خمسه وسادسهم البحر..

بالبدايه بقول القصة منقوله والكاتبه هي ((قمة النعومه))=((سوجو))

_______
خمسه وسادسهم البحر
( وعسى ان تكرهو شياء وهو خيرا” لكم )

دخل للبيت وهو يغني..وطربان..
دخل في الصاله ولقى اهله جالسين..

فيصل: السلااااام عليكم..

الكل: وعليكم السلام..

هدى: ولد حلال..تونا في سيرتك..

فيصل: ابد .. اكيد تحشون.. ولا انتم وش عندكم غير الحش؟..

ريم: حراااام..بالعكس..انت تعال اجلس وبتسمعنا..

ام فيصل: يابنات إذا قدرتو عليه لكم مني ألف لكل وحده فيكم..

بسمه: صدق؟ حتى انا؟

فيصل: لحظه لحظه.. من الحين قبل لا اجلس..كان سالفتكم عرس ما عرس..علموني من الحين ارقى..

هدى: وليش ان شاء الله بترقى؟

فيصل: لأن العزوبيه صالحه لي.. داق لي خيمه فيها مااابي اطلع منها…

ريم: استح على وجهك..عمرك صار فوق الـ 27 ومابعد فكرت؟

فيصل رفع حاجب: استح!!! وليش استحي؟ وبعدين انا رجال يعني لو يجي عمري 80 90 100 على الأقــل وتوني اتزوج عادي..

بسمه: اسمعو..يقول على الأقل!

ام فيصل: ياوليدي فرحني..انا ابي اليوم الي ادخل ويقولون ام المعرس دخلت..

دخل بندر: السلاااام عليكم..

فيصل: ايوااااا… هذا المعرس وصل يام المعرس..

بندر طير عيونه: هاه؟ معرس؟! وشهو معرسه؟

فيصل: تو امي قاعده تقول لي لقيت عروس لبندر..حبيبي..

بندر: لا ياحلو!! ايه نشبها فيني بعد..لايابوي..انا مانيب معرس إلا إليـــن الاقي زوجة المستقبل بنفسي..

هدى: فيصل!! بندر الوعد بعدين.. إنا الحين بنخطب لك..

بندر: ايوااا..سمعت؟ بتخطب لك..مبروك..مبروك ياعريس منك المال ومنها العيال..

فيصل: لاااا.. انا عاد حالف انها لك.. خذها عليك بالعافيه..

بسمه: هيـــه.. وش خذها؟! ثوب هي ولا شماغ عشان ياخذها؟!

فيصل: لأني انا مراح اتزوج.. ياخذها هو..

بندر: ولا انا.. انا توني في بداية شبابي…توني صغير على وجع الراس..خلها لك..

فيصل: يمه! هذا انسب لها..هو يعرف يتصرف مع المرأه.. وفيه حلم على ثرثرتهم..

بندر: وفيصل وصل سن الزواج..وراتبه مرموق وعنده خبرات بالحريم..

فيصل: وبندر وظيفته مستقره هنا.. بس انا الي ماأستقريت من ديره لديره..

بندر: بالعكس إلي كذا تلزمهم ألمره..عشان مايصيع..

فيصل: يمه! بندر يحبونه بنات العايله كلهم.. هذا دليل على شخصيتك الحلوه..

بندر: وفيصل يكلمونه بنات الرياض كلهم وهذا دليل على اسلوبك الرائع..

فيصل: بس انت تحب الكشخه والرزه وهذا إلي يحبونه الحريم..

بندر: وانت لك هيبه بطولك وعرضك ووسامتك..

ريم: بس بس والي يرحم والدينك بس..خلاص البنت الله يستر عليها..

هدى: استغفر الله توقعتكم كبرتو…

ام فيصل: تخيلو من ابدا معهم هالموضوع وهم كذا…

بسمه: ويه بسم الله علي.. عسى بس إذا جت حرمه تخطبني يسوون كذا؟!

