عالم البنات النسائي كل ما يخص المرأة العربية من ازياء وجمال والحياة الزوجية والمطبخ
شوي شوي <العضوات متزاحمات عن الباب
بالدور بالدور
يابنات شوي شوي
يالله حيهن
اسفرت وانورت<تصب القهوه
يالله انك تحيي عضوات الفراشه كلن باسمه
وش اخباركم وش علومكم
عساكم مرتاحيين
الا على طاري
هاللحين يوم كل موضوع بوه كيف حالكم وعساكم مرتاحات تهقون سؤال صدقي ولا بس تميلح
ولا بس مقدمه << يعني موضوعه مابوه ابدا
ايه يالحال ,.,؟<<حزنت
هاللحين الهموم وش كثره
كلن عنده همه حتى البزر
صار عنده هم
تدرون وش همه هالمسكين
بزر ماطلع على الدنيا عنده هم
همه ولد خالته عنده أي بود وهو لا<<تضحك بسخريه
امحق هم بس
تبون الصدق اشوف حالنا واضحك مادري اصيح <<اختلطت عليه المشاعر من عقب هم البزر
والله مشكلتنا حنا نجيب الهم لانفسنا
ياحليل امهاتنا بس,.
تسافيه الدنيا وراه
تركض وراه ابوهم وعسى بعد يرضي عليه
وكل يومه بالمطبخ
وتلاحق هالبزارين
وحالهن يعلم بوه الله
وماشكن من الهم
تدرون ليش كثرت همومنا
لاننا خلينا الدنيا همنا وليته بشي ينفع
لاوالله
وحده همه تصبغ شعره
والثانيه وش تشري نوع جهاز لاب توب
والثالثه همه تبي وقت تفتح النت
بالله عليكم هذي هموم
والله هالايام انقهرت تدرون ليش..
لاني كانت مهمومه من الفراغ
وهالايام همي مضغوطه ماعندي وقت فراغ
يعني تحسون حنا نجيب هالهموم لانفسنا
ونشقي ارواحنا بشي تافه
ونقول هم..
بكل الاحوال هم.. هم ..هم
وش هالهم اللي عجزنا نخلص منه
كلها توافه ماتستاهل حتى نفكر فيها
لو كل وحده مننا تذكر ربه وتهتم بـ صلاته واذكاره
واذا ضاقت به الدنيا تذكر ربه وتصلي والله ماندل طريق الهم
بس حنا للاسف صرنا عكس
يعني اذا انهمينا فتحنا النت
واذا طفشنا فتحنا النت
والمشكله ليتها تريح الا يزود همك هم ليش ضيعتي وقتك
والله يابنات وياصبايا<على بالها فيه فرق
لو نراجع انفسنا شوي ونفكر ونخلي عن الهموم اللي مهب هموم مجرد خرابيط نتمسك فيها وننحزن عليها
وتروح الدقايق والساعات والايام وحنا ماسكين كلمة هم
والله نرتاح
وفيه نوع ثاني من الهموم غير الاول
والادهى والامر
وهي صفه او عاده بالناس
تلقون الوحده تطلع وتستانس وتسولف
وتفلها وباخر الوقت اتناقر هي وحده من الموجودات بس كم كلمه
خلاص ….
تحط خطوط ونقوط وشخوط وكل ابو شي
هاللحين تنسى كل الوناسه وتحزن
وتقول ماستانسنا وما أدري ايش
يعني بالعباره الصريحه شخصيه متشائمه
بدال ماتشكر ربه وتحمده على النعمه
تهتم بشي تافه
وتقعد ادقق على اتفه الامور
ياختي ماتسوى
اجل ليش تطلعين خلتس بـ بيتس ابرك لتس من تشائمتس اللي يحوم التسبد<<انقهرت
ولا تجي الثانيه عاد
طالعه لم السوق وتودج بوه لها خمس طعش ساعه<<مبالغه خمس طعش
همن تلقى كل شي الا شباصه مالقت
خلاص يقلب المزاج وتبي تروح باتسر اليوم مالقت اغراضه
وجع يشيل العدو<<طنقرت
وش هالحياة معه ذي
تهقون نربطه ابـ بيته ازين له
والله ماتسوى عليه اطلعت ولا ماطلعت كله واحد
الامور اابسط من تسذا
تبي رواقه
تبي تفكير عاقل
تبي عقل موزون
كل وحده بيده بعد الله
تغير حياته
والله لو كل يومها سب وهواش يكفيها اذا شافت واحد من بزارينه ولا من امه ابتسامه
تقدر بتفكيره تكون مبسوطه
وتكون اسعد وحده
الـهم شي حسي مانشوفه بس يذبح وبدون دم ولا سلاح
نبي تفائل
نبي تفكير ايجابي
نبي نسوي من الا شي شي
نبي حياة بسيطه وسهله
ابي كل وحده تراجع نفسه وتصرفاته
وقبلكم انا
نبي نعيش الحياة بزينها وشينها ونهتم بالزين بس.؟
ابي كل وحده ادخلت موضوعي وقرته زين تطلع وابتسامه على وجه
ابي من هاللحظه تقلب كل شي سلبي ايجابي
نبي بساطه تفاهم حب تسامح
ملينا من اننا نصنع الهم ونعيش باالظلماء والنور قدامنا
والامل سهل والحياه بسيطه
والموضوع يبي حماس
وفراشه تبي ردود توسع الصدر
واسمعوا من هاللحين
تراي قلت لكم
ياويل وحده تكتب رد مجامله
ابي ردود تطلع من قلب
ماني محتاجه كلمه شكرا او موضوع رائع
يا شي زين ولا بلاش <<تتشرط
الموضوع بـ اللهجه القصيميه اللي تبي ترجمه تسدح الكلمه
