حماتي بلباس عاري امام زوجي ! ضاقت فيني الوسيعة

الحمد لله .. المنتديات وسعت علينا كثير , و وسعت صدورنا و حلت مشاكلنا

مابي اطول اكثر .. بس يا جماعة اني احس حالي مخنوقة من اول ما تم عقد الزواج و رحت شفت بيت عمي الوضع فيه مأساوي وقلبي عورني في احلى ليلة

عمتي + حميي + حمواتي

زوجي عنده اخ واحد و اختين .. الاخ مو متزوج .. و اخت متزوجة و اخت مو متزوجة و اهي اصغر مني بسنتين ..

و المشكلة كانت بدايتها من اول يوم .. من اول ما تم عقد الزواج لما وداني خطيبي حق بيتهم اشوفه
اخت زوجياللي متزوجة كان لابسة بجامة نوم فاضحة و عريانة وهي ماشاء الله عليها جميلة و بيضا بس السالفة مو سالفة غيرة او شي السالفة اني حسيت الموضوع غلط يعني بالمرة مو حلوة الوحدة تجلس امام خوانها جدي .. احنا بالبيت كنا متعودين على الحشمة و الستر

و ظليت طول الوقت افكر بالموضوع شلون وحدة تجلس جنب اخوها جدي؟ و بصراحة مر اسبوعين من العقد و اني مو متحملة اسكت اكثر ,, كل يوم ازور بيت عمي اجوفها و احوف اخته الثانية بلباس فاضح و احيانا يقعدون بس بقميص و انتو بكرامة يغطون حالهم من تحت ببفوطة 😐

و لما فاتحت خطيبي بالموضوع عصب علي شوي و قال هذولا خواتي و مستحيل افكر فيهم بهالطريقة القذرة اللي تتهميني فيها و مع هذا سكت و ما حبيت اسوي لي مشاكل واني ببداية حياتي

في حفلة خطوبتي كانت كل وحدة لابسة فستان فخم و فستان عرووس حتى في كثير من اللي حاضرين الحفلة و ما يعرفوني فكروا ان العروس دخلت و اهم تعمدوا ما يحضرون كلهم بنفس الوقت ..

و بالحفلة كانو يرقصون رقص مصري امام زوجي ولباسهم كان عاري شوي من فوق اكثر مني اني العروس و بصراحة كنت مو متحملة الوضع ابد حسيت حالي بموت من القهر .. شوي الا حماتي اللي اصغر مني بسنتين منادية بنت عمتها حق ترقص امام زوجي و لما جفتها حسيت ان ودي الارض تنشق و تبلعني .. يعني تخيلوا وحدة ترقص امام زوجكم و اهي بنت عمته ؟

و من هني بديت معاناتي .. من لحظة شفت انهم يبون يتحدوني في ليلة خطوبتي ..

كبرت السالفة مع مرور الوقت .. و الصراحة صارت خلافات كثيرة بيني و بين خطيبي , لان حماتي الاصغر كانت ترقص من تشوف خطيبي جاي , و ساعات تقول له شرايك في رقصي هو يجاملها و يمشي ..

و مرات تشتري لها بجايم نوم و تطق علينا باب الغرفة حتى توريهم وياه !

و الله صرت انقهر لين ادخل البيت و اجوفها قاعدة بذيك البجامة القصيرة الي توصل لنص الفخد
اني استحي و الله استحي ..

تخيلواا .. عمتي ما تتكلم لهم و لا تقول لهم شي ابد .. بس لين يجون ناس يزورونهم تزفهم و تقول لهم روحوا بدلوا شهالاثياب !!