فيصل: هذا..إذا..إذا جت حرمه..ولا انتي من يبغاك؟

بسمه: وجع..انا كل الحريم إذا دعو لولدهم قالو الله يرزقك ببسمه

بندر: لحظه يا أخت بسمه.. إذا دعو لـ ولدهم ولا على؟

ام فيصل: انتم وش فيكم اليوم؟

بسمه: يعني ماتعرفين عيالك إذا اجتمعو؟ إذا بندر لحاله يجي روعه وإذا فيصل لحاله يجي يمشي الحال..لأن فيصل عله.. بس إذا اجتمعو! اعوذ بالله……

فيصل: اقول ياهدى ماجبتي عيالك؟

هدى: لا..راحو مع ابوهم يسلمون على جدتهم..

ريم: فيصل! تدري إن اخت عبدالله زوجي فلقة قمر؟

هدى: ولا عاد اخت محمد..لاإله إلاالله قمه قمه

بسمه: انا صديقتي هند..تااااخذ العقل…

ام فيصل: يالله بس..فيصل مراح ياخذ إلا ليلى بنت اختي..

بندر همس لفيصل: رجعنا للطير يالي

فيصل يهمس: اقولك شلون اغير مجرى حديثهم؟

بندر: شلون؟

فيصل: انا اوريك

هدى: وش عندكم تتهامسون؟

فيصل: ابد.. جالس يخيرني بينهن.. إلا وش اخبار العنقز مع رهف ياهدهد؟

هدى: ويـــه ..وش اقولك يافيصل لعب فيها لعب بسم الله عليها قلبها كلها حبوب..

فيصل: عاد انا اعرف واحد يهتم بشكله مرره..ويشتغل صيدلي..ويقول كان وجهه كله حبوب واختفت

هدى: صدق؟ويصلح للصغار؟

فيصل: لكل الأعمار..

بسمه: يشيل حب الشباب؟

فيصل: كل شي..يخليك مرايه..

ريم: والبقع السوداء؟

فيصل: اقولكم كل شي..حطيه في الأماكن الغير مرغوب فيها ونامي..وبعد اسبوع بتجين باربي

ام فيصل: والتجاعيد؟

فيصل: ابد .. يخليك نونو.. يقولي جت في صيدليته حرمه وقالت ابي اي شي يخلي زوجي يشيل فكرة الزواج من راسه.. قال لها وش عندك؟ بقع؟ حبوب؟ جفاف؟ التهابات؟ قالت كل شي.. عطاها هالكريم ..بعد اسبوع رجعت وطلبته وشكرته وتقول قلبني انسانه ثانيه في اسبوع وطلبت كميه من هالكريم

الكل: صدق؟!

هدى: ابيك تجيب لي اسمه بكره….

فيصل: ماتلاقينه في اي صيدليه هذا خاص وعليه طلبيه بالهبل..بأدق يحجز لي رقم وبجيب لكم..يمكن بعد اسبوع يمكن بعد شهر ماأدري..انا برقى اغير ملابسي وبطلع..

بندر قام: وانا بنام..يعني بلا صراخ..

وهم على الدرج..

بندر: صدق الكلام الي قلته؟

فيصل: وانت سامع إن عندي صديق صيدلي؟

بندر: لا..

فيصل: اجل خلاص..لاتصير ناقص عقل مثلهن..

بندر: والله انك كارثـــه هههههههه..

ـــــــــــــــــــــ

فيصل بعد ماغير ملابسه..وجهز أغراظه في الشنطه..
رن جواله لما رفع وناظر الشاشه..

فيصل: ياهوو عليناااا…وش بيخلصني من هالقلق هذي؟ مزعجاااه بكل معاني الكلمه.. بتركها تدق إلين تشبع.. ولا اقول خلني ارد واقولها لاتدق..
الو

سحر: الو اهلين فيصل

فيصل: هلا..سحر

سحر: وش اخبارك؟

فيصل: تمام

سحر: فيصل وش فيك تغيرت علي؟..معاد تدق علي مثل اول

فيصل : مشغول ياقلبي..

