خيرا رأيتٍ ان صدقت الرؤيا العريس بعد شوي بيدق الجرس

مسائكم خير جميعا

كنت (امس )
فوق سطوح وحده من ناطحات السحاب
وصارت سوالف اهمها اني شفت توفي المنتوفي وتهاوشت معاها
المهم قمت من النوم
وطلع حلم وكوابييس مرافقه معاه (الله لا يوريكم كيف شكل توفي )<< ماقلت شي ترا بس من حبي لهالبنت تحلمت فيها

واهم شي احلامي ماتحتاج تفسير خصوصا اللي امس لأن فيه اكشنات وفواصل ويوم صحيت دريت ان حرارتي ضاربه 38 وعلى طول اخذت مسكن الحراره الله يبعد عنكم الشر

المهم
كل هذا مقدمه للي ابي اقوله

تصدقون يابنات لي 4 سنين قايلي مفسر الاحلام انه بيجيني عريس الغفله وماجاني

كنت مجنونة تفسير احلام واخذ الحلم واقوم ارسل للشيخ الفلاني
وماشاء الله يجي التفسير خلال اقل من ساعه ( شكله متفرغ لخدمتي دائما )

يابنااات والله نص اللي يقولون انه يفسرون تفسيرهم غلط
وعن تجربه بما اني خبيره بهالسوالف
بعضهم يجونك بالتلفزيون ويفسرون ببرامج مخصصه ويقول ارسلوا لي رساله عشان افسرلكم
واذا ارسلتي له يجيك الرد في خلال فترة قصيره ويكون نص الرساله ( الجاهزه ): ( خيرا رأيت ان صدقت رؤياك والله اعلم فسيأتيك فرج قريب من هم وضيق انتي فيه )

وفيه نصوص جاهزه ثانيه مثل ( خيرا رأيت هذه علامة على خطوبتك وزواجك برجل صالح )
هذي النصين حفظتها صم لو تبون اسوي تشكيل للحروف سويت ماعندي مشكله

انا متأكده مو هو نفس الشيخ اللي يفسر بالتلفزيون
هذي خدمة للرد اتوقع
دايم نفس التعليق يجيني بكل اللي ارسله

من 4 سنين فسر لي واحد انه بيجيني العريس
وياحظي عريس الغفله للحين ماشافته عيني

وبعض البنات يصدقون كل كلمة يقولها المفسر وتطير فيها

اذكر وحده من جاراتنا قبل 15 سنه فسر لها واحد رؤيا وقال ان اخوها بيموت بحادث
وهي المسكينه انفجعت وصارت دايم تبكي مرت سنه وسنتين وثلاث وليومكم اخوها عفريت ادشر منه مافيه لا فطس ولاهم يحزنون

يابنات اعرفوا لمين تروحون اذا بتفسرون رؤياكم
ترا اللي مسوين انهم مفسرين الحين راس مالهم يفتحون كتاب ابن سيرين ويدورون التفسير ويبربرون على روسكم
مع العلم ان كتاب ابن سيرين مو هو اللي مألفه هم نسبوه له وهو ماله شغل بس كان يفسر للي ييقابله يعني مو مؤلف لا كتاب ولا شي

في حلقه من حلقات بيوت مطمئنه زمان كانت تتحدث عن المفسرين وكان فيه وحده متصله عليهم وقالت للشيخ: ياشيخ انا تفسرت رؤيتي اني ماراح اجيب عيال . قالها الشييخ مين فسرها لك؟
قالت واحد عطتني رقمه صديقتي لأنه يفسر
قال الشيخ: عطيني رؤيتك مره ثانيه: يوم حكت له الرؤيا
قال الشيخ: يبدو ان اللي فسر لك اشتبه عليه امرين وقالك انه مابيجيك عيال لكن تفسير الرؤيا الصحيح انه راح يجيك بنات اكثر من العيال
( انا حقدت على اللي فسر لها الرؤيا قبل طيح قلبها المسكينه )

لأنه يابنات اذا في شي بيتفسر من الرؤيا لازم تنحكى الرؤيا كامله لأن الجزئيات بالرؤيا مهمه
عشان كذا تلقون المفسرين الصح يطلبون من صاحبة الرؤيا هي اللي تقولها مو احد ينوب عنها

وكمان بنفس حلقه بيوت مطمئنه حقت المفسرين الشيخ ذكر ان المفسرين الثقه بالسعوديه مايتعدون 12 او 14 على ما اظن
والباقين مجتهدين
واحنا اللي نروح فيها نبي يتفسر الحلم بأي طريقه واخرتها التفسير يطلع غلط
انا تركت اهتمامي بتفسير الاحلام الحين اخاف اروح افسر يقولولي قومي افتحي الباب اول مايدق الجرس هذا عريسك
وعاد انا ماتشوفوني الا جالسه عند الجرس واناظر فيه متى يدق
واول مايدق اقوم صاروخ واقول مين على الباب ( بصوت غنج وعيون ترمش )
على اساس انه عريسي المنتظر جاي يخطب
واخرتها يطلع لي خالد ولد الجيران ابو 10 سنين ومعاه صحن يقول: امي تسلم عليكم وتقول عندكم طماط
احس وقتها باخذ الصحن وعلى راسه هو وامه

تدرون وش مشكلتنا
اننا نخاف من بكره
وندور امل نتمسك فيه ومن وسائل اعادة الامل لحياة حلوه تفسير الحلم
مع انه غللط اننا نعيش حياتنا ونرسم احلامنا على اساس شي مو مضمون
احلى شي الوحده تعيش يومها وترسم خطط حلوه لبكره ان مامشت بالخطه الفلانيه تمشي بغيرها
😆