اني كنت احسن الظن فيهم بس صار شي خلاني اعرف ان نيتهم غلط في غلط

حماتي المتزوجة زوجها دايم مسافر و تبات عندنا .. لان ماعندها اولاد

و اهي اللي تززودها باللبس …

مرة كانت رايحة الغرفة حق النشير للثياب تدور بجامتها حق تلبسها ..
و كنت مع حماتي الثانية بالغرفة الي جنبها .. و كنا نسمعها معصبة و اهي تدور عليها

حماتي تدرون شقالت ؟
قالت اني بقتها و رميتها بالزبالة .. لان بصراحة البجامة عارية و تمصخها بهاللبس !!

يعني حماتي واعية لكل شي تسويه .. و يعني اللي فهمته انها ما تبي اختها تلبس علشان يفضى لها الجو …

و مرة راوتني بجامة مررررة خلاعية تقول لي احب البسها في البيت لان اخوي يقول لي تصيرين صغييييييرة فيها و ياااااهل ..

و اني اعرف انها تجذب لانها تبي تستفزني

حماتي ما تحب تعرف راي خطيبي لا انما تحب تعرف راي اخوها الثاني

اهي كانت مرة ممكيجة حالها و لابسة قصير .. و اجت معصبة و كنت حزتها جالسة بالصالة اتابع الاخبار مع عمتي .. اشرت لي علشان اروح معاها غرفتها

و يوم سالتها شفيكي معصبة ؟ تقول لي اخوي و لا قال لي صايرة حلوة معني متعدلة بس حق اسمع رايه !!!

في اخت تتعدل و تلبس هالملابس حق تسمع راي اخوها؟

من يومها صرت اكره القعدة معاها .. لان تفكيرها قذر ..

و كنت مرة جالسة اسولف معاها عن فارس الاحلام تسوي لي امبي اتزوج واحد مثل اخوي في كل شي في كل شيء .. في طوله و في جسمممممممممممه

حسيت تقولها بنبرة مو طبيعية ..

و اوقات كثيرة تروح تقعد بغرفته بحجة انها تستخدم لابتوبه .. و تنتظره حتى لو تاخر و تستخدم لابتوبته و ساعات تكون منسدحة على السرير و اكيد عارفين شلون وضع الوحدة المنسدحة و اهي لابسة بجامة !!

اني كارهة حالي و اني عايشة بهالوضع ..

المشكلة ما وقفت عند اهني ..

حماتي المتزوجة اتضايق من لبسها اكثر شي
بس حماتي اللي مو متزوجة اتضايق منها بكلشي

اني ما امدح بحالي بس بشهادة الكل اني احلى من حماتي .. و هذا ما يعني اني حلوة لا .. بس لان حماتي كان جمالها اقل من عادي ..

الشي اللي كانت تستغله هو اني اسمن منها ..

و كانت تبي تستفزني باي طريقة و كانت حتى تحاول تلفت نظر خطيبي لهالموضوع !

يعني لين كنا نقعد مع بعض كانت تقول لخطيبي شوف شوف الفنانات بس شلون اجسامهم تهبل !
يعني كانت تبي تقهرني معني كنت احاول رغم سخافتها ما اغلط عليها و اتعامل معاها اوكي ..

و ظلت طول الوقت تستنقص مني و لين تجوف فيني حبة شباب طالعة تعور راسي
و لين تصيدها حساسية و اسالها شنو فيها على طول تعصب و تروح غرفتها تصيح ..

و اني من طيبيتي ما رديت على و لا شي كانت تستفزني فيه و تغلط علي فيه

المشكلة الثانية
اني عندي حمي ثاني بالبيت .. و علاقته قوية بخطيبي و بعد خطوبتي بخمسة شهور رجع لان كان مسافر عنده دراسة.

و كبرت المشكلة اكبر و اكبر و اكبر

صار خطيبي كلة معاه .. و اني ما كنت حاطة للموضوع اهمية كبيرة , لان قلت اخو ما جاف اخوه من مدة و من حقه بس السالفة كانت اكبر من جدي .. حميي ما اشترى له سيارة .. و صار يستخدم سيارة خطيبي .. كنت اقول ماعليه اخو لازم يساعد اخوه .. بس اهو احسه زودها .. صار خطيبي ما يقدر يمر علي كل يوم .. و لين مر و خذاني بيت عمي صرنا ما نقدر نطلع ..