سحر: وهالشغل بيبعدك عني؟

فيصل: وش اسوي عاد؟ سحوره حبيبتي بعطيك خبر انا والشباب اخذنا إجازه وبنطلع على جزيره في البحر

سحر: وشلون بتروحون؟

فيصل: باليخت بعد شلون بنروح ؟ بسيكل ؟

سحر: طيب هناك مافيه ابراج؟ شلون بدق عليك؟

فيصل: لاتدقين إذا حصلت فرصه اول من بدق عليه انتي..

سحر: متى بتمشون؟

فيصل: اليوم..بنمشي انا وفهد للدمام..وبننام عند شباب نعرفهم هناك..والصبح الساعه 6 بنمشي

سحر: طيب طمني اول ماتوصل للشرقيه.. انا بتم سهرانه إلين تدق تطمني

فيصل: خلاص بدق عليك اول ماأوصل..بيباي

سكر منها ورمى جواله على السرير.. سكر شنطته ورفع جواله
ولما طالع الشاشه لقى رساله فتحها..لقاها من المسكينه
( ياخي فكني حرام عليك..انا موب من هالنوعيه..فكني والي يرحم والديك )
ابتسم ودق عليها
بعد فتره ردت

المسكينه: نعم

فيصل: هلا بهالصوت..

_ نعم ؟وش تبي؟

_يابنت الحلال ارحميني انا حبيتك..

_وش هالخرابيط يارجال؟..وش هالتفاهات؟ وبعدين البنات كثير كلم اي وحده وش معنى انا؟

_ القلب وما يهوى..أبسألك انتي منيره؟

فترة صمت_ انت وش عرفك؟

_ انا اعرفك..قريبك يامنيره واحبك من سنين بس انتي ماتعرفين

_ من انت؟

_ ماله داعي اقولك من انا..انتي تعرفيني..

_شف..انا بديت أفقد اعصابي وانت السبب.. لك حوالي شهرين تحاول انك تخرب اخلاقي وماقدرت..

قاطعها: انا موب قصدي اخرب اخلاقـ…

قاطعته: اسمعني..انت بتتعب ومراح تحصل اليوم الي بتلاقيني مثلك حقيره..

_ افااااا

_ اسمع..وحركاتك هذي مراح تمشي علي ياواطي..
إذا كنت بهيمه وماعندك عقل فلا تعتقد إني مثلك .. انا وحده فطينه..

_ اخسس

_ واعرف حركاتكم القديمه

_ تعرفين حركاتنا الجديده طيب؟

_ اسمعني ياحيوان انا تنازلت وكلمتك لأني توقعتك كفو وتسمع الكلمه.. بس انت طلعت من حثالة المجتمع..

_ بعد؟

_ واكثر..وإذا انت ماعمرك سمعت احد يقيمك فأنا مستعده اقيمك من اليوم لين بكره..

_تؤ تؤ تؤ..هذا وانا داق اسلم على حبيبتي قبل لا..

قاطعته: حبك برص ان شاء الله ياقليل الحيا..صدق ان الناس نزعو منهم الحيا ياتافه

_ ليش؟

_ وتسأل بعد..لاكن الشرهه موب عليك الشرهه علي انا إلي اكلم حشرات..

وسكرت في وجهه
فيصل يضحك: ياحليلها إذا عصبت.

رن جواله بأسم فهد: الو

فيصل: هلا..ها جهزت؟

فهد: انا داق بسألك جهزت؟ انا جهزت

فيصل: وانا بعد

فهد: قلت لأهلك؟

فيصل: لا .. بقول لهم الحين..

فهد: منتاب صاحي..انا قايل لهم من اسبوع..

ــــــــــــــــــ

ام ياسر: ياياسر يايمه لاتروح لهذه الجزيره إلي ماعرف وين طلعتوها..اخاف يصير لك شي يايمه

ياسر: يمه!!! الشباب كلهم بيروحون..اجلس هنا بروحي..

