النمسى
معك بالذات كن الله حرمني نعمة النسيان
اقول اني قدرت انسى وانا مالي امل انسى!!!!