عالم البنات النسائي كل ما يخص المرأة العربية من ازياء وجمال والحياة الزوجية والمطبخ
انهارده جايباكلم ميني سويسرول من مطبخي مباشرة و بجد و لا أسهل من كده .. في 10 دقايق يكون اتعمل … عشان تعملوه في البيت و تسيبكم من الكيكات الجاهزة و الهوهوز و الذي منه 😆
المقادير بسيطة و سهللله جدا :
4 بيضات و ممكن يبقوا 3 لو الصينية صغيرة ..
ملعقة فانيليا
نصف كوب دقيق
نصف كوب سكر
ملعقة كبيرة بيكنج باودر .
الطريقة :
نبدا بالبيض و نفصل الصفار عن البياض …و الأبيض يضرب لوحده كويس أوي لحد ما يديني المارينج الكريمي الأبيض
و أصفر البيض يضرب مع الفانيليا و السكر لوحده كويس أوي في طبق منفصل ….
و بعدين نخلط الأصفر بالسكر مع الأبيض مع نصف كوب الدقيق و البيكنج باودر
و نضرب كويس جدا … و لو عايزينه سويسرول بالشوكولاته نضيف ملعقة كاكاو أو اتنين 
بعد كده نصبه في صينية مستطيلة أو مربعة و تكون مدهونه كويس أو على ورق زبده زي ما هو باين في الصورة كده
باس كده …أتأكده ان الخليط متوزع في الصينية بالتساوي عشان متلاقيش حته عالية و حته أقل منها و حطيها في الفرن 5 دقايق بالكتير حتلاقيها استوت عشان سمكها قليل أوي
تعالو نحضر الحشوة بأه … 😉
في المعتاد … بحب احشيها شوكولاته خام مذابه في حمام مائي مع قشطة .. و يا سلام لو تغلفيها كمان من بره بالشوكولااته دي بتبقى خراافة بجد رووعة ..أحلى من الهوهوز بكتييير
إنما مكنشي عندي شوكولاته خام أحشي و اغلف بيها .. فعملت كريم شانتي عادي و عليه معلقة كاكاو بس …
ممكن تفردوا الحشو على كامل الكيك و تلفوها بعد كده بس دي عندي بتتبقى صعبة و بيحبوا عنها قطع السويسرول الصغيرة .. عشان كده بقطعها صغيره …
حشيتها بالكريم شانتي و رشة فورماسيلا شوكولاته بسيطة كده ..و بعد كده قطعتها قطع أصغر
و أدي الطبق بعد ما خلص
طبعا بيبقى أحلى لو اتغلف بالشوكولاته البني أو البيضا و تتحط في التلاجة شوية .. بتبقى خطيييرا جدا .. بس كده حلوة برضو
و أدي لقطه أهو من الجنب عشان تشوفوا الحشو
و طبعا الحشو ده انتو و ذوقكم … مربي .. كريمه … شوكولاته .. مكسرات … زي ما تحبوا و كله بيبقى حلو و لايق
و اتفضلوا طبقكم ….
بالهنا و الشفا ….
