خسرت صديقتي والسبب ؟؟

انا إنسانه عطاني الله موهبة التعبير وكتابة القصص مشكلتي إن لي صديقه من ايام الدراسه
المهم انا ماكملت دراستي وكانت هي الصديقه الوحيده اللي طلعت بها من المدرسه
طبعا على ايام دراستها كانت تتصل يا إنها تبيني اكتب لها بحث او يوم كانت في التطبيق العملي
اكتب لها مقدمات لبعض الدروس وتزوجت وصرت اكتب لها حتى رسائل الحب او إعتذار او عتاب
انا عند كل طلب كانت تطلبه لازم من هالديباجه إنه إحساسك اللي لازم يوصل
وإنه غلط كذا لازم يكون لها بصمه وتحاول وتجرب ومن هالكلام
قدمت على منصب معيده العام وطبعا انا اللي كتبت لها الخطاب وما لله كتب تنقبل
المهم قاطعتني شهر رمضان كامل ولا حتى رساله وحده  اتصلت انا مره عليها وماردت
وارسلت اهنيها بالشهر وهذا عهدي فيها إلين قبل كم يوم
لقيت لها إتصالات ورساله تقول دقي علي اليوم ضروري
دقيت اول ماصحيت قلت يمكن فيها شي الزبده تقول منصب معيده شاغر للحين ليش ما اختاروني؟
قلت لها اللي الله كاتبه بيصير واستخيري ولاتزعلين نفسك يمكن خيره ومن هالنوع على بالي داقه تبي تفض فض طلعت تبيني اكتب خطاب ثاني تطالب فيه بإعاده المقابله الشخصيه
وانها كفؤ للمنصب وان الكليه بحاجته ومن هالكلام قلت لها ابشري قفلت منها
وجاني خبر إن بنت خالي سوت حادث وهي في غيبوبه وحالتها ماتسر
وجاني خبر اخوي إن أسنانه الاماميه التركيبه طاحت ولثته ملتهبه وهو في غربه لا أم ولا اخت ولا ابو
وقتها حالتي كانت حاله حاله
دقت مره ثانيه قالت إيش صار قلت لها متى تبينها قالت ابيها اليوم المغرب وكان الاتصال العصر قلت اوووه قالت ليش جاين عندك ضيوف قلت لها لا بس مايمديني علمتها بسالفة الحادث واخوي
وإني انا ا ادق دق على اخوي واهلي بعد مايردون وابي اتطمن عليهم البنت في غيبوبه
واخوي مايندرى وش صاير له
قالت لي البنت إش اسمها؟ سؤال مدري وش يبي المهم قفلت منها وكتبت الخطاب وارسلته وسايط وكتبت آخر شي إذا وصلك الخطاب دقي علي وعلميني إذا فيه إضافات او تعديل
وإلى أمس ماجاني خبر فأنقهرت لها الدرجه مصلحجيه هي؟
انا قد صار لي معها موقف وعاتبتها قالت اكتبي بحث ويوم خلصته ادق عليها واعلمها إنه جاهز ما اهتمت وكنت انقلها البحث على التلفون هالكلام قبل مايكون عندي ولاعندها لاجوال ولا إيميل المهم قالت بعدين نكمل وقفلت ولاعاد دقت دقيت عقب اسبوع وغصب ردت وكانت اعذارها واهيه
المهم انا اليوم ارسلت رساله معاتبه وكتبت لها

حتى لو ما اعجبك الخطاب اللي كتبته
على الأقل برساله تعلميني وش صار معك
والا مهمتي اكتب بس ؟
ولا يحق لي اعرف شي؟
الله بس اللي يدري إني كنت اكتب وعقلي مع اخوي التعبان
وبنت خالي اللي سوت الحادث وقلت لك البنت بغيبوبه
وماكلفتي على خاطرك تقولين حتى سلامات أو إن شالله ماعليها الا العافيه
بس كان يهمك اسمها اللي ما ادري إلى الحين ليش سألتي عنه