سيدنا ابراهيم عليه السلام+جروح في جسمي .. ارجو التفسير يا وردة الاشراف

اود ان اشكرك يا وردة على ما تبذلينه في هذا القسم .. و جعله الله في ميزان حسناتك

انا عندي حلمين اتمنى بشدددة انك تفسيرها ليا .. و لك كل الشكر مقدما

الحلم الاول …
وقت حدوث الحلم : في الظهر
الحالة الدينية : عاديه
الحالة الاجتماعية : عازبه
المهنة : متخرجه و قاعده في البيت
حالتك وقت النوم : عاديه (( ولكن الفتره اللي حلمت فيها كنت افكر كثير في مستقبلي يعني الوظيفة و الزواج … الخ ))

الحلم هو .. اني كنت في غرفتي و كنت ابغى اسوي شي معين (( هي تعتبر معصية )) وكل ما كنت انوي اسويها احد يدخل عليا من اهلي و طبعا ما اقدر اسويها .
و بعدين فجاءة لقيت انو سار معايا رساله ( ورقة بيضا و الكتابة بالاحمر ) وانو الرساله دي من سيدنا ابراهيم عليه السلام .. انا مو فاكره بالزبط ايش كان مكتوب في الرساله .. لكن الرساله كانت موجهه لماما بس انا اللي اخدتها .. المهم مضمون الرساله انو يبغى ماما تروح اماكن معينه تدعو فيها و كان فيها رسمه كأنها خريطة العالم (( لكن ما كانت نفس شكل خريطة العالم دحين بالزبط .. تشبهلها )) و مقسم العالم لثالث مناطق أ و ب و ج .. وكل منطقة فيها كلام بس انا مو فاكرها .. و في كلام تاني و ايات من القران بس ماني فاكره
انا اللي كنت ماسكه الرساله و انا اللي كنت بأقراها و وكان معايا اهلي و ماما كمان وبس ..

الحلم الثاني ..
وقت حدوث الحلم : في الصبح تقريبا الساعه 9
الحالة الدينية : عاديه
الحالة الاجتماعية : عازبه
المهنة : متخرجه و قاعده في البيت
حالتك وقت النوم : انا وقتها كنت شاكه انو فيا عين فكنت اسمع شريط لرقية شرعية و بعدها على طول نمت و حلمت .

الحلم .. انو رحت انا و كل اهلي لمكان زي البر بس كان مقسم يعني كل عيله ليها قسم (( يشبه المخيم )) المهم .. كلنا كنا نبغى ننام و عشان المكان ما يكفي قام خرج اخويا و زوج عمتي ينامو برا ( خارج القسم حقنا ) و انا كنت مره خايفه على اخويا لانو برا كان في ناس مره كتير و جِمال .. المهم ما قدرت انام و قعدت اراقب اخويا من بعدين و شفت كلب فخفت عليه و هو نام فقعدت اقرأ آية الكرسي لين مشي الكلب و ما قرب جنبنا و لا جنب اخويا و زوج عمتي .. و بعدها كنا كلنا جالسين (( في نفس المكان )) و فجاءة سار يدخل عليا ولد صغير عمره تقريبا 5 سنوات و راكب دراجه و يمشي من وسطنا رايح و جاي و الكل متضايق منو .. في الاخير قامت عمتي (( مو زوجها اللي كان نايم برا )) لما عدى من جنبها مسكت عجلة الدراجة قام الولد طاح من فوقها و قعد يبكي و طاحت من الدراجة قطعة قامت مسكتها عمتي .. حاول الولد ياخذها منها و هيا مو راضيه تعطيه هيا وقعد يشد منها القطعة و هيا ماسكها و ما قدر ياخدها منها .. انا حزنت عالولد و جيتو وسألتو انت تقدر تركب الدراجة و تمشي بيها من غير دي القطعة ؟؟ قالي : ايوا .. قلت له طيب خلاص اركبها من غيرها لكن الولد كان مصر عليها في الوقت دا عمتي كانت زعلانه و متضايقه ليش اقول للولد كدا (( يعني ليش ابين له انو ممكن يركب من غير القطعة )) … لما جيت مره تانيه ابغى افهم الولد ( لاني حزنت عليه و في نفس الوقت ما اقدر اخذ القطعة من عمتي و اعطيها ليه ) قمت حسيت بألم في فظيييييع من جروح موجوده في جسمي (( في الحقيقة غير موجوده )) الجروح كانت في اااااخر ظهري ناحية اليمين وكانت جروح صغيره كأنها بالمشرط وكانت 3 او 4 صفوف و في كل صف 4 جروح تقريبا و كل جرح منها مخيط و معقود بعقده .. المهم انا حسيت بألم قووووي جدا في الجرح الاخير (( كأنو باقي الجروح خلاص انا اتألمت فيها قبل كدا و خلاص نشفت .. بس باقي دا الجرح الأخير )) و كان في واحد رجال (( ما اعرفو و ما شفت وجهه بس شفت يده ولا قدرت اعرف مين هوا )) هو اللي يتحكم في الجرح دا يعني هو المسؤول عن الألم اللي حاسه فيه .. تعرفي كيف لما الواحد يبغى يشد الاوتار حقت آلة العود مو في شي يقعد يلف فيه عشان ينشد الوتر بالزبط زي كدا قاعد يلف فيه يقوم ينشد الخيط حق الجرح و انا اتألم كانت امي جنبي .. حطيت يدي على فخدها وسرت اضغط عليه .. و انا بأحاول اتحمل لأني عارفه انو بعدها خلاص راح ينشف الجرح و ما راح اتألم بعدها بس الألم كان اقوى من كل مره (( انا في الحلم بأقول لنفسي كدا )) و امي زعلانه مره عشاني و حزينه و مو قادره تعملي شي بس كانت ماسكه يدي و تسمي عليا و تقولي خلاص خلاص دي اخر مره .. بس انا ماقدرت اتحمل و صرخت صرخة قويه وقمت بعدها من النوم قلبي بيرجف من كثر الخوف و كنت حاسة بألم و رعب فظيييع .

يا ريييييييييييت يا وردة تفسرلي الحلمين بسرعه .. لانو من اول انا مستنية انو القسم يفتح عشان اقدر اقولك عليهم