عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم :
ازيكم يا أحلى فراشات ..
بصوا دي تجربة شخصية بقالها 4 سنيين , وعمري ما شتريت مزيل عرق أبدا ولا إحتجت له أبدا أبدا بفضل الله ..
طول عمري بخاف من كل مزيلات العرق , مش بس عشان سواد منطقه تحت الإبط ,,,, لا كمان عشان حكاية حبس العرق في الجسم وتشجيع الخلايا السرطانية في المكان الحساس ده وانا متعقدة من الموضوع ده صراحة ربنا يعافينا ويعافي المسلمات كلهم يا رب ……
عشان كده كنت بستخدم الأول بودرة شبة من عند أي عطار ….. و فعلا مكنشي عمري بحس بريحة عرق بس إبتدى يظهر سواد بسيط ضايقني أوي …
رحت لدكتورة أمراض جلدية رااائعة عشان أشيل السواد ده و سألتها عن بديل لبودرة الشبة فقالتلي ان الشبه فكرة هايلة فعلا لأنها مش بتمنع العرق انه يطلع لكن بيطلع من غير ريحة خالص بس المشكلة إن بودرة الشبه من عند أي عطار بتكون مضاف لها إضافات و مش نقيه وكمان مع الرطوبة في منطقة تحت الابط بتسبب سواد لكن الأفضل لو إننا إحنا اللي نعمل المستحضر بنفسنا في البيت
المكونات :
1- حجر شب
و ده موجود عند كوووووووووول العطارين في الدنيا , و انا صورتو كمان
2- ماء ورد
وده برضو عند كل العطارين
3- أي عطر طبيعييييي
زي المسك , الياسمين , العنبر , انتي وذوقك بس أهم حاجة يكون عطر طبيعي مفيهوش أي كحول و ده بيكون عند اللي بيصنعوا الروايح في الأزهر وغيره وفي السعودية طبعا عند عبد الصمد القرشي
الطريقة :
مفيش أسهل منها , نجيب حجر الشب و نكسره قطع صغيرة أقل من حجم العقله الواحدة ونضعه في ماء ورد ,, ونسيبه طووووووووووووووول الليل لحد ما يدوب في ميه الورد ( هاتي أي رول أن قديم فاضي عندك( يعني أي علبه مزيل عرق قديمة بس تكون البليه بتاعت العلبة بتتفك و تتركب زي الصورة كده )
بس يا ستي حطي المزيج في علبة الرول اون الفاضية و عليها نقطة من العطر الطبيعي اللي تحبية
و تستخدميه بدل مزيل العرق , طبعا ماء الورد بيلطف و ينظف منطقة تحت الابط باستمرار و الشبة بتمنع رائحة العرق و العطر بيديكي ريحة حلووة و بعد ما تستخدمية تمسحي المنطقه بقطنة أو منديل عشان لازم تكون ديما جافة عشان متسودش
و الله يا بنات انا بقالي اربع سنين بستخدمها وماشية معايا زي الفل و أتمنى إنها تفيدكم ياااا رب
