عالم البنات النسائي كل ما يخص المرأة العربية من ازياء وجمال والحياة الزوجية والمطبخ
دخلت على الدكتوره وسمعت نبض الجنين وخذت وزني ضغطي وكل شي تمام والحمدلله فقالت لي انتي باخر اسبوع من التاسع قلت لها والله ما ادري لان كل مره اجي لمودعي عطوني موعد قالت لي انتي مسويه اشعه في مستوصف خاص اول حملك قلت لها ايه قالت خلاص روحي وشوفي متى مكتوب لك انك تولدين لان الجنين لما يكبر مانقدر نحدد العنر الصحيح له
وطبعا اول ما وصلت البيت رحت واخذت الاشعه وطلعت مفوته اسبوع كامل من الموعد المحدد انا صارت عيوني كذا 
قلت يالله اللي ربي راح يكتبه راح يصير وطبعا كل هذا الكلام وانا مافيني اي الم طلق او شي غير نغص خفيف يجي ويروح يعني في اليوم الواحد احس بالمغص ثلاث مرات المهم دخلت ونمت ويوم جت الساعه 3 العصر حسيت بمغص قوي بس محتمل صحاني من النوم بسرعه عاد انا قمت ورحت طبخت الغداء ونظفت البيت وانا عادي يعني المغص راح
المهم يوم جت الساعه 5 واحس بالم بافخاذي ونفس المغص قلت لا مو معقوله طلق يمكن من الشغل فكملت بس حسيته زاد يوم جت الساعه 5ونص قلت اروح اسوي لي كمون اذا زاد المغص معناته طلق رحت وسويت كمون مع اعواد قرفه وشويه زعفران وحطيتها بكوب كبير بعدين صفيتها وانتظرتها لين دفت وشربتها دفعه وحده
بعدها بنص ساعه الا والالم زاد بس قلت لا (تعرفون بكريه يوم صارت السالفه صدق قالت لالالالا ) عاد كنت متفقه مع بنت خالي اني اروح لاهلي لانها بتجي هناك ورتبت وضعي على هالاساس يوم جت الساعه 8 الا والالم يزيد لدرجه ما اقدر اشد ظهري ابد صرت حانيته كاني عجوز
رحت جلست قلت يمكن يخف الوجع
عاد رحت بقول لزوجي انه يوديني عند امي يوم خف الوجع واول ما وقفت الا واحس شي ينزل مني في البدايه قلت افرازات زي كل مره يوم مسيت الخطوه الثانيه الا والمويه تنزل وتنزل على افخاذي انا صارت عيوني كذا
مع الصياح 💡
واطق الباب على زوجي واول ما جاني ضميته وانا ابكي طبعا كل هالمعاناة وهو ما يدري بس يوم كانت الساعه 6 ونص قلت له شكلي بولد الليله قالي انتي كل مره تقولين كذا ولا تولدين وخلاص ما عاد شفته لين طقيت عليه الباب
هو انلخم وارتاع قام ودق على عمتي اللي هي امه وقالها ان المويه نزلت علي قالت عمتي على اقرب مستشفى بسرعه
طبعا المويه اللي نزلت كانت بنيه موووووووت
طبعا رحت المستشفى الساعه 9 بالليل الا والكهرب يطفى دخلت على الطوارى بلحالي لان عمتي جايه بالطريق وامي بعديوم كشفت علي الدكتوره لقت الرحم مفتوح 3 سم قالت لان المويه نزلت لازم نسوي لها تخطيط ونتابع حالتها طبعا يوم ودوني التخطيط كانت الساعه 9ونص وركبولي المغذي وجهاز التخطيط الممل
وجلست انتطر وكل شوي يقوى الالم قلت لها عطيني مسكن ماعاد اقدر استحمل هاذا كان الساعه 11و20جت قاست الرحم وقالت 4 سم وعطتني المسكن ومرت نص ساعه وانا انتظر ان الالم يخف ولا خف بالعكس زاد
قلت لها ما عاد اقدر وجلست على هالحاله لين جت الساعه 1بالليل وانا اقوم واقعد على هالسرير من قو الالم
المهم يوم جت وقاست قالت 10 سم يالله ولاده واقوم من غرفه التخطيط لغرفه الولاده مشي يوم وصلت عند السرير ماقدرت اتحمل طحت الا الممرضه والدكتوره تمسكني وجلست على السرير يوم جت الساعه 1و25 الا حمودي طالع على الدنيا ويم شفته نسيت الالم بس بصراحه كان فيني توتر مو طبيعي ارجف بطريقه غريبه
حمودي انولد في 1351432 الله يخليه ويحفظه يارب واشوف بره وطاعته لربه
والحمدلله
طبعا ولدت بمستشفى الامير سلمان
وامي كانت جايبه لي مويه زمزم وبصراحه طول الوقت وانا اشرب منها وادعي
طبعا الملاحظات على المستشفى وقت الطلق والولاده تعاملهم مره ممتاز تحملوني مره وانا بهذلتهم في الكشف والتنظيف والخياطه
بس بعد الولاده لو تموتين مالهم دخل فيك يعني كانوا يمرون كرفع عتب تطلبنهم الشي يقولون دقيقه وراجعين الدقيقه ممكن تصير اقل شي 1 واكثر شي 6 ساعات طبعا من بعد ماولدت لين الساعه 9 الصباح وانا منسدحه بالسيب لا رحت غرفه ولا غيره
طبعا مع اللخمه اللي منا فيه زوجي رجع بالشنطه معاه وولدي جلس من بعد الولاده لين الساعه 3و45 وهو ملفوف بورق مدري بايش وربي يوم جابته لي مت من القهر خذيت جوال وحده معاي الله يعافيها وكلمت زوجي وقلت له جيب الشنطه الولد ماعليه ملابس بيموت من البرد
يوم تنومت فوق غداك وفطورك وعشاك بوقته غير كذا موتي
المهم طولت عليكم بس حبيت احكي كل شي
