حملة حماية المستهلك !!! موضوع مفيد للزبونات والتاجرات بإذن الله …تفضلوا

أخواتي الفراشات بعد ماقرأت موضوع الأخت أريج عن مشتريات الزباين واللي إستفادت منه وإلي إنغشت فيه ( أقصد جودة أو حجم المنتج اللي طلبته ) ، وغيره ، لاحظت كثير من الأخوات عيبوا على بعض البضاعه من ناحيه الجوده مثل الملابس و اللانجري والشنط ، ومن ناحيه الحجم مثل السلحفاه المضيئه وغيرها ، برضه شكاوي كثير من منتجات الإضاءه و بالأخص المفارش المضيئه الزوجيه ..

أنا كتبت هذا الموضوع علشان نفيد التاجره بمكسب الحلال ، و الزبونه بعدم غشها و إستغلالها ، و أنا هنا ماخصيت أحد من التاجرات علشان مايكون فيه إساءه لأحد .

بتقولون كيف يفيد التاجره ؟؟

ما أعتقد إن فيه تاجره تبغى تاخذ فلوس حرام من بيعها لبضاعتها مهما كان السبب ، فأنا أقترح من التاجرات الله يجزاهم خير أن يراعوا ويهتموا بالأتي :

1- التاجرات اللي يبيعون ملابس أيا كانت كبار ، صغار المهم يصدقون في نوعية المنتج بغض النظر عن سعره ، وياليت بدال مايعرضون صور الملابس الموجوده بكتالوج ، تصورها بجوالها أفضل ، وتقولنا نوع الجوال إلي إستخدمته في تصوير البضاعه ، لأن كل جوال يختلف تصويره ، بعضها تصور حلو وبعضها لا فهذي نقطه مهمه .

برضه لا تنسون إن الملابس الصينيه غالبا ماتجي مقاساتها مختلفه تماما عن مقاساتكم ، و إنتم عارفين ليش ، و أذكر فيه تاجره الله يجزاها خير ويرزقها الرزق الحلال وضحت هذا الشي بالتفصيل يعني وزن الزبونه وطولها ومقاسها علشان بضاعتها صينيه المقاسات تختلف وعلشان ماتغش الزبونات .

2- التاجرات اللي يبيعون اللانجري و التنكري ، صحيح المقاسات فري سايز في بعض المنتجات بس لاتنسون إن حتى الزبونات النحيفات مقاساتهم تختلف من وحده لوحده ، حتى و إن كانت ضعيفه مره لاتنسون بنية الهيكل ، فهذا شيء مهم تكونوا صادقين مع الزبونه وتكونون منتبهين من هالنقطه .

3- التاجرات اللي يبيعون الإضائات بكل أشكالها ، نعرف إنكم إجتهدتوا وشريتوا بالدرازن بس إنتي مسؤوله عن بضاعتك لازم تجربيها كلها مهما كان ماعدا البعض مثل العصا المضيئه ، بتقولون جايه في أكياس وجديده ما نبي نفتحها أقولك هذا مو عذر ، ولو الزبونه شرت من مكان ثاني كان تأكدت من جوده المنتج أو إشترطت على البائع إذا ما إشتغل معاها يبدلها بواحد ثاني أو تسترجع فلوسها ، فأرجوووووكم رجاء تنتبهوا لها النقطه .

4- التاجرات اللي يبيعون الرومنسيات و الأبجورات وألعاب الأطفال ، ياليت تكونوا صادقات في منتجاتكم ، مثلا كثير إشتكوا من السلحفاة المضيئه بعضهم قالوا صغيره وبعضهم قالو إنارتها ضعيفه !!
أرجع و أقول الله لا يهينكم ياتاجرات صوروا بضاعتكم بالجوال و إعرضوها وخلو الجوال مقياس ( يعني حطي السلحفاه أو أيا من البضاعه اللي موجوده عندك بجنب الجوال علشان نشوف حجمه ، أو علبه بيبسي أو شي يكون معروف عند العامه ، برضه صورو إنارتها في الضلام من عده إتجاهات علشان تشوفها الزبونه وتقرر ) ، ولك حرية الإختيار تعرضينها على العام أو الخاص بكيفك .

