زفة عروستين حضرت زواجهم قبل يومين<< استفيدوا

كل عروسة تتمنى تتميز بزفافها ولو بحاجة بسيطة ..

عشان كذا جبتلكم كم فكرة صح ان بعضها قديمة بس حلوة..

الزواج كان بقاعة الاندلس في جدة يوم الجمعة..

والعروستين كانوا حلوين..

العروسه الاولى قبل ما تنزف بشوي طلعوا 4 من عاملات القاعة شايلين كرتون كبير وحطوه عالكوشة

وبعد ما انزفت ووصلت للكرتون فتحته وطلع منه بالونات ومعلق فيها لوحة مكتوب عليها كلام بس ما كان واضح من بعيد

وتصورت وهيه ماسكة اللوحة وبعدين العاملات شالوا الكرتون وجابوا اربع نوافير من الالعاب النارية وثبتوها على شكل مربع والعروسة في النص وشغلوها طبعا النوافير زي نجوم الليل بس حجم أكبر وطلعت الحركة مرررررة حلوة..

وبعد ما طفوها طلعوا اربع عاملات لابسين سوري ويرقصون الدبكة ويلفوا حول العروسة ..

وبس هذا اللي عملته العروسة الاولى..

نجي للعروسة الثانية..

في بداية زفتها لما طلعت عالبلكونة كانت حاطة قناع فصوص على عينها بس كان بايخ شكله لانه عفش مرة..

وكانت اختها الصغيرة تمشي اول وحدة وشايله علبة كبيرة لونها ذهبي ووراها ثلاث عاملات لابسين فستان فضي قصير وشايلين نجوم ذهبية ويرقصوا رقص اطفال ووراهم عاملة لابسة مصري وتهز خصرها وتمسك يد العروسة وتزفها

وبعد ما وصلت لدرج الممر نزلت القناع وفتحت العلبة الذهبية وطلعت منها المسكة وزفوها العاملات لحد ما وصلت الكوشة

ولما خلصت زفتها جابوا كيكة اربع ادوار وقطعوها العروستين بس طلع شكلهم مرة كيوت لانهم الثنتين متزوجين اخوان

وبس هذا اللي عندي