ام ياسر: بس عرسك قرب وانت بدال ماتجهز عمرك تطلع للبحر؟!

ياسر: انا مجهز عمري ياعمري..وانا ابي اختم عزوبيتي بشي يستاهل.

حمد: طيب خذني معك

ياسر: هذا إلي ناقص أخذ بزران معي

حمد: خير!! وش بزران؟ باقي لي سنتين واخلص الثانويه واتوظف واتزوج

ياسر: ايه ان شاء الله..هاه يام ياسر وش قلتي؟

ام ياسر: انا خايفه عليك ياأمي..

ياسر: يمه كلها ثلاث ايام..وراجع لك ان شاء الله..انا احسن من غيري..تدرين من ظمن الشباب بيجون من الرياض بيجلسون 5 ايام
يوم قبل للوصول هنا..
ويوم بعد للأستراحه هنا..

ام ياسر: والله قلبي موجعني على هالطلعه

ياسر: وش دعوه عاد!! اول مره اطلع؟

ام ياسر: طيب الله يحفظكم..بس هاه دق على إيمان قبل..

ياسر: اكيد..بدق عليها وبقولها..وبعد؟

ام ياسر: اول مايمسك الجوال معك..

قاطعها: بدق عليك..اكيد مايبي لها كلام..وبعد؟

ام ياسر: سلم على ابوك

ياسر: اكيدين..فيه شي ثاني؟

ام ياسر: لا ياأمي..

ياسر: ادعي لي..

ام ياسر: الله يرجعك لنا سالم وغانم…رتبت هدومك؟

ياسر: رتبتها..

ام ياسر: خذت لك اكل؟

ياسر: لا كلنا اتفقنا مع مطعم يجهزون لنا حافظات وفاكهه وكل شي ..

ام ياسر: زين..الله يرجعك لنا سالم..

ياسر قام وباس راس امه: الله يخليك لنا..

طلع فوق ودخل على ديمه..

ديمه: ياسر؟!

ياسر: هلا ديوم..شفيك؟

ديمه: مافيني شي..بس عندي بكره اختبار علم اجتماع.. انت وش فيك؟

ياسر: انا بكره الصبح بنروح انا والشباب لجزيره..وبنجلس ثلاث ايام…

ديمه: جد؟ طيب وزواجك؟

ياسر: زواجي باقي عليه خمس ايام.. يعني لي يومين إذا رجعت..

ديمه: وناسه..من قدكم يالشباب… طيب ليش وجهك مكتم ؟

ياسر ابتسم: لا ابد.. بس قلت بسلم على ديوم..وبشوف كانها تبي شي من هناك

ديمه: اممم جب لي عريس..

ياسر: بايخه..

ديمه: انا ادري عنك!! جزيره فاظيه وش بتجيب لي؟

ياسر: ههههههه انا بس اقوم بالواجب..يالله باي..

ديمه: ياسر ! ياسر !

ياسر دخل راسه: هم؟

ديمه: دق على إيمان..

ياسر: اكيد..انا ادق عليها كل يوم..شلون عاد هاليوم بذات؟..

ديمه: بس لأنك بتروح..

ياسر: وبرجع ان شاء الله..يالله مع السلامه

ديمه: فمان الله..

طلع وراح لغرفة ابوه..

ياسر: السلام..

ابو ياسر وهو يقرى الكتاب: هم؟

ياسر: يبه..جيت اسلم عليك عشان بكره الصبح بنمشي للبحر..

رفع راسه وفسخ نظارته: ليش؟

ياسر: نتمشى..اقضي اخر ايام العزوبيه..

ابوه: وكم يوم بتجلس؟

ياسر: ثلاث ايام.. برجع قبل العرس بيومين..

ابوه: الله يحفظك…من بتروح معه؟

ياسر: انا والشباب…

ابوه: من هم الشباب؟

ياسر: منصور ومحمد وعلي وعمر و..