اني انخطبت و كنت باخر سنة ثانوي .. و ساعات اظطر اقعد للساعة 2 ببيت عمي لان حميي يطلع بالسيارة و يرجع هالوقت .. بصراحة مر شهرين على الوضع هذا و سكت بعدين قلت له مايصير اخوك يتصرف جدي .. لازم يقدر .. و كان يقول لي هاي اخوي محتاج لي و ماراح اتخلى عنه

و تحملت سنة كاملة .. على هالوضع .. ما اطلع زين مع خطيبي .. ما استانس .. ما افرح .. ساعات تصير مناسبات ودي اروحها بس ماكو سيارة .. ربعي كثير منهم تزوجوا بس ما قدرت اروح اعراسهم ..

و قلت ماعلى كبري عقلج و لا تخسرين زوجج لهاي الامور

خطيبي تعدلت ظروفه و صارت احسن .. و اشترى له سيارة جديدة , و ما تصدقون شكثر فرحت , و قلت الحمد لله انحلت الازمة .. و قدرت اتنفس ..
قلت خلاص انفرجت ..

بس طلعت مشكلة اكبر

حميي صار يتصرف بحماقة .. تخيلوا يا فراشات يطلع في السيارة الجديدة يوميا تقريبا .. و صرت اساسا ما اشوفها و على طول نطلع بالسيارة القديمة .. اني حسيت بقهر .. بقهر مو طبيعي ..
يعني احنا خلينا له سيارة .. و بدل ما حميي يشتري له و يخلي لنا السيارة القديمة احنا تحركنا على الموضوع و اشترينا لنا .. و مع هذا صار ياخذ السيارة الجديدة و ما نشوفها ..

اللي يقهر ان وضع حميي ماديا افضل من وضع خطيبي بكثير.. و لو كان فعلا محتاج كنت انا قبل خطيبي اساعده و اوقف معاه و ما تضايقت و لا للحظة انه ياخذ سيارتنا ..

خطيبي كان يشتغل تبع مكاتب و في معاملات لازم يوصلها , و صار يتصل لخطيبي كل يوم تعال ود شغلي انت للمكتب الفلاني و تعال و تعال و تعال ..

و في الفترة الاخيرة صار يعطي رقمه لسكرتيرات علشان يتصلون فيه و بصراحة لما عرفت بالموضوع تهاوشت معاه هوشة كبيرة كانت بتوصل حتى للطلاق .. اني بصراحة وحدة غيورة و ما اقبل زوجي كل يوم يكلمونه بنات بحالة مو ضرورية و علشان اخوه

و لين بتكلم عن عمتي .. يبي ليي صفحات طويلة , عمتي كانت دايم تستصغرني و تعاملني كني ياهل و لين كنت اسوي العشا حق خطيبي تجي و تراقبني و تقول لي و اهي تضحك شوي شوي بتتعلمين
غير انها تراقبني متى اطلع و متى ادخل ..

الشي اللي مخلني امسك نفسي انها امه و مابي اسوي فتن بين ولد وامه لان هاي اصعب شي .. بس ساعات يا جماعة و الله تنرفزني ..

يعني تخيلوا تقول لي اتصدقين ولدي ماخلينا بنت الا و خليناه يقابله و كان يرفض و ما يعجبونه و يقول مو حلوين فاني مستغربة شلون قبل فيج !!!!!!!!!!!!!!!!!!!!!!