برضه قرأت شكاوي على الفراشه المضيئه وستار بيوتي وغيره ,

5- التاجرات اللي يبيعون زيوت الشعر ومنتجات التجميل و منتجات الخاصه بالبشره و الجسم ، هذولا أمانتهم بينهم وبين ربهم ، أو مثلا اللي تبيع زيت للشعر تسوي مثل تاجره الله يجزاها خير ويثيبها تبيع جزء من الزيت اللي يكفي يظهر النتيجه للزبونه بمبلغ معقول إذا ناسبها تشتري الكميه اللي تبغى ، وإذا ماناسبها خلاص توقف ( إعذروني ما أعرف إسم التاجره ) ، برضه ياليت اللي يبيعون مستحضرات للجسم و البشره ، ياليت تعطي الزبونه كميه اللي يكفي يظهر النتيجه وتشوف يناسبها أو لا ، وأنا متأكده اللي بيناسب الزبونه راح تشتري منه وبكميات كبيره ، يعني مافيه ضرر لأي طرف إن كان تاجره أو زبونه .

مستحضرات التجميل من كريمات أساس و كحل وغيره ، أنا ما ودي أقطع رزق أحد بس ما أظن فيه شي جديد وغريب كلها معروفه ، و اللي تحس إن فيه أشياء أرخص من برا حلو الله يوفقها تبيع وتترزق و لو إني ما شفت شي يشد إنتباهي يمكن إني أجهل بعض الأمور .

6- التاجرت اللي يبيعون الشنط و الأبواك ياليت تحطون مقياس لحجم الشنط مثلا ريموت التلفزيون ولو إن مقاسات الريموتات تختلف أو أي طريقه توضح للزبونه حجم المنتج .

7- باقي التاجرات اللي ماذكرت منتجاتهم هنا ، بيكون لعدم وجود شكاوي من الزبونات ، و أي زبونه عندها شكوى من بضاعه تاجره ياليت تكتب تجربتها وتقترح إقتراح ينفع الطرفين .

النقطه المهمه لكل تاجره تكون صادقه مع جوده المنتج و حجمه ونوعه ، علشان ما تضروا الزبونات .

نجي للزبونات كيف الموضوع يهمهم :

1- لا تشتري شي إلا و إنتي متأكده إنك محتاجه للمنتج اللي تبغيه أو متأكده من جودته او نوعيته ، ولا تحملي التاجره كل الخطأ ، إنتي إتفقي مع التاجره باللي يرضيك وينفع الطرفين .

2- أنا لا حظت كثير من الزبونات الله يجزاهم خير إذا عجبها شي تروح تشتري منه كميه سواء كثير أو قليل وهي جاهله للمنتج بالكامل معتمده على مدح التاجره وبعض الزبونات ، وتدفع ألاف علشان تشتري .

أنا أحط اللوم كله على الزبونه ليش ماتجرب منتج واحد من اللي طلبته وتشوف ناسبها أو لا ؟
بتقولون اللي تشتري أكثر يسوون لها خصم مدري إيش أقول هذا مو عذر ، محدضربك على إيدك تشتري ، وبعدين تعيبين على البضاعه و إن سعرها غالي أو أو أو ………… ؟؟!!

كل زبونه تجرب نوع من أي منتج سواء كانت ملابس لانجري إضاءه او أي شي هي مغامره وتجربه فلا تخسرين الكثير خلي خسارتك في حدود المعقول

3- تحاول كل زبونه تتفاوض مع التاجره بنوع وجودة المنتج ولا أقول السعر ، مثلا التاجره باعت على زبونه مفرش مضيء يكون هنا خيارين للتاجره و الزبونه ، وهو إن الزبونه تدفع عربون ويكون بمبلغ بسيط أو نصف المبلغ لحد ما تتأكد إن المفرش أضاء لها بنفس الجوده اللي ذكرتها التاجره أو تبدل التاجره المنتج للزبونه , أدري كثير من التاجرات بيعترضوا على الفكره بس اللي متأكده من منتجاتها راح تجرب هالطريقه .

في الأخير أتمنى إن الكل يفيد ويستفيد وهذا الموضوع قابل للنقاش وطرح أي رأي من أي طرف .

أتمنى عدم حذف الموضوع أو تجاهله من قبل الإداره ..