قاطعه: طيب محتاج فلوس؟ ناقصكم شي؟

ياسر: مانقصنا إلا دعاك يابوي..

ابوه: الله يرجعك لنا سالم..

طلع ياسر بعد ماباس راس ابوه.. وتوجه للبلكونه ودق على خطيبته إيمان إلي بصعوبه قدر يراضيها..وبصعوبه قدر يهديها ويمسح دموعها ويضحكها…
وهي عجزت بكل الطرق عشان يغير رايه ويشيل فكرة هالجزيره من راسه بس ماقدرت

ــــــــــــــــــ

جلس يردد كلام منصور في راسه..
” لازم تغير حياتك .. انت تعاقب نفسك بدون ذنب … خلاص زمن الحب راح مع اهله .. انسى وغير حياتك .. الدنيا ماتسوى انك تكدر نفسك علشان شخص ماعرف قدرك .. تعال معنا للبحر وارمي جابر في هالجزيره المهجوره وارجع جابر ثاني .. “

قام من سريره ونزل شنطته من فوق الدولاب وفتحه وبدى يطلع من الدولاب ويدخل في الشنطه..

دخلت امه: جابر يمه ! وين بتروح؟

جابر: بروح اغير حياتي بروح ارمي جابر وارجع جابر ثاني…

امه: جابر!! انت شقاعد تقول؟

جابر: قاعد اقول إلي لازم اقوله من زمان.. تعبت من الضعف .. تعبت من الظلم .. تعبت من السكوت .. تعبت من الضرب والإهانه تعبت من التعب نفسه.. انا يايمه كبرت وصرت رجال مسؤل عنك وعن اخواني.. انا رايح لمدة ثلاث ايام وبرجع لكم جابر ثاني.. وبعيشكم حياة ثانيه…

امه: وين بتروح وبتخلينا؟

جابر: بروح للبحر..وبرجع لكم

امه: وبتخلينا؟..انا واخوانك مالنا غيرك..نطالع الله ثم نطالعك..

جابر اخذ نفس: راجع لكم ان شاء الله راجع لكم….

وقفت ام جابر تطالع ولدها بخوف من هالتغير المفاجئ..
جابر الساكت الهادي بدى يتحرك…وبعد طول هالفتره من الحبسه في هالغرفـــه الرخـــيصــهـ المــظـلـمـهـ .. قرر يطلع ! ولوين ؟ للبحر..

ــــــــــــــــــــ

ركب فيصل بجنب فهد..

فيصل: السلام

فهد: وعليكم السلام..هاه قلت لأمك؟

فيصل: ايه..وفزعت الدنيا..انا اخر اهتماماتك..تسوي الشي من دون شوري..انت متى بتعقل؟ متى بتكبر؟ هذا وانت بكري ..و و و

فهد: راضيتها؟

فيصل: بترضى هي من نفسها….

فهد تنهد: أنزل راضها.. قبل لا نمشي وتندم..

فيصل: ياخي بترضى بنفسها.. امي واعرفها…

فهد: كل الأمهات كذا..بس انت بتروح لمكان مهجور.. انزل..

فيصل: ياخي وش فيك؟ موب انت فهد الأولي..

فهد: فيصل انزل..

فيصل: امي نامت..

فهد: صحها..

فيصل: أوما اصحيها!!..خلاص بدق عليها..

فهد : انا قلت لك .. وانت براحتك..

مشى فهد بالسياره…

فيصل: انت متغير ذا الأيام وش فيك؟

فهد: خلها على الله..

فيصل: يافهد انت اعز من الأخ تكلم قول..

فهد: مراح استفيد من الكلام..

فيصل: يمكن اساعدك..

فهد: إذا كان هذا حكم القدر ماحد يقدر يساعدني.. الشي الوحيد إلي بيساعدني هو النسيان .. عشان كذا انا وافقت اطلع معكم….

فيصل: انت من زمان وانت تطلع معنا..

