رجل يصف جحد الحريم ههههههه

سيداتي آنساتي وسادتي مخدتي ووسادتي

أعزائي وأحبائي أعضاء وعضوات هذا المنتدى العطر الطيب

في الحقيقة والواقع والبحر ملئ بالقواقع

درسنا لهذا اليوم عن الجحادة عند الحريم

ومن خلال البحث والتجارب عن أسباب الجحادة عند الحريم وجدت الأسباب تتركز غالبيتها على سبب واحد ألا وهو الخوف من الحسد والعين

ومن أمثلة الجحادة عند الحريم يا جماعة الخير جحادة الحمل

تلقى الوحدة منهم إذا حملت بالشهور الأولى تجحد حملها عن صديقاتها وقريباتها ولو يحصل لها إنها تجحد عن أهل زوجها كان جحدت عليهم ما عندها مشكلة إذا كان الزوج يبي يطيعها ولا يعلم أمه إنها حامل ولا يكتشف الحمل إلا من الشهر السادس وما بعده طبعا بالشهر السادس يكبر بطنها وذيك الساعة يوضح كل شئ وبعض الحريم ما يوضح عليها الحمل حتى بالشهور الأخيرة إذا لبست لبست لبس وسيع ومع الأيام راح يوضح الحمل عليها بس الحريم يعرفون بعضهم مضبوط إذا صارت الوحدة فيهم حامل بس حنا يالرجال ما ندري عن الشئ هذا والسؤال اللي يطرح نفسه هنا

أنتي وش خايفة منه إذا قلتي إنك حامل خليك واثفة من نفسك واقرأي الورد ولا عليك من أحد

وإذا جاء خبرها عند صديقاتها إنها حامل عاد شوفوا ردة الفعل اللي تصير من قبل الصديقات تلقى الصديقة اللي القطت الخبر من أي وحدة من قريباتها تجي وتنشره بالمجلس عند الحريم وخاصة إذا كانت دورية بينهم سواء كانت اسبوعية ولا غيرها ومجلس الحريم ما يخلى طبعا من كل ما لذ وطاب مثل الخبز والكراث والمعجنات والحلى والفصفص والقهوة والشاهي

طبعا وهم بحالة أكل الخبز والكراث تجيك الصديقة هذي القطت الخبر من إحدى قريباتها وتقول لبقية الصديقات ما دريتوا عن الخبر هذا وبعدين يقولون لها الحريم الثانيات وش عندك يا فلانة من أخبار

الخبر طبعا دريتوا إن فلانة حامل وبعدين يردون عليها ويقولون وش يدريك إنها حامل ترد عليهم وتقول وحدة من قريباتها قالت لوحدة والوحدة هذي قالت لي إنها حامل

ويا جماعة الخير شوفوا أداة التعجب عند الحريم إذا جاهم خبر مثل كذا مجحود عنهم يبدون يطقون على صدروهم ويصفقون بايديهم ويقولون ( هوووووووووووووو) ويقولون بعدها

اهبي بلا اهبي ما علمتنا إنها حامل ولا شئ الجحود هذي ويوم شكينا بعلامات الحمل عليها وسئلناها وش فيك يا فلانة وجهك أصفر وعيونك زرقاء شكلك حامل ترد علينا وتقول يهيأ لكم بس شوية تعب وإرهاق وتعرفون الرجال الله يهديهم ما يقدرون الظروف بعض المرات وتحط الملامة كلها على الرجل قدام صديقاتها علشان تجحد حملها عنهم

السؤال اللي يطرح نفسه هنا

أنتم وش دخلكم فيها حامل مهب حامل وش عليكم منها ليش اللقافة

أعتقد إن الشئ هذا خصوصيات بين الرجل وزوجته

وشوفوا عاد يا جماعة الخير إذا جو صديقاتها يزرونها بخلال فترة الأربعين يتشرهون عليها ويقولون لها وراك جاحدة عنا إنك حامل ترد عليهم وتقول لهم أنا حبيت أخليها لكم مفاجأة وإذا صاح البزر قدام صديقاتها ما ترضعه من صدرها قدام الحريم ترضعه حليب صناعي وإذا سئلوها وراك ما ترضعينه من صدرك تقول لهم أنا ما بي شئ بصدري وإنه ما يطيع يرضع من صدري تدرون ليش يا جماعة تقول كذا

كله خوف من العين والحسد وتحرم البزر الضعيف من الحليب الطبيعي كله بسبب الأشياء هذي اعتقادات خاطئة كأن ما فيه أوراد تحصن من العين والحسد اقرأي وردك ولا عليك إلا كل خير

والمشكلة إن كل الحريم اللي يلومونها كلهم على نفس الطريقة بالجحادة والخوف من العين والحسد تناقض عجيب !!!!

