عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمة الله وبركاته
صباح الخير
كيف الفراشات وحشتوني والله . ابشركم بديت بالابر المنشطه من يوم السبت22/6/1431
كنت اخذ 3بودره و1واحد محلول وابره تحت الجلد لمده سبعه ايام .وكان عندي موعد 29/6 اشعه وتحليل دم زسوت لي الدكتوره اشعة عشان تعرف حجم البويضات لقت حجمها 15 تحطمت شوي سراحه. بعدين قالوا لي ازيد يومين زياده اخذ منشطات .ورجعت لها يوم الاحد وسوت لي اشعه .قالت البويضات اللي وصل حجهم 20 ست بويضات والباقي 14. انا استانست وحمدت ربي على نعمته ورحمنه لي. يوم الاحد بالليل اخذت الابره التفجيريه. وامس الثلاثاء سويت عملية السحب . في البدايه دخلوني غرفه داخل ولقيت اربع حريم معي وانا الخامسه عندهم سحب . اعطتني روب المستشفى وقالت غيري واعطتني تحميله احطها مع فتحة الشرج وانتو بكرامه . ولما لبست وخلصت . حطت في يدي مغذيه واعطتني حبه اكلتها مع ربع كاس ماي . طبعا قالو لي تصومين يوم الاثنين في الليل من الساعه12. قعدت اسولف مع الحريم واسأل اللي قد سوتها هل هي تعور قالو ثنتين عاديه جداً . والله يابنات اني ارجف من الخوف وابكي قبل مااسويها . قعدت حول نص ساعه الا مفعول الحبه ابتدا احس الغرفه تدور فيني وكأن فيني نوم قوي . اشوي لاهم ينادوني .سميت وتوكلت على الله . نوموني على كرسي كانه كرسي الولاده. اعطوني اكسجين مخدر بدرجه بسيطه زحطت في المغذيه ابره تخدير. اشوف الممرضه والدكتوره كانهم عشر موثنتين بس اني واعيه . بدت تشتغل في الاول ماحسيت بشي . بس يوم دخلت الابره في المبيض صحت بقوه وبعدها هدأ الالم . ارتحت قلت الحمدلله خلصت . شوي احس شي يشفط المبايض على برا والله قعدت ابكي مثل الورعه . والدكتوره تقول للممرضه زيديها بنج . ماشاءالله يد الدكتوره خفيفه مااخذت ربع ساعه اللا وهي منتهيه . عورني حيل التنظيف. بعد ماخلصت مني. تعذرت منها على صياحي . قالت الا انتي سامحيني بدأت فيكي فبل ماتتخدر المنطقه حيل. ويوم طلعت . قسم بالله كانه هم وانزاح.وعندي ترجيع يوم الخميس او السبت ان شاءالله . سحبوا مني 6بويضات الله يطرح فيها البركه ان شاءالله.
وبس ادري غثيتكم بس تحملوني :079:
انا ابي اسأل اللي سوت سحب كم قعدت تتألم من بطنها . انا احس الالم زايد اليوم:ب1:
وابو الشباب ماقصر:t9:سوالي قهوه وحليب وجاراتي ماقصروا معي الله يجزاهم الجنه لا مالي احد بالرياض:ب1::062:
وبعد ابسأل كم اقعد بعد الترجيع مااطلع مع العلم ان مافيني شي سليمه الضعف من زوجي
واش الاكل اللي اكله عشان تثبت الاجنه ان شاءالله
ادعولي ان الله يتتم لي واحمل
يارب انت عالم بحالي يارب . يارب ارزقني وارزق كل محرومه يارب اللهم امين