فهد: بس عقب إلي شفته حبست نفسي … بس عقب ماكلمني منصور وكلمتني انت قلت يمكن إذا طلعت انسى همومي..

فيصل: ياخي حيرتني معك.. قول وريحني…

فهد: خلني ساكت احسن ياخوي.. انت ليش طلعت؟

فيصل: تغير جو.. انت تعرفني انا انسان احب التغير..في كل شي في لبسي في شكلي وفي اصدقائي غيرك طبعا..حتى في البنات احب اغير… وحبيت اغير جوي وبري وبحري.. خخخخخ…

فهد: وش يضحك؟

فيصل: ياسامج..اضحك وبس.. لاتسأل…

رن جوال فيصل..
بس فيصل ضغط السماعه الحمراء..

فهد: مين؟

فيصل: وحده قلق …

رن جواله وكان بأسم عبدوووو

فيصل: اهلا وسهلا..

عبدو: هلا فصيل.. هاه مشيت؟

فيصل: مسكنا خط الدمام..

عبدو: طيب قولي اخبارك مع المسكينه..

فيصل: هههههه..والله مسكينه..هي مستقيمه..

عبدو: والله لأخليها متعرجه..بس عطني الإشاره الخظراء..

فيصل: دق.. دق عليها انت والشباب.. وكل واحد واسلوبه.. عشان تعرف من فيصل إلي تلفظت عليه.. اجل انا حشره؟

عبدو: افااا…

فيصل: اسمعو.. إلي بيقدر عليها له مني مبلغ وقدره…

عبدو: بتشوف.. مراح ترجع من البحر إلا وهي خالصه…

فيصل: كفو بالرجاجيل..

عبدو: اوكيه يالفيصليه..خلك على اتصال..

فيصل: ولو.. هذا اكيد..

سكر..

تنهد فهد: انت مراح تتـوب؟

فيصل: وش قالو لك؟ كافر عشان اتوب…

فهد التفت عليه بعصبيه: مراح تتوب من حركاتك الصبيانيه.. انت قلتها البنت مستقيمه وشوله هالف والدوران عليها؟
ولا لأنها مستقيمه بتجيها؟.. وهالصايعـه إلي تدق عليك تسكرها بوجهها..

فيصل: انت ناقصك تقصر الثوب وتزرع لحيه.. وتأذن بنا.. وتصير من الهيئه.. وش فيك طالع لي ارهابي؟

فهد بقهررر: الكـــلام معاااك ضــايع… اكلمـك اواكلم الجدار سـواء…

فيصل ابتسم: لا موبايلي خخخ تمون يالغالي تموووون…

فهد: فيصل! إذا بتغازل غازل البنات إلي ضايعات.. بس إلي مستقيمه لاتجيها..

فهد: هماها مستقيمه!! ليش خايف عليها؟

فهد: المشكله إن البنت عاطفيه وبتخرب على يدك..

فيصل: المستـقـيم مستقيم.. والدائـــره دائره.. والمـثلث مثلث.. والمربـع مربع..

فهد: فيصل انا اتكلم جد..

فيصل: وانا اتكلم اب…خخخخ…

فهد بلع غيضه وسكت..

فيصل: اوووه.. هههه عصبت؟! اسفين وحقك علينا.. وبعدين انا متأكد هذي موب بس بنت هذي بنت قويـــــه.. مراح يقدرون عليها.. جربت معها جميع الأساليب ولا نفع.. وعبدو والشله ملولين.. بيملون ولا راح يقدرون عليها…

فهد كمل سواقته بهدوء..

فيصل: اضحك عاااد.. كلنا بنروح لسعة الصدر لاتكدر علينا يا اسماعيل..

فهد: من اسماعيل؟

فيصل: اسماعيل الهندي حق مزرعتنا.. انت تشبهه

ابتسم فهد: منتاب صاحي…

فيصل: ايوا كذا.. ابتسم.. وليه تكشر دا العمر كله يومين..
شغل بس هالحلوه نانسي الدنيا حلوه..