ومن أمثلة الجحادة عند الحريم جحادة شراء المستلزمات والكماليات والزينة عند المشاغل

على سبيل المثال تلقى الوحدة منهم تشتري لها نوع من اللبس ولا الشنط اليدوية ولا المكياج ولا تقول لصديقاتها من وين اشترتهم

إذا راحت عند صديقاتها وعجبهم اللبس والكماليات وسئلوها من اشتريتهم وبكم سعرهم ما تقول لهم الصدق تشطح بهم بعيد وتقول لهم والله أنا موصية عليهم وحدة من خواتي واشترتهم لي من حدى مولات جدة ولا الرياض مير اصبروا علي شوي اسئل اختي وأعلمكم من وين جابتهم لي وهي تكذب عليهم مهب معلمتهم ولا إذا بغت تصرفهم صح قالت لهم إن أختي اشترتهم لي من دبي ولا من تركيا ولا من أي مكان علشان ما تعلمهم المحل اللي اشترتهم منه ولا بكم سعرهم تدرون ليش

علشان ما يروحون لنفس المحل هذا ويلقون شئ أحسن من اللي اشترته هي ويمكن يصير أرخص بعد من السعر اللي اشترته فيه وعلشان ما يقولون لها أنتي مهكوك عليك ويضحكون عليها هههههههاي

والسؤال اللي يطرح نفسه هنا

ليش ما تقولين إني اشتريتهم من المحل الفلاني وسعرهم بكذا وش يبي يضرك لو قلتي لهم كذا !!!!!

وإذا راحت الوحدة عند صديقاتها وعجبتهم قصة الشعر والتسريحة والصبغة يقولون لها حلوة القصة هذي والتسريحة والصبغة لايقة عليك طبعا يسئلونها ويقولون لها غريبة زوجك ما رفض تقصين شعرك وتصبغينه و عند أي مشغل سويتي القصة هذي والتسريحة والصبغة وبكم السعر وش اسم الكوفيرة اللي سويتها عندها الأشياء هذي وش جنسيتها طبعا ما تجحد ما تعلمهم وين المشغل طبعا ترد عليهم وتشطح بهم لحدى المشاغل ما تقول لهم عند المشغل الفلاني مسويتها وسعرها كذا والسؤال الذي يطرح نفسه هنا

ليش ما تقولين لهم وش المشكلة لو قلتي لهم إنها عند المشغل الفلاني وعند الكوفيرة فلانة !!!

ومن أمثلة الجحادة عند الحريم جحادة السفر خارج المملكة

تجيك الوحدة عند صديقاتها وتقول لهم أنا مسافرة لمكة وجدة والطائف وأبها ما تبي تقول لصديقاتها إنها مسافرة خارج المملكة للدولة الفلانية ولا بكم سعر القروب اللي طالعين فيه تدرون ليش

كله خوف من الحسد والعين ولا تبي صديقاتها يسوون مثلها وأنا اللي خلاني أقول كذا صار موقف لإحدى زوجاتي مع صديقتها

طبعا أنا معود زوجاتي على عدم الكذب والجحادة بالأمور هذي دائما اقول لهم إذا صرتي حامل قولي لهم إني حامل وش المشكلة ولا إذا اشتريتي لك نوع من اللبس ولا الكماليات قولي لهم من المحل الفلاني علشان ما تحطون أنفسكم بمواقف محرجة وخليك واثقة من نفسك ولا عليك منهم وتحصني بالأوردة والأذكار ولا عليكم من أحد وش أنتم خايفين منه

والمواقف المحرجة اللي تصير لبعض الناس كثيرة ما ودي أذكرها الله كل يستر علينا وعليه

ملاحظة : أرجوا من أخواتي النساء الفاضلات إنهم يمسكون أعصابهم شوي وما عليش تحملونا شوي