تجربتي مع الدكتورة هالة البرديسي

ربي يفرج عليكم ويسهل لكم الولاادة

أنا حبيت اكتب تجربتي مع الدكتورة هالة البرديسي في مستشفى جدة الوطني الجديد
لأني قبل ماأولد ماكنت أعرف أحد ولد عندها وبحثت في النت وكل اللي لقيته استفسارات
فحبيت أفيد أي وحدة تبغى تولد عندها

أنا رحت لدكتورة هالة صدفة وارتحت عندها مرة
وكانت أراجع عندها طوال فترة حملي
بس كنت أفكر أولد في سليمان فقيه
لكن ماما قالت لي اسمعي يابنتي الولادة تسهيل من ربي
وبما إنك ارتحتي للدكتورة توكلي على الله وأولدي عندها

بعدها سألت الدكتورة إذا جيت في وقت غير وقت دوامك تجي تولديني
لأني قلت مو معقولة بعد ماارتحت تولدني وحدة غيرها
قالت لي الدكتورة طبعا أجي في أي وقت
أنا اللي متابعتك من أول الحمل وأنصحك وأجاوبك على اسئلتك وفي الأخير أحد غيري يولدك ويمسك البيبي

أنا بعدها خلاص قررت إني أولد عندها

ويوم الولادة رحت ودخلت الطوارئ طبعا كان فيه دكتورة اسمها صبحية
دكتورة رائعة بكل ماتعنيه الكلمة من معنى
كانت تذكرني بالأذكار طوال الوقت
وقالت لي أنا باقي على دوامي نص ساعة بس إن شاء الله ماأطلع إلا بعد ماتولدي

وأول مافتح الرحم 7 سم اتصلو على دكتورة هالة وجات ولدتني
ولدت بأحلى بنوتة الساعة 11:30 بالليل
يوم الثلاثاء 21 صفر
والدكتورة كانت خياطتها داخلية

الدكتورة رائعة وأخلاق
وتصبر عليك أنا الحمدلله رحت وأنا خلااص
بس أعرف وحدة صبرت عليها الدكتورة كثير

بس دكاترة الأطفال أنا ماارتحت لهم
بس عندهم واحد هشام مساوى ممتاز بس مررررة زحمة