زوجي وحبيبتة الجديدة

اسفة دخلت عرض بسـ من حرقة قلبي تخيلوا طلقني وطردني من بيتي الفجر وعارفين ليه؟؟

البدايه من غرق جدة راح زوجي اتطوع وصاروا قروب واحد بنات وشباب من فترة بسـ لسانو معلق بسيرة وحدة معاهم يذكرها اكثر مايذكر عيالة وانا واكتشفت بعد اسبوع انة في النهار تطوع وبالليل ارقى المقاهي والمطاعم معاها يرجع متأخر وربي وبيتة فاضي اللقمة ماعندي وهوا شبعان وعلبة البيبسي بيدة ولا كان يهمة

زوجي يحب الفلوس اكثر من نفسة وعيونة وهيا ماقصرت معاه ,, على فكره هيا صاحبة مصانع ومحلات كبيرة

حاولت اضغط على نفسي واتكلم معاه واجلس اوهم نفسي انها بسـ فترة وييخلص التطوع الين اتفاجأت برسايل حب وغزل بجوالة منه ومنها

اتكلمت معاه قلي انتي مجنونة وكلم امي قالها بنتك تعبانة نفسياً وخليها عندك ترتاح ,, انا رفضت المبدأ هذا اني اروح واترك له المجال

الين يوم انفجرت وحسيت اني انشليت ,, جات امي وزوجها البيت واتكلموا معايا وامي قالت اعتبريها نزوة وهوا جا يكلمني ويقولي انا احبك بس وربي ماعاد اكلمها سكت وماعاد قلت شي غصباً عني مو قادرة اجامله كنت اشوفة واسكت لا بعتاب ولا بحب

في نفس اليوم الى حلفلي رجع البيت من العمل وفتحت جوالة لقيتو مرسلها (( انا داخل بيت الأشباح)) والتانية (( والله انا عايش على حسك ياقمورتي )) انعميت وسكت

خرجت للسوق عشان كانت شبكة اختي تاني يوم واتصل عليه من الساعة 11 المساء الين 3 مشغول اول شي كان في خدمة انتظار وغير الخدمة عشان اشوفة مشغول

رجعت بيتي من بيت اهلي بعد ماارسلت رسالة واول ماوصلت البيت استنيت الاولاد يرجعوا يناموا واتكلم معاه وسالتة ليش مشغول ؟؟ قالي حر وانا بكيفي مالك صلاح فيا اكلمها وانا ماقدرت حتى اسكت من الصراخ انفجرت خلاص قلتلة هذي جزاتي بعد ماصبرت على فقرك وهمك؟؟ جلس يتريق علي تاتأتي بالكلام لاني كنت منهارة
وسألتة ليش حلفت لما جات امي انت مو رجال ولا قد كلمتك قالي انا رجال وانتي طالق واطلعي بره البيت وطردني الساعة 4 الفجر تخيلوا

اخذت بعضي ومشيت لكن حسبي الله ونعم الوكيل فية زي مااهانني وحرق قلبي
على فكرة كنت انا اكلم البنت هذي وعلى حسن نية وماكنت اعرف الى بتسوية فيا حسبي الله عليها

هيا مطلقه وعندها 4 شوفو الوقاحة اتصل على زوج امي اليوم وهوا مطلقني قبل يومين بسـ وقالة انا بروح المحكمة اجيب صك طلاقها وانا بتزوجها

اليوم شغالتي اتصلت عليا قالت لي جاب جوال بلاك بيري طبعا منها هدية وغير السيارة لها اكثر من شهر معاه استاجرتها له الاسبوع الواحد ورب المصحف بـ 7000 الاف لانها جمس 2010 وربي والي خلقني ماخرجت من بيتة ولا بخاتم ذهب كنت ابيع عشانو حتى جهازي الكمبيوتر وجوالي بعتة عشان يسدد فواتيرة زمان

ليش جحدني وليش نكرني ليش هنت علية بالسهولة دي عشان وسخ دنيا ياااااااارب ينتقم منه
على فكرة لااحد يقولي ساحرتة لان زوجي مسحور بفلوسها ممكن يبيع اولادة عشان الفلوس اعرفة اكثر من نفسي.

بس ابغى اسالكم ممكن يجيه يوم ويندم ويفتكرني ؟؟ ولا بينساني مع الفلوس وعروستة (( الله يحرق قلوبهم زي ماحرقوا قلبي )) انا عندي رقمها بس ماحبيت اهين نفسي واتصل عليها ولااارسلها رسالة.