عالم البنات النسائي كل ما يخص المرأة العربية من ازياء وجمال والحياة الزوجية والمطبخ
من زمان و انا واحشني التورلي … بس كنت بطلت اعمله من ساعت ما عرفت ان اولادي عندهم انيميا الفول و بالتالي ممنوعين من البسلة و الفاصوليا و الحجات دي كلها .. يعني مفيش تورلي حيتعمل ببطاطس و جزر و وكوسة بس ….
بس ربنا يخللي هموسة يا رب بمواضيعها عن الخضار المشكل خلتني اعمل تورلي حلو اوي من غير بسلة و لا فاصوليا … ببطاطس و كوسة و قرنبيط و بتنجان و فلفل رومي و جزر 😆 🙄
بجد طلع حلو اوي ما شاء الله … تسلميلي حبيبتي يا رب ❗
الطبق نفسة سهل أوي أوي ..
في البداية دبلت بصلتين على النار مع شوية توم …و بعد كده نزلت عليهم باللحمة شوحتها شوية عشان يكون طعمها حلو و بعدين نزلت بعصير الطماطم و الصلصة و سبتها في الأول تغلي شوية عشان اللحمة هنا بتتأخر في السوا
في الوقت اللي اللحمة فيه بتستوي على النار .. كنت بوضب الخضار بعد غسله .. يعني تقطيع البطاطس م و البتنجات و االكوسة و الفلفل و القرنبيط …
بعد ما اللحمة بقت نص سوا … نزلت الخضار و خلتها تاخد شوية على النار عشان بعد كده متاخدشي وقت كتير في الفرن …
بااااس بعد كده حطتها في الطاجن أو البرام و في الفرن
و ده شكلها النهائي و عملت جنبها رز ..و كان طعمه فعلا جميل اوي اوي الحمد لله
يا رب يعجبكم 😛
