عالم البنات النسائي كل ما يخص المرأة العربية من ازياء وجمال والحياة الزوجية والمطبخ
بسم الله الرحمن الرحيم
السلام عليكم ورحمة الله وبركاته
مسائكم كله فرح ووناسه
نعيش انا وانتم مع ساره وخالد هولاء معاريس جدد سافرو وخلصوا شهر العسل وانبسطو وفرفشوا,ومافيه مكان ماراحو له في مملكتنا وخارجها
المهم رجعوا لعش الزوجيه والسعاده ترفرف في قلوبهم الله يديمها عليهم وعليكم قولو آمين
كانت ساره متصله على امها قبل بيوم وقايله رتبوا بيتي انا راجعه بكرى
عاد خبركم الوالده ماتقصر ودها تنومس بنتها عند زوجها رتبت البيت وبخرته وضبطت القهوه والعشاء وطلعت تبيهم يرتاحون مع العلم ان قلبها يخفق على بنتها
لكن ش تسوي لازم تسوي نفسها نشميه عند زوج ابنتها
المهم وصلو للبيت وتعشو وارتاحو
قالت ساره وهي مسويه نفسها ربة بيت ترى نبي خضره ولحم بكرى , قال خالد: ايه اكيد ابي اكل من يدك مليت من المطاعم
خالد حط راسه على الوساده يارب وش الحيله الفلوس وقضت بالسفره وش بسوي ؟
ايه مالي الابكرى اروح لامي تعطين اتقضى للبيت وماهي مقصره وعساها ماتقول لابوي اخاف يقول وين افلوسك ؟
ساره تفكر يارب وش اسوي له غدا ياويلي ان جاب شي مااعرف له <<<اصلا مافيه شئ تعرفين له
راح خالدلامه وفرحت الام بقدوم ابنها وانه جاء من الصبح وماكانت تدي وش يبي
المهم سلم عليها وقالها : انا ابي فلوس البيت تبي مقاضي وانا مفلس
يوووه ياخالد هذه عوايدك (ماتقيس قبل ماتغيص)
يالله دووووك
الله يجزاك الجنه يمه لايدري ابوي >>>هذا اكبر همه
ذهب للخضره واشترى شي يحتاجونه وشي مايحتاجونه
مسوي نفسه كريم على حساب امه
راح للملحمه يشتري لحم جلس ساعه يفكر وشو اللحم الزين والطيب ايه اتذكر ابوي يقول الرقبه بس ماادري هي احسن شي ولا انها اردئ شي بالحم ياربييييه
ايه اتصل على ابوي واسئله احسن
الو هلا ابوي كيف حالك ؟ مسوي روحه رجال انا عند الملحمه وش رائيك اي اللحم افضل
قال ابوه شف الي انت تفضل تبي ضلوع قله ضلوع تبي فخذ قله وانا وش عرفني برغبتك
عاد سوى نفسه ذكي قال لصاحب الملحمه عطني من الفخذ والضلوع
اشتراهن ورجع لحبيبة قلبه يلهث تعبان اكيد تعبان أول مره في حياته يتقضى
وقف عندالباب وأشر لهندي تعال ! شيل اغراض فوق
وطبعا الهندي شال الاغراض مره وحده على ظهره مع انه أصغر منه جسم
المهم دخل ياولد ياولد زين ماقال هيش, مثقف شوي
خوذو الاغراض
اخذت ساره الاغراض وقالت الله يخليك يالغالي مسويه مثل امها
المهم قال خالد :انا بنام واذا جهز الغدا صحيني
نام وسكرت الباب عليه وراحت جري تتصل على امها
يمه كيف اطبخ اللحمه وكم تبي على النار
قالت لها امها على حسب ان كانت كبيره تبي طبخ زياده واذا صغيره تبي نص ساعه
طيب يمه وش عرفني كبيره ولاصغيره
وشرائيك ترسلين السواق ارسلها لك تطبخيها وترسلينها
لالاعيب ياسوير ترى يضحك عليك يقول ماتعرف تطبخ
قومي اطبخيها وتعلمي
يمه ريحتها مااحبها ومااحب المسها
عيب ياسوير من اليوم تبين تطبخين
يوووه ليتني ماتزوجت
ههههه نسيتي هبالك لين تزوجتي ؟
ايه ابسويها على كيفي وياويله يقول شي
يوووه الحين ابقطع بصل وريحه قرف وش اسوي الله يأخذ بليسه ليش ماجاب شغاله ؟ اهي اهي اهي
ياربي هالحين كل شي زين لكن الرز كم احط ؟ اذكر امي تقول خمس اكواب للواحد لالاتقول كاس واحد للشخص
والله ماادري لكن ابسوي اربعه <<<ايقالها فاهمه
قام خالد وهوبشوق للغدا من يدي حبيبة قلبه
واستقبلته تبي قهوه ولا الغدا قال لها لالاابي الغداء جوعاااان
حطت الغداء ومسويه سلطه وشوي حركاة واتيكيت على السفره
خالد شاف الحركاة سال لعابه جلس ومد يده واكل من هذا الغداء الذي كلفه تسديد فاتوره كامله
والحمد لله صار طعمه مقبول لو انه متلبد وكانه عجينه لكن الجايع ياكل الحصى
وهذه معانات الازواج الان والدنيا تجارب
ومايولد الانسان متعلم
