حصرى لعشاق البلاك فورست **مميز **

يالا نبدأ

اولا مقادير الكيكة الاسبونج

1.5 كوب دقيق – 1/2 كوب كاكاو بودر _ 3/4 كوب سكر – 8 بيضات
معلقة كبيرة بيكنج بودر – 1/2 معلقة صغيرة فانيليا
ودى المكونات اللى استخدمناها فى الكيكة

الطريقة
هنخلط البيض والسكر والفانيليا فى الميكسر او المضرب الكهربائى لمدة تلت ساعة متواصلة
وده شكله بعد ما ضربنا كويس ( علقة سخنة

نحط الكاكاو على الدقيق والبيكنج بودر ونقلبهم كويس بالشكل ده

وبعدين نحط الدقيق والكاكاو والبيكنج بودر على البيض المخفوق بالتدريج ونقلب من تحت لفوق عشان ماتهبطش ونقلب كويس لغاية مايتجانس ( سورى نسيت اصور الخطوة دى)

وبعدين نجيب صنية وندهنها سمنة او زيت ونبطنها بالدقيق ونصب الخليط فى الصينية
ثم نضع الصينية فى الفرن على درجة حرارة متوسطة لمدة نص ساعة
ملحوظة يجب تشغيل الفرن قبل وضع الصينية بنص ساعة

وده شكل الصينية لما طلعت

نسيبها تبرد

التزيين
المكونات كريز احمر معلب – كنبوت خوخ -كريم شانتيه – شيكولاتة خام مبشورة
ودى المكونات اللى استخدمتها انا جيبت الكريمة المخفوقة جاهزة

خطوات التزيين

هنجيب لكيكة بعد ما بردت ونقسمها نصين ونسقي النص الاول بالسيرب بتاع الكريز والكمبوت
وبعدين نحط الكريمة المخفوقة ونحط فوق الكريمة كنبوت الخوخ بالشكل ده

وبعدين نجيب النص اللى فوق ونسقيه برضو بالسيرب ونحطه فوق النص التانى (انا اسفة مالحقتش اصور الخطوات دى لانى كنت بعمل البط والكسكسى بتاع حنون كمان وحلا واقفة جنبى بتزن )
المهم بعد ما حطينا النص التانى هندهن الكيكة كله بالكريمة الوجه والجناب هنغطيها تمام
وبعدين هنرش الشيكولاتة المبشورة على الوجه والاجناب بالشكل ده

هنحطها فى التلاجة شوية حوالى ربع ساعة تجمد
وبعدين نطلعها ونبتدى نعمل عليها وردات بالكريمة ونحط على كل وردة كريزة بالشكل ده

وكان عندى ديكور وردات بلاستيك محتفظة بيهم من تورتاية عيد ميلاد حلا دى شكلها

جبتهم وسيحت شكولاتة فى الميكروويف و حطيتها على كل الوردات
وحطيتها فى الفريزر تجمد بالشكل ده

وبعدين زينت بيها التورتة كده وده شكلها النهائى

يارب تعجبكو
ملحوظة التزين ممكن يتعمل بكذا طريقة يعنى مش شرط الحشو يكون زى ما انا عملاه هو المفروض الحشو يكون كريز برضو بس انا قولت تغيير