سبب حملي بعد فضل الله تعالووووو

طبعا الأمومه وربي حلم حياتي من صغري 😎

وكنت دايما امسك عرايسي واقول لأمي بوسي بنتي خخخخخ

ويوم تزوجت اول شيء صرت انتظره هو خبر حملي

لدرجه اني بعد ليله الدخله بيوم اتصلت على صديقتي وسألتها ممكن يكون صاير حمل هههههههه

رغم انه كان متبقي ايام ع الدوره وتجي

بعدين صرت ارغب بشده في النوم وطول الوقت انعس قدام الناس

صارت اخته تقول لي تتوحمي مبرووووك

صار عندي قناعه اني حامل لين شرفت الدوره وجاني انا وزوجي احباط لأنه هو كمان كان متوقع اني حامل

بعدها بدأت بحوسه حساب موعد التبويض ولازم اليوم الفلاني ينام معايا ولازم ما اقوم من السرير >>> إلخ النصايح المعروفه

وطول الوقت افكر حملت ولا لا

لين تشرف لي الدوره واصير انطنط من القهر ههههههههه

صارلي على هالحال اربع اشهر وصار لي اكتئاب واكتب مواضيع بمنتديات الحمل ليه ماحملت ليه ماحملت

نسيت شغله وحده واللي ذكرتني فيها اخت زوجي الكبيره الله يسعدها

قالت لي الله ما اراد

الكلمه هذه استوقفتني

الله ما اراد

نسيت ان الله هو اللي يهب لمن يشاء اناث ويهب لمن يشاء الذكور او يزوجهم ذكرانا واناثا ويجعل من يشاء عقيما

حزنت اني اخر شيء فكرت فيه هو اللي اهم شيء والأساس

نسيت ان الله هو اللي راح يوهبني الحمل ان شاء الله

بعدها بطلت احسب مواعيد تبويض صرت بس اقول لو الله اراد لي راح احمل

بطلت اسجن نفسي بالسرير بعد الجماع ساعتين صرت اقول ان الله اراد لي الحمل راح احمل

صحيح كنت اخذ بالأسباب وادور منشطات لأني ظنيت ان عندي ضعف في التبويض

ليله الختمه زوجي قال لي روحي سوي عمره لو تبغي هو ماراح انشغل

قلت فرصه ادعي الله من كل قلب متضرع انه يوهبني الحمل وانه ما يأخر حملي

نويت العمره بنيه التقرب إلى الله وبنيه الدعاء المستجاب ان شاء الله

وانا بطوف استغفرت الله الف مره وكل مره اشوف المزراب ادعي يارب لا تأخر حملي

وانا في السعي استغفرت الله الف مره ثانيه وصرت ادعي بعدها يارب لا تأخر حملي يارب احمل هالشهر

وفي داخلي يقين تام ان الله لن يخذلني وراح يستجيب دعائي

ما ادري متى صار الحمل في اي يوم اللي اذكره الشهر هذا نام معايا مرتين فقط ويومين متتاليين وما ادري هل كان يوم تبويض اولا

سبحان الله تأخرت الدوره ساعات بس ما ادري ايش خلاني اشتري الإختبار لمن مريت من عند الصيدليه

وربي شريته بس عندي فضول اني اعرف شكله واحسس نفسي بالأمل

سبحان الله اخر شيء توقعته هو انه يطلع خطين

بإختصار اللجوء لله بكل قلب متيقن بالإجابه هو سبب حملي

كثره الإستغفار

وربي ما اخذت علاجات اللهم اني جبت من امي مرميه قلت استعملها مع بدايه الدوره

ماجااااات الدوره

يالله كلكم ادخلوا واستفيدوا واعرفوا ان الله هو اللي يوهب ولا دكتور ولاعلاج بالدنيا راح ينفع ان الله ما كان رايدلنا الحمل

اخيرا وليس اخرا

لا يرد القدر إلا الدعاء

لو قدر اي وحده فينا العقم الله يرده بالدعاااااااااااااء

والقدر من الأزل مكتوب لكن الله يرده بالدعااااء والإستغفار

ادعولي الله يثبت حملي ويوهبني طفل او طفله صاااالحه يدعو لي من بعدي