عالم البنات النسائي كل ما يخص المرأة العربية من ازياء وجمال والحياة الزوجية والمطبخ
بداية حآبه اوضح لكم نقطه,, انا فراشه منتسبه لهذا المنتدى ولي مشاركات معكم,, وسجلت بهذا الاسم لاني ناويه اطرح مشكله تخصني في حياتي الزوجيه,, المشكله هذي جدا صعبه وقوويه,, وبحكم انه لي اخوات وزوجات اخوان منتسبات للمنتدى وبيعرفوني 
,, سجلت بأسم ثاني لاني حابه استر على زوجي اللي هوه السبب في الحيره والالم اللي انا واقعه فيه الحين…
انا حديثة عهد بالزواج تقريبا بقا لي شهر واكمل سنه,, بداية زواجي زوجي ماكنت بحس عليه اي شيء غريب بس كنت اعصب منه اذا نمت وصحيت لقيته قافل على نفسه باب المجلس,, كنت اتهاوش معاه وابكي ومرات اجيه بالطيب ,, ومافاد معه يرجع على نفس العاده
,, المهم انه قبل فتره كنا جالسين بالمجلس وهوه انسان مدخن,, مسكت بكت دخان وفتحته انصدمت 😥 لقيت جواته دخان غريب ملفوف بورق,, مو مثل الدخان العادي,, هوه انتبه لي وطالع فيني منصدم قمت انا قفلت البكت ورجعته مكانه وكأني ماانتبهت ولا لاحظت شي 😈 ,, بعدين قمت من عنده ورحت لغرفتي وهوه طلع من البيت بعد ماطلع رجعت اشوف البكت لقيته شال كل الدخان اللي كان جواته,,
طنشت وقلت لايلعب براسي الشيطان اعوذو بالله ومارح اتكلم وبستر عليه,, المهم انه بعدها حصلت بيني وبينه مشكله لقيته سرق مني مبلغ كبير من دون علمي,, وبعدها جلست زعلانه منه فتره ولا اكلمه وهوه زعلان مني ولا بيكلمني لاني صارحته,,, بعدها قمت احاول انه اكتشف ايش هذا الدخان ,, وهوه معه شنطه دائما قافلها,, سبحان الله قبل امس بالصدفه طلع مستعجل من البيت وانا كنت بغرفتي ,, بعدها طلعت من الغرفه ورحتت للمجلس وجلست عند الشنطه وفتحتها الا وتنفتح معايه,, ووللأسف لقيت جواتها الدخان وورق اسمه ورق الشام,, وحاجه سودا ملفوفه بورق تغليف,, واطالع الاقي كيس شفاف مو حق علاجات جواته 10 حبات صغار مرسوم عليها سهمين ,, انا انصدمت وبعدها اخذت رقم الشنطه وقلت رح افتح كل يوم بعد مايروح الدوام واشوف كم بقى من الحبوب اذا نقصت معناته بيستخدمها,, جيت اليوم الصباح وافتح لقيتها ناقصه 4 حبات,, والمغرب فتحتها لانه بعد مارجع من الدوام يقولي راسي بيوجعني ,, والاقي ناقص منها حبتين,, وانا سمعته في العصر قبل يطلع يفتح الشنطه لاني كنت بالصاله,, كلمت استشاري وقلت له على الدخان والحبوب قالي الدخان حشيش,,, 😉
انا في هم وكرب عظيم,,
زوجي مابيصلي كل الصلوات يعني مو محافظ عليها دائما,, من اول ماتزوجته وهوه مهمل فيها,, يحاول انه يصلي بس احس كأنه مو قادر شي بيمنعه,, الحين عرفت ايش اللي بيمنعه,, 
من داخلي بفكر انه اخلي كل شي وارجع لاهلي خاصة اني ماحملت الى الان,, وكنت كل شهر انتظر الحمل ومابيسير وكنت احاول انه احمل.. والحين عرفت انه حكمة الله انه مااحمل قبل لااعرف طبيعة زوجي,,
اول ايام الزواج طلعنا في يوم قبل المغرب ,, واذن واحنا برا بالسياره,, ووقفنا عند الاشاره لقينا عماله بيصلون على الرصيف بجنب محل ,, اول ماشافهم زوجي قال يابختهم يصلون,, 💡
والغريب انه يابنات اغلب الوقت مابينام الا وهوه مشغل قران ,, ويقولي يوم كنت عزابي كنت احب انام وانا مشغل اذاعة القران,, 😆 🙂
