تجربتي مع القطران

السلام عليكم ورحمه الله وبركاته..
صباحكم رضا وسعاده .. كيفكم بنات .. اليوم حابه اكتب لكم خلطتي اللي دايم اسويها لشعري ونتيجتها جدا روعه ما ابي إلا دعوة صادقه لأني احتاجها ..
انا من زمان وانا العب بشعري لعب على طول أقصه وما اخليه يطول بحجه ان شعري اذا طول خفيف واهبل مره يعني مالو داعي > حجه العجازات ههههه
بعدين قررت اهتم له وجربت اشياء كثير ولا شي فاد معي الا هالخلطه بصراحه حلوة والحلو فيها انها سهله ومافيها مقادير مكلفه كلها من الببيت يعني ما يحتاج تدقين مشوار للعطار > كرهوها أخوانها من العطارين هههه
مدري يمكن عشان تعودت عليها مع اني لما حكيت بنات خالي استصعبوها لكن ترى اللي يسويها بيشوف بنفسه وقبل ما أنسى بقولكم أهم شي الإستمرار يابنات أهم شي تدامون على الطريقه هادي أصلا بتشوفون الفرق بعد 3أسابيع لأنو أي وصفه ما يبان نتيجتها بسرعه كل شي يبغالو صبر وربي لو تشوفون شعري مره متغير طول بفتره قصيره ووصاير ناعم كأنو مستشور وأسسسسسود وكثر ياربي لك الحمد .. المهم ما أطول عليكم ..
في فرامه البصل تفرمين 6 فصوص ثوم مع بصله وحده الين ما تنفرم ناعم مره وتحطيها في طاسه صغيره وتحطي معها 3 ملاعق زيت زيتون و3 ملاعق زيت خروع وملعقه زيت القطران الأسود وتخلطينهم كويس وبعد كدا تحطي عليهم سدر يعني من خمس الى ست ملاعق وتخلطينهم مع شويه مويا يعني تقريبا بياله الين تحسيها صارت سايله وتحطيها على شعرك وتغطيه بكيسه نايلون .. تخليه 4 ساعات بس وبعدين تغسلي شعرك بمويه بس لوحدها بدون شامبو ولما ينشف تحطي زيت اي زيت متعود عليه شعرك انا بصراحه احط زيت دابر أملا الكل يعرفو مره حلو .. وبعدها تخلي الزيت بشعرك من ساعتين الى اربع ساعات وبعدين تغسليه بشامبو وشوفي شعرك كيف يصير ياشيخه من أول مره بتحسي بنعومته بمفعول الثوم سبحان الله ينعم مره وكأنو مستشور هدا شي والشي التاني جارتنا باكستانيه مره سألتها وش تسوي بشعرك قالت انا ما اسوي ولا شي بس احط دابر أملا واخليه مظفر على طول يعني ما أفلته أبدا وشعري يطول شهريا قد ربع الأصبع .. ماشالله تبارك الله عليها
وبس هاذي طريقتي وشعري يارب لك الحمد طول في 3 شهور تغير والله لو مو بنات خالي قالو لي ما كنت داريه لأنهم شافوني بالعيد وقالو شعرك مره محلو وش سويتي .. انا بعدها تحمست وقلت خليني افيد البنات أكيد غيري كثير تعب من الخلطات بس هاذي خلطتي غير سهله وغير كذا تسوينها بالاسبوع مره أو مرتين … انا عني سويتها بالبدايه يوم ايوه ويوم لا وبعدين صرت كل بعد ثلاث أيام اسويها عشان ريحه القطران اهلي قرفو من ريحتو .. هو صح قويه بس عادي بخري بعدها ولا كأنو شي سار وريحه الثوم والبصل لا تخافون منها تروح مع السدر وتختفي اصلا حتى اللي يقرب عليكي ما يحس ان الخلطه فيها ثوم وبهالكميه .. وأي استفسار انا حاضره وأي وحده استفادت منها تكتب عشان البقيه يشوفون الردود ويتحمسو عليها
اتمنى أي وحده تستفيد تدعي لي الله يرزقني بزوج ملتزم ويصلح ذريتي ويحفظهم ويحميهم من كل مكروه ويجمعني معهم على خير .. مشكورين على القراءه أختكم في الله