عالم البنات النسائي كل ما يخص المرأة العربية من ازياء وجمال والحياة الزوجية والمطبخ
خواتي الفراشات متضايقه وتعبانه وحاسه الدنيا مقفله في وجهي مني عارفه كيف اتصرف ولا فين اروح اكتب وانا دموعي على خدي مومتخيله لحد فين ممكن يكون ظلم البشر استغرب انو في ناس تظلم وتنام مرتاحه وهي عارفه انو في مظلومين يدعو عليهم في كل وقت استغرب كيف انو في ناس يغترو بقوتهم ونفوذهم ويتناسون ان قوة الله سبحانه وتعالى فوق كل شي. انا بكتب لكم مشكلتي وانا ادري انو مافي احد يقدر يحلها الا مالك الملك بس محتاجه افضفض واتكلم يمكن ارتاح خصوصا وانو من يوم ماصار اللي صار وانا كاتمه في قلبي وساكته بس احس اني خلاص موقادره وصلت حدي.مشكلتي يابنات ماحدا يمكن يصدقها لانها تشبه قصص الافلام وممكن تقولوا ومومعقوله هذا كله يصير هنا في وفي السعوديه بس وربي اني صادقه في كل كلمه اقولها اسفه اني طولت عليكم وراح اقولكم قصتي واللي بدأت بعد زواجي بكم اسبوع.انا تزوجت صارلي سنه وشهرين وبعد كم اسبوع من زواجي اتصل ولد عم زوجي وقال لزوجي انو متهم في قضيه ومطلوب لتحقيق وهنا كانت الصدمه زوجي انسان محترم ومن عيله محترمه وماعمرو دخل في حياته قسم شرطه زوجي ماصدق الكلام وقالو انا ماعمري سويت مشاكل لاحد وحاول يعرف ايش نوع القضيه بس ولد عمه قال انو ماعندو تفاصيل وانو وصل لهذي المعلومه عن طريق عمله (ولد عمه يشتغل في المباحث) وبعد استفسارات واتصالات من ولد عمه عرفنا انو القضيه بخصوص عمل زوجي ماتتيخيلو يابنات كيف كانت نفسياتنا هم ونكد وماحسينا بطعم الفرحه وقتها كنا مسافرين شهر عسل والغريب انو سافرنا عادي مع انو قالو ان زوجي معمم
عليه يعني صادر تعميم عليه انومطلوب هذا الشي الاغرب لانو قالي لوكنت مطلوب كانو منعوني من السفر المهم انو رجعنا وكان زوجي متواصل مع ولدعمه عشان يقوله الاخبار اول باول وكان اخرها انواتضح ان زوجي مالو علاقه في القضيه لان صاحب القضيه الحقيقي اعترف وزوجي مجرد شاهد لاكثر ولا اقل مع ان زوجي مالو اي علاقه وماعندو اي فكره عن القضيه المهم انو راح عشان يشوف الموضوع بس راح ومارجع جلسنا شهر ونص ومافي اي معلومات عنو تخيلو شهر ونص واحنا مو عارفين هوا فين وحتى ميت اوحي كانت اصعب فتره في حياتي ماقدر اوصف وضعي وحالتي النفسيه خصوصا وانا عروس ماكملت شهر كنت في هالفتره في بيت اهل زوجي لان اهلي في منطقه ثانيه وبيعدين عني وانا ماحبيت ارجع عشان كلام الناس والكلام اللي راح ينقال عني وانتو عارفين بس انا تحملت الغربه ولوحده والخوف مرت علي ايام ماكنت اقدر انام لاني كنت اتخيله في كل مكان استمرينا ع مالحال شهرين وانا واهلو في حاله مايعلم فيها الله امه ياقلبي عليها جاها السكر من كثر الحزن والبكاءوبعد الشهرين عرفنا انو موجود في المباحث لاداريه وطبعا انواع التعذيب والضرب والاهانات والانتهاك لحقوق الانسان وبعدها راح عمي يشوفه بس منعوه وبعد الواسطات سمحوله يشوفه ولما رجع عمي من عندو رجع منهار من الحاله اللي هو فيها قال انو كانت ملابسه مقطعه كانو شحاد واثار الضرب واضحه على وجهه وحالته تقطع القلب طبعا زوجي ماثبت عليه اي شي بس بقدرة قادر صارت كل التهم عليه وبدل ماكان شاهد صار هو المتهم الرئيسي في القضيه ماكنت اتخيل انو عندنا فساد وظلم لها الدرجه وان الواحد ممكن تلبسو تهمه هو بريء منها لمجرد انو رفض يدفع رشوه طبعا بعد زيارة عمي لزوجي ارسل المسؤل هناك واحد من طرفه لعمي وطلب انو يدفع له 100الف ويطلعوا من القضيه زي الشعره من العجين بس عمي رفض لانو واثق من براءة زوجي ولان كل الاوراق والمستندات وحتى الشهود اثبتو انومالو علاقه بالقضيه وان الوقت اللي صارت فيه القضيه كان زوجي في مهمة عمل رسميه وفيه اثباتت بس كلها ماجابت نتيجه واستمر مسلسل التعذيب لدرجة انو نفس المسئول قال لزوجي ابوك موظف كبيرفي شركة بترول وعندو فلوس يقدر يطلعك اذا تبغى تطلع قولوا يدفع بس زوجي رفض بعدها اجبروه على الاعتراف وارسلوه للمحكمه ثلاث مرات عشان يصدق قواله بس هو كان يرفض ويقول للشيخ في المحكمه انو اجبر على الاعتراف والشيخ كان يرجعوه لهم وفي كل مره يرجع من المحكمه يكون التعذيب اقوى لدرجة انهم قالو له مالك الا حل من ثلاثه اما تعترف او تتجنن او تموت وغير كذا مافي والانو تعب انجبر انو يعترف لان السجن بالنسبه له ارحم من العذاب اللي هو فيه..معليش مو قادره اكمل حاسه اني مخنوقه وان شالله اكمل لكم لاني عن جد محتاجه احد يخفف عني ولان الباقي اصعب من اللي راح
انتظروني ولا تبخلو علي بنصايحكم
كملت لكم باقي القصه وياريت كل وحده تقراها تدعي لي لاني عنجد تعبانه نفسيا