زوجي مو من النوع اللي بيميل للاغاني كثير ولا للبنات يشبكهم او يكلمهم,, بس مشكلته بيطالع بافلام جنسيه,, والصلاه مررره ثقيل عندها,,
قليل الاجتماع,, مابيحب يجتمع كثير غالبا بالبيت او مع اصحابه المعدودين وانا شاكه انهم كلهم يحششون وبياخذون من هالحبوب,,
للامانه الحبوب ماني عارفه ايش هيه,,
المهم انا كتبت موضوعي هنا لانه عارفه انه اغلب المتزوجات بيعانون مثل ماااعاني او ممكن اكثر او اقل
وسار ليه يومين بس افكر مرات اقول انا رح اصلي الاستخاره وادعي ربي انه اذا خير ليه ابقا معه وبقائي معه رح يغيره رح ابقا وبحاول انه اساعده ,, واذا بقائي معه شر لي وله انه يصرفني عنه ويصرفه عني وييسر لي الخير حيث كان,,
ومرات افكر اقول بصارحه,, انا عندي ربع حبه من حبوبه امس جينا طالعين كنت معزومه على عشا وطاحت من جيبه قبل يطلع شفتها مرميه على الارض جوات كيس يمديه يشوفها اذا رجع,, قلت مارح اشيلها اذا رجعت وقد شالها معناته مالي خيره فيها واذا لقيتها بشيلها واخذها وبستخير ربي اذا فيه خيره انه اواجهه رح اواجهه,, ورح اقوله انه انا بروح لبيت اهلي هذا الاسبوع اجلس عندهم لحد مايفكر اذا يبغا نستمر مع بعض ويجينا اولاد,, رح نأجل موضوع الحمل لبعد سنتين عشان في هذي الفتره اساعده انه يبعد عن هالاشياء,, واذا شايف انه مبسوط بالحبوب والحشيش ومرتاح معاها وحياته ماشيه ميه بالميه,, فننفصل وكل واحد يشوف حياته بعيد عن الثاني,,
بنات مين اللي زوجها كان كذا وانعدل حاله بعد ماساعدته,, او تركته وخيرته انه يفكر,,وجاب نتيجه معاها؟؟
انا نفسي اسمع او اقرا تجارب زوجات كانو ازواجهم مثل كذا وانصلح حالهم بعد ماصبرو عليهم وساعدوهم انه يبعدون عن هذا الطريق
وربي قلبي بيتقطع عليه مني قادره اواجهه اخاف اجرحهه او يفقد الثقه فيني,, وبنفس الوقت ماني قادره اخليه كذا وانا اشوفه يقتل نفسه ومستقبله ومستقبلي معه,,
يوم اتذكره وهوه يقولي ياحظهم يصلون يجيني امل انه نفسه يتغير,, وبعد اول الزواج كان بيقولي عن زوجه من جماعتهم غيرت زوجها للافضل وساعدته مع انه كان سيْ ويقول انه الكل يهنيه ويمدح في زوجته,,
وكان بيقولي نفسي ابعد عن الدخان,, الحين بس ياكل فصفص يقولي انه بيبعده شويه عن الدخان,, واذا جيت وشفت سجاير الحشيش ناقصه او مدخنها كلها حسيت اني في وهم وانا بس اتوهم انه يبغا يتغير….
انصحوني ,, وساعدوني ولاتقللون من عزيمتي في اني اساعده ,, انا استخرت قبل اتزوجه وان شاء الله انه خيرت الله لي وله طيبه,,
بس حابه اسمع تشجيع,, او مسانده ,, لانه مالي غيركم من بعد الله….
واللي حابه تغير من زوجها تجي هنا وتقولي ,,يمكن نقدر نساعد بعض ,, يمكن اذا فكرتي انه فيه وحده غيرك بتعاني مع زوجها وبتحاول انها تغير من حياتها معاه للافضل تحسين بالامل يكبر بداخلك ,,
الطلاق صعب جدا جدا,, ويوم افكر في المدمنين التائبين وغيرهم كثييير ,, احس انه فيه امل ,, وانه لازم نصبر عشان نرجع ازواجنا للطريق السليم,, بدعائنا لهم..
طولت عليكم ويمكن يصيبكم الملل,, لكن من كثر الاحباط اللي فيني ,, حسيت انه ودي اكتب واكتب واكتب عشان اطلع من اللي بخاطري شوي,, ومالي الا الله ثم انتم..
اتمنى الاقي ردود حلوه وفيها امل عشان اقدر اتعامل مع وضعي بشكل سليم…
لكم كل الموده والمحبه..
