عالم البنات النسائي كل ما يخص المرأة العربية من ازياء وجمال والحياة الزوجية والمطبخ
مرحبا
شلونكم
انال اليوم جلية افضفض لكم وابي طريقة اسوي فيها كنترول على قراراتي
أنا الحمدلله ومن دومن غرور بنت جميلة وناجحة في حياتى العلمية والعملية
اما اجتماعيا فمو ذالك الزود
تقدموا ليي ناس وايد وايد وااااااااااااااااااااااااااااايد
بس ما انخطبت
خله اعور راسكم واقول لكم قصتى الطويلة الي الى اللحين ما انتهت
انا عندى اخت اكبر منى بخمس سنين انخطبت( بالكلام )الى واحد من اهلنا ثلاث سنين وشي
بعدها ملجت وطول هذى الفترة امي وايد كانت تحاتيها وخايفة انه يضيع عمرها على الفاضى و
وخصوصا انه ام الصبي مسويه هالدقة من زمان(خطبت وحدة الى حماها حجزتها وبعدين اهو راح اتزوج والبنية اللى اللحين ما تزوجت)
المهم , اهى كانت وايد تشكى لى وتفرغ واختى كان بعد يجيها خطاب بس اذا جاها احد ما احد يدري في البيت(سري للغاية)
فى هالفترة انا بعد كان يجينى خطاب واول مرة كان من صوب مرت خالى (اولا قامت تستهزء وتسألنى قدام الكل الكل )
انا استحيت وقلت لها لا وفى نفس الوقت انقهرت, قالت لها اهى ماتبي تبى تكمل دراستها اول(لانى شاطرة)فاخذتها حجة
وطول هالفترة كل مايجبنى واحد تصير فى البيت حالة استنفار غير انه ما يتم احد مايعرف فيى البيت وامي ما كانت تبي الصغيرة تتزوج قيل الكبيرة.
ولما جات اختى بتملج امى ما قالت ليي مع انها كانت تشكى ليي و عرفنا من البدء في الاستعدادت.
والله ما انسى انه بعد ما ملجت اختى باسبوع اتصلوا ناس يخطبونها وتتكلم بالتليفون بهمس .
ملجت اختى وخلصت انا دراسة, خطبنى ولد عمى وانا رفضته لانى ما ابيه(وأهلي مايدرون)
وعدت السالفة على خير, بعدها خطبنى ولد عمتى وهذا بعد ما ابيه (علاقتنا ببيت جدى وعماتى واعمامى سيئة لانهم مستضعفينا وابوى ضعيف الشخصية)
, يعنى يحسون انه نحن جزء من املاكهم.
عاد هالمرة ما عدت السالفة عمتى انجرحت كرامتها شلون انا ارفض ولدها
قام التشيش في ابوي وهذا امر سهل جدا عندهم
وصار من يتقدم ليي واحد يرفضه
مرة مرتين والتالى , امى ما سكتت له وكان اللى خاطبنى ولد اخت رفيج اخوي كان اكبر منى ب8 سنوات جا وسوينا مقابلة ما كان فارس احلامى بس كان لاباس وفي نفس الفترة اخوي كان متقدم الى وحدة
عاد قام التخريب عمى يقول الى ابوي والله اذا تشوفه كبير ومو عاجبك ارفضه وقلب علينا البيت فوق تحت
البيت صار مذبحة انا تعفست نفسيتي وما حبيت اواصل خفت اخذ قرار واندم عليه وماحبيت اوتر الوضع ازيد
واخوى طلع انه نتايج الفحص مو اوكي .
واخوي هذا كان دايم يتكلم وياي في هالسوالف .
وكل مرة يسوي نفس السالفة وانا يصير ليي مثل الشى.
وبعد بقول لكم شي اذا تقدم ليي احد ابوي يقول انا بسال عنه ولا يسال بعدين يقول هذا مو زين
وعقبها امي تقول الى اخوي الكبير (الوحيد االلي ممكن الواحد بعتمد عليه) وهذا بعد ياخذ له 3 اسابيع
يسال وطول هالفترة والوضع متوتر في البيت ما اقدر اتحمل .
لا وابوي يقول اذا جاووا الناس انا ما جاي البيت نقوم ونقول الى جدي واذا جا جدي يجي هو ,
ومرات وايد يقولوا ليي جايي واحد ويسالوا وينهوا السالفة منهم ومن نفسهم.
لا واحسهم يحاولوا ينتزعوا منى كلمة لا , يعني في البداية يقولوا ليي جاي واحد كذا نسال عنه اقول اي
وانا اصلا كل مرة اقول لهم اذا احد يجيني اسلوا عنه من غير ما تسالونى ولا حياة لمن تنادى ويعد ما يسالوا
يقولوا ليي هو زين بس فلان الفلاني من عايلته موزين
وعلى فكرة ابوي بس فى الفترة اللى احد متقدم ليي يكون فك مفترس والله اذا اخوي يخطب ما يكون اوكي بس مومثل اذا انا.
المهم الله يسر الى اخوي وخطب. خطب وحدة ثلج برود فضيع وبعدها والله العظيم شهرين الا شي على مايفتكر يسال.
احس الموضوع صار شي سخيف في البيت وفى نظرهم انه وضعى احسن من وضعهم بواايد لانى اشتغل و معاشي اوكي.
(هذا طبعا كلام اختىاللى اكبر منى, لانه هى توها متخرجة ولسى ما حصلت شغل)
مشكلتى انى اتوتر في هذا الجو المتوتر وما اقدر اخذ قرار فالاسلم انى ارفض, وانا اساسا صعبة يعنى صعب اقتنع في اي شخص ومانى عارفة شسوي بعمرى
وسامحونى على الاطالة بس والله الواحد اذا يشكى همها ولا الى ياجر يخلص
