خطبتي..زواجي..هجرتي..عودتي لبلدي واهل زوجي

تعرفت على المنتدى عن طريقة صديقتي اللي هي صاحبة هالنك

وهي اللي اقترحت عليا اني اكتب مشكلتي هنا

انا يابنات متزوجة زوجي مو من بلدي
انا مغربية وهوخليجي(ماابي تجريح لاني كل ماذكرت جنسيته بموقع حتى لوو بس بالصدفة تصير سالفه)

اول ماخطبني بابا رفض لانه كان لوحده
بعد شهر جاب امه واخوه لانه ابوه متوفي
وسوينا خطبة وحددنا ميعاد العرس بعد 4 شهور
المهم امه ماعارضت او شي بس شرطت اني اتحجب بعد الزواج
اتحجبت والحمد لله مو لانه شرط امه بس لاني كنت انتظر احد يشجعني على هالخطوه

المهم قبل العرس باسبوع جاب كل اهله (اخواته واخوانه وزوجاتهم…)
بهالاسبوع كل انواع التجريح اللي عمري ماشفتها بحياتي عشتها بهالاسبوع
ماخلو شي ماعلقو عليه
لدرجة انه ماما قالت لي خلاص مانبي هالزواج اللي من اوله كده
بس زوجي كان دايما يصبرني ويقولي عاادي لانه عاداتنا مختلفه وتقاليدنا وكل اخوانه متزوجين من العيله الا هو…
اختي تصمم ازياء مغربية اقترحت عليهم انها تلبسهم مغربي بالعرس لانه احنا من صغيرنا لكبيرنا نلبس المغربي وهما مجهزين فساتين قصيره واحنا مانلبس كده يعني ماكنا نبيهم يكونو غير الناس
فقامت اخته الكبيره تصارخ وتقول احنا ماجايين عشان تلبسونا واذا ماتبونا ماراح نحضر وقامت قالت لزوجها يحجز لها عشان ترجع واختي اعتذرت وامي تهدي فيها لين رضت بالاخير
2 من اخواته وزوجة اخوه لبسو مغربي والباقي لا
المهم مر العرس اللي ماسلم من تعليقاتهم على كل كبيره وصغيره وخصوصا اخته الكبيره وبنت عمه اللي هي زوجة اخوه
وطول هالفتره امه كانت مره اووكي معايا

المهم اول مارحت سكنت مع امه بملحق بالبيت
وكان في البيت امه واخوه وزوجته واخته الصغيره
بعد وصولي شغلني زوجي معاه بشركتهم لاني كنت توني متخرجة من الجامعه(هندسة مدنية)
ولاني اتحدث ماشاءالله 4 لغات + العربية

اول مااشتغلت بالشركة كلهم انقلبو ضدي حتى اللي كانو يعاملوني بالاول كويس صارو مايطيقوتني
لدرجة ان امه ساعات اسلم وماترد
كنت اسوي المستحيل عشان اتفاهم معاهم خصوصا لاني ماكنت افهم لهجتهم عدل
لانه مع زوجي اذا مافهمت شي كان يشرحه لي بالانجليزي
كنت اذا مافهمت كلمه قالوها او غلطت فنطقها يضحكون عليا والمشكله صارو يخترعو كلمات ويقولوها يوم اسال زوجي عن معناها يقولي من وين جايبه هالكلمه مالها معنى

وهما كانو يبون له بنت خاله كل ماتجي زياره يطلعو فيني كل عيوب الدنيا فيني وهي موجوده
ويمدحونها لزوجي

ولما يجلسو يتقهوون انا اسوي شاي مغربي وزوجي يشربه معي لانه مااعجبتني القهوه اللي يشربون
ومره واحنا نتقهوى دخلت اخته الكبيره وشالت له الكاس من يده قالت له موتتك بسحرها
وانا ساكته عمري ماردبت على وحده منهم
وزوجي ماقالها شي لانها اخته الكبيره ويحترمها

وكل ماااكون اكلم اهلي عالنت او عالتلفون يقولون اني اسولف عنهم لانه احنا متعودين نسولف فرنسي
والمشكلة حتى لما اسوولف مغربي مايفهمون

كنت انا وزوجي متفقين مانجيب عيال الا بعد 8 شهور على الاقل نبي نعيش حياتنا شوي 😆
وهما من اول شهر زواج وهما يقولون لزوجي طلقها لانها مااحملت او اتزوج عليها خصوصا لما حملت اخته اللي تزوجت قبلي باسبوعين
المهم بعد 4 شهور زوجي قالي لاعاد تاخذين حبوب لانه ماعاد يستحمل كلامهم عن العيال
بعد شهرين حملت الحمد لله وتعذبت وايد بالوحم
اشتهيت حلويات مغربية وماما مسكينة ارسلت لي وااايد عاساس اعطيهم منها ولما اعطيتهم قالت لي اخته يكفي السحر اللي يوصلنا منكم من غير ماناكل اكلكم وكان الكل جالس وانا رحت غرفتي من غير ماارد عليها
وكل مااكنت اتعب او شي ويوديني المستشفى يقولون له دلوعه لاتوديها مره ثانية
ومره اخته قالت لي لو كانت فطوم اللي مكانك كان سوينا لها عرس ثاني لما تحمل(فطوم البنت اللي كانو بياخذون له)

لما قرب ميعاد ولادتي جات ماما كل مره يسمعونها كلام زي السم بس الحمد لله اصلا هي ماتفهم كل كلامهم + حتى لو فهمت كانت تسكت
لما ولدت بنت حقروني يقولون اللي ماجابت الولد ماجابت شي
وامه احتراما لها قلت لها سمي البنت انتي قالت لي لا مااسمي بنات ونست انها بنت وعندها بنات
فسميت بنتي *غيته* وكله يضحكون على اسمها
والهدايا اخته جابت لي علبة اسعافات اولية والباقي ماجابو لي شي وانا كل وحده منهم لما تكون عندها مناسبة صغيره او كبيره اشتري هدية واروح