عالم البنات النسائي كل ما يخص المرأة العربية من ازياء وجمال والحياة الزوجية والمطبخ
هذه محادثه صارت بين مشترية وبائعه بعد استلام المشتريه مشتريات لا تناسبها
المشتريه / السلام عليكم
البائعه / وعليكم السلام
المشتريه / عفوا اختي انا اللي اشتريت منك الملابس قبل يومين
البائعه / كويس وصلت
المشتريه / وصلت بس بصراحه صدمتني …اختي الملابس مو نظيفه ابدا ومقطعه من تحت وانت ما صورتي الاشياء هذه
البائعه / انتي اشتريتي مستعمل مو جديد كيف متوقعه يكون شكلها
المشتريه / انا مو اول مره اشتري مستعمل وعمري ما شفت مثل كذا هذي مستحيل تنلبس وانت المفروض ذكرت عيوبها ..
البائعه / انا اشوف الملابس ما فيها شي يعيبها هذي الحراير ما تبان فيها القطع اذا مشيتي ..وبعدين انت ما سالت وانا مو ملزمه اذكر عيوبها دام ما حددت سعر …
المشتريه / من جدك انت ؟؟ بنات كثير يذكروا العيوب وكمان يحددوا اسعار والمعروف اني اللي ما تذكر شي في الملابس معناها انه ما فيها شي بعدين معقول اهريتيهم في لبسه ولا ثنتين حسب كلامك ..
البائعه / ايوه فيه بنات يحددوا لك حتى الفص الطايح ما علي منهم انا بعت على العموم وانت اشتريتي وفيه كثير اشتروا مني ملابس حالتها اسوأ من اللي عندك وباغلى على 400 واكثر ما شكوا كلهم يكلموني ويشكروني ..وانت تعرفي الكعب كيف يقطع الملابس
المشتريه / انا عني ما اقدر البس هذي وبرجعها لك ورجعي المبلغ ..
البائعه / الفلوس صرفتهم وتراك شاريه مستعمل
المشتريه / حبيبتي مو اول مره اشتري وربي اشتريت مستعمل مثل الجديد … يعني 200 ريال تستاهل دعوه عليك باخر الليل
البائعه / لا ما تستاهل ..بس انت ما سالتي
المشتريه / خلاص حبيبتي بكيفك
البائعه / بين البائع والمشتري يفتح الله
المشتريه / بيني وبينك الله ..
فيه عدة نقاط تهم المشتريه في هذا المنتدى ..
1- لا تترددي في اي سؤال مو كل اللي هنا يخافوا الله
2- اطلبي صور من كل الجهات ..صور حديثه
3- ما عليك من اللي تكتب انا ما احلل اللي تسال وتعبني ومدري وشو …ترى الحين تصيرين الغلطانه اللي ما سالتي ..
4- والاريح لك انه تحرمي مثلي تشتري مستعمل الا من ثقه ..
وعدة نقاط تهم البائعه ..
1- مو لاننا نشتري مستعمل معناه نرضى باي شي ..
2- اكيد ما راح يردعك شي اذا ما ردعك خوفك من الله ..
3- ممكن تفكري ان اللي تسوينه من تسويف وخداع انه شطاره …لكن عند الله تجتمع الخصوم
4- اقدر افهم المخاطره بمقت الله اذا كان المبلغ كبير بس اذا كان صغير بصراحه ما افهم ..
وهذي روابط تهم الجميع ..
– أن تكون مواصفات السلعة وثمنها معلومة لدى المتابعين·
– وأن تبيَّن عيوب السلعة وثمنها ولا يحاول إخفاءها حتى تنتفي كل جهالة أو غموض أو غش في السلع وفي النقود، ويقدم المشتري على الشراء عن ثقة ويتجنب التخاصم·
قال صلى الله عليه وسلم: ”البيّعان بالخيار ما لم يتفرقا، فإن صدق البيعان بورك لهما في بيعهما، وإن كتما وكذبا فعسى أن يربحا ربحا ويمحقا بركة بيعهما” مسلم·
وقال صلى الله عليه وسلم: ”من باع عيبا لم يبيّنه، لم يزل في مقت الله ولم تزل الملائكة تلعنه” ابن ماجه
لعلمكم حتى في الصدقه لا يجوز تعطي الا مما ترضيه لنفسك فما بالك بالبيع ..
شروط الصدقة
إن لكل عمل شروطاً ولا يكون العمل مثمراً دونها، وشروط الصدقة هي:
1-أن تكون من حلال.
2- أن تكون عن اخلاص.
3-أن تكون من افضل الاشياء واحبها لصاحبها.
4- أن تكون من اوسط ما يستهلكه الشخص.
5- أن لا يتبعها منّ وأذى.
6- أن تكون سرّاً.
7- أن يبدأ بالاقرب, حيث روي عن رسول الله صلى الله عليه آله وسلم
قوله:لا صدقة وذو رحم محتاج…
وفي النهايه هذي صور للملابس اللي استلمتها امس 
ملاحظه اخيره …الموضوع ليس القصد منه التشهير لانه ما منه فايده بتغير معرفها ويا دار ما دخلك شر القصد منه نصح اللي مثلي تتعامل بصدق النيه ..
لان اكثر شي يقهرك انه تطلعي انت الغلطانه اولا لانك اشتريتي مستعمل فحسب مفهوم البائعه ( تحملي ما جاك )
وثانيا اك ما سالتي …فيه كثير اشتريت منهم الله يسعدهم صدق ونظافه وخوف من الله …بس تجربتي هذه فعلا كانت درس ..
ارجوا عدم الدعاء على البائعه هذا شي بيني وبينها عند الله
نهى الله تعالى عن الاعتداء في الدعاء بقوله : “ادْعُواْ رَبَّكُمْ تَضَرُّعاً وَخُفْيَةً إِنَّهُ لاَ يُحِبُّ الْمُعْتَدِينَ” وورد في الحديث : ” سيكون قوم يعتدون في الدعاء ” .