و كانت كلة تقط علي كلام على اني مبهدلة معني و الله اهتم بحالي زين و من النوع اللي يهمني المظهر الخارجي و اهتم لكشختي عدل .. و كانت كلة تقول لي روحي ترتبي و تكشخي و كنت استغرب من موقفها ليش تقول لي هالكلام و الحمد لله مافيني شي

اني تزوجت من عشرة اشهر تقريباً .. و صار خلافات قبل الزواج و مشكلة كبيرة و ما تكلمت من وقتها مع بيت عمي , المشكلة هي اني بس صرت ما اسلم عليهم ,, و حقرتهم لاني خلاص حسيت روحي بنفجر .. و من يوم الزواج للحين و اني ما اكلمهم

احنا ساكنين بشقة منفصلة عن بيت عمي و ما نقدر نطلع بشقة ايجار لان كل الشقق اسعارهم نار و لين طلعنا حياتنا بتتغير و مصروفي بيقل اكيد و شي طبيعي بيكون وضعنا اسوء من جدي

بس احس حالي مقهورة .. زوجي و الله مافي نفسه بهالدنيا يحبني و يموت فيني و مهما تهاوشت معه يجي يراضيني .. و يجي يبوس راسي .. و ما يقدر يستغنى عني .. بس مو متقبلة اهله للحين

اهله مو عاجبيني و بصراحة هم ما يشرفوني حتى ..

يوم عن يوم اشوف فيهم اشياء سيئة ..

اهم ما يصلون .. و ما يلبسون عباية , و لين لبسوا يتعمدون يلبسون قصير تحتها

الشعر كله طالع ,,,

و فوق هذا حياتهم نمطها ما تعجبني .. هم بعيدين عن الله ..

هم حياتهم رقص و اغاني ..

هم دايم يروحون المطاعم اللي تجي فيها رقاصة و مطرب و يرقصون مع الرقاصة برقص خفيف يعني يحركون اكتافهم شي جدي

و كلة يطلعون مع البر اختلاط و رقص و اغاني

يوم عن يوم اقول شنو العيلة اللي مناسبتها .. شنو الجو اللي اني اعيش فيه ؟
ناس ما تعرف الله .. ناس ما تدري يعني شنو دين

رقص و اغاني و صبيان و لعب و لهو ..

اني ما اشوف ان البنت المهم بس انها ما تزني ! لان الزنا مو بس بالفرج ..

البنت لازم تكون محتشمة و محترمة حالها .. و يهمني هالشي في عمات اولادي ..

ما اخبي عليكم ان زوجي يهاوشني لاني للحين ما اكلم امه , بس و الله ما اقدر اكلمها لانها سوت حركة بزواجي .. ما اجت سلمت علي بعرسي و لا كلمتني و سوت روحها ما تشوفني و من دخلنا الصالة صارت تحبب راس ابنها و تحضنه … و قريب تطلع من الحفلة كلمتها قلت لها سلمي عاد ..
الا تسوي لها سوري بنتي ما انتبهت لك ما شفتك ! و اهي تضحك

و من لحظة الحقارة هاي بصراحة حلفت ما اكلمها ..

اني اتعذب و احترق يوميا .. لاني اشوف المناكر .. زوجي يوميا يروح يسلم على امه , و اخته تتعمد تقعد بلباس فاضح و اهو على كلامه تعب من كثر ما يتكلم ..

و اني ساعات اتعب لين يوميا اتهاوش معاه على هالموضوع ..

اني كلمته و قلت له عقب ما اولد شنو عن اولادي ؟ اني ما ادري متى بطلع من الشقة و لا اعرف بمصيري .. و بصراحة مابي اولادي يقعدون معاهم

بس هو يهاوشني و يقول لي حرام اللي بتسوينه .. هاي قطيعة رحم .. و انتي تبين تقطعين اولادي من صلة رحمهم ..هذيلا عماتهم لازم يروحون لهم ..

ما ادري شنو اسوي .. طولت عليكم .. و ادري في ناااااااااااااس كثير بتخطر اسطر و يمكن تقرا بس بالنهاية .. بس صدقوني احس براحة اني كتبت لكم ..