حبــــــــــــوب الفايتكس الي تدور عليـــهم حصلتهم اخيــــــــــــــــــــــــــــرا

اليوم اكتب لكم هالموضوع للسببين

الاول عشانكم
والثاني عشاني

ببدأ فيكم

انا كنت ادور واحوس في كل مكان عشان حبوب الفايتكس الي طايحين فيها

طبعا هي من اعشاب طبيعيه ولها فوائد كثيره الي حابه تقراء عنها تكتب في قوقل الاسم ويطلع لها كل شي

دورت عندنا بالسعوديه قالو انها عند محلات ارمال جي ان اس

ارسلت زوجي لكذا محل قالو مخلصين من فتره واطلبو من الشركه ولسى ماجاء شي
طبعا اخذت ارقامهم واتصلت على الفرع الرئيسي لهم وعلى كم فرع بالرياض وكلهم نفس الكلام

قلت مالي الا اطلب بالنت وانا ابحث حصلت وحده جزاها الله خير كاتبه انها حصلتهم من يشهر رمضان 1432هالسنه
بمحل فالامارات

طبعا كنا ناوين نروح بعد كم يوم قلت خلاص بروح ادورهم هناك واذا ماحصلت بطلبهم
المهم رحنا وحصلتهم الحمدلله لاكن اغلى بكثير من عندنا

سئلته لبش اغلى
قال انا ابيع خلاصة النبته (العشبه اسمها نبتة العفه )
وهناك يبيعونها لكم بعد التجفيف
وانا اجيبهم دايركت على طول من امريكا ولا لي اي فرع ثاني داخل الامارات ولا خارج الامارات
وبدى يشرح لي شكله فاهم صراحه طلع لي كتاب كبير كله انقلش وفيه رسمه لنبته فيه كل شي عنها
وبدى يشرح لي
المهم انا جيت هنا حابه افيدكم اكيد فيه احد هنا يدرها مثلي

عموما انا سالته هل عندك مندوب قال انوعنده صديق له يروح ويجي دائما من السعوديه لدبي قلت اذا جابه اطلب منك مره ثانيه قال اوكي وعطاني رقمه وقال هو يوصلكم الي تبونه

اولا
سعرهم بالمحل 120 درهم يعني 120 ريالسعودي ما ادري كم يوصلونه لسعوديه
يكفي حق شهرين اذا كل يوم حبه

يستعمل للي عندهم تكيس مبايض
للي عندهم الغده الدرقيه
للي يبون حمل تؤم (كل شي بيد الله )
للي عندهم اضطراب بالدوره سوا تكون مدتها طويله او مدتها قصيره
وفيه دواعي للاستعمال كثير ابحثو عنه في قوقل واقراء

تاريخ اليوم لاني بجد انقهر اقرء موضوع واتحمس والقى التاريخ قديم من كم سنه

اليوم الاثنين 6-11-1432هـ
الموافق 3-10-2011مـ

المحل اسمه الغذاء الملكي محل(لطب البديل والحجامه) كله اشياء طبيعيه
في الشارقه شارع المصلى بجوار المروج للانتاج الفني
الي توصل لشارع المصلى تسال عن دوار الساعه تلاقي المحل مقابل المستشفى المركزي الخاص

بنات انتبوه فيه شارع المصلى بدبي وفيه شارع المصلى بالشارقه لاتلخبطون بينهم

بنات الله يخليكم هو صح اعشاب طبيعيه وحتى الحبوب تشوفين لونها اخضر وريحتها اعشاب بس اسئلو الدكتوره قبل الاستعمال اخاف مايناسب اي وحده

انا معي تكيس بسيط ع الجهه اليسرى واخذته عشان التكيس
قالي قوته 1000 خوذي حبتين صباحا وحبتين مساء

قلت ببدى فيه لما ارجع السعوديه وقبل اسبوع رجعت وتاخرت الدوره وحللت وماشاء الله لاقوة الا بالله طلعت حامل ولا استخدمته عطيته اختي تبي تجربه

المهم الحين كتبت لكم كل شي عنه عشان افيدكم هذا الشي الاول عشانكم

الشي الثاني الي عشاني
ابي دعوه صادقه من القلب بظهر الغيب لعل منكم من تكون دعوتها مستجابه

ابي منكم دعوه لي ولاختي ان الله يرزقنا تؤم اولاد و يثبت حملنا
ويرزقني ويكون فبطني تؤم اولاد كاملين الخلق والخلقه من غير زياده ولانقصان
ويسهل ربي حملهم وولادتهم ويطلعون شبهي (شبه امهم) ويصيرون أأمه لمساجد الله
ويسخر لي وقت الولاده ناس طيبين من عباده الصالحين
ويبعد عني العين ويحفظ لي اولادي جميعهم ويرزقني برهم وتسخر لي زوجي وتحفظ لي امي وابوي واهلي وجميع من يعز علي من كل شي ويطول ربي باعمارهم بصحه وعافيه