حدث فعلا .. فعلا .. اليوم

سلام عليكم يابنات

اتمنى تكونوا بخير وفى احسن حال

حدث اليوم حادث جامد شويه عندنا ح احكى لكم علشان تشوفوا التقدم والمستوى العالى من

الخدمة فى الخارج خاصة ان هذا الحادث مسيطر عليه ويارب مايحصل لاحد

اختى الحبيبة اصغر منى فى العمر وتعمل دكتورة فى لوس انجلوس

الساعة 7 صباحا

كانت فى طريقها للعياده تحدثنى تليفونيا فى الصباح الباكر – وفجأه اثناء المكالمة سمعت

صوت ازيز وخبطه جامده وقالت لى بسرعة وخوووف

استنى استنى خليكى معايا انتظرت شوية وانا سامعه اصوات الخبط – راحت قالت لى اناعملت

حادثة جامده قوى قوى – قلت انتى كويسه .. قالت اه انا كويسة وصوتها رعشة رهيبة …وقالت

مع السلامة البوليس حواليه والاسعاف سلام سلام – قفلنا التليفون ………..

يارب اعمل ايه انا دلوقتى .. اتصلت بجوزها .. ياربى .. مش بيرد مرة والتانية ومافيش فايده …..

وانا وجوزى اعصابنا راحت مش عارفه اقولكم كنا ازاى والله ما طايقه لاسما ولا ارض ………

فترة عدت واخيرا رد جوزها وقالى طيب طيب — بعد فترة كلمنى جوزها قالى ماتقلقيش هى بخير

واهى قدامى فى عربيتها بس مش ح تقدر تكلمك لانها قافله الموبايل علشان مركزه فى السواقه

و انا رايح معاها واوديها الشغل

واطمنى خالص بس العربية متبهدله لكن هى كويسه – فقلت له – ليه حتروح الشغل تروح البيت

قالى الشغل اقرب وهى اللى مصرة تروح علشان المرضى بيستنوها

قلت له معاها حد من الولاد ؟؟ قالى لا كانت لسه مودياهم المدرسة قلت طيب سلام …..

شويه كده راحت مكلمانى بتهيالى عايزه اخش جوه التليفون وابوس فيها قلت طمنينى حبيبتى

قالت انا كويسه واطمنى انا وصلت وداخلة العيادة قلت ربنا معاكى وربنا يحماكى وقفلنا

طبعا طالما هى فى العياده مافيش اتصال لكن كلمت جوزها قالى مريت عليها وكويسه

الساعة 6 مساء

كلمتنى بعد انتهاء الشغل وحكت لى اللى حصل بالتفصيل ودموعى على خدى

اسمعووووا ….

الدنيا بتمطر مطر رهيب وهى بتسوق كان فيه مطب مع الميه والمطر راحت العربية لفت حوالين

نفسها وراحت خبطت فى سور من الكتل الخرسانية والموجود كفاصل بين العربيات اللى جايه

واللى رايحه – هى دلوقتى على الفرى واى (الطريق السريع) والعربيات ماشيه بسرعة مش

لاحقه تقف بقت العربيات تخبط فيها يعنى الاصوات اللى كنت باسمعها

كان صوت العربيات اللى بتخبطها

هنا – ده اللى عايزاكم تسمعوه وتشوفوا اهتمامهم بالحلول فى ظروف الحوادث

بتقول جه البوليس والمطافى والاسعاف كلهم حواليه – جه واحد من بتوع الاسعاف وقالها

انتى كويسه ؟؟ طب بصى وراكى وقدامك بتقول بصيت لقيت الشارع فاضى خالص عايزنى اطمن –

الشارع بيستوعب 6 عربيات رايح و6 عربيات جاى الخط اللى هى فيه موقفنيه خالص -قالى جربى

تقدرى تسوقى بتقول حسيت بالثقة ومشيت و4 عربيات بيحرسونى واحده يمين وواحده شمال

وواحده ورايا وواحده قدامى وركنا فى مكان وقالى انزلى واطمنى على عربيتك

وجه جوزها وراحت الشغل زى ماقلت لكم

اسمعوا اللى حصل وهى فى الشغل

شركة التامين ارسلت ليها عربية من عندهم تستعملها و اخذوا عربيتها يصلحوها

على ان تظل عربيتهم معاها لحين الانتهاء من التصليح

كان يوم عصيب