باركولى الحمد لله ولدت وجبت احلى ولد ودى قصه ولادتى

حبيباتى الفراشات الحمد لله والشكر لله ولدت يوم الجمعه الماضيه مع صلاه الجمعه وربنا رزقنا بولد اسمه محمد الله يباركلنا فيه ويحفظه يارب هو واخته وعقبال كل الفراشات وقصتى بدات يوم الاربع اللى فات الصبح جالى طلق بدا خفيف كل نصف ساعه وروحت المستشفى هنا فى المانيا والدكتوره قالتلى مفتوح 1 سم فقط ياريت تقعدى عندنا تحت الملاحظه علشان نعملك سى تى جى اللى هو جهاز بيقيس نبضات قلب الجنين وقوه الانقباضات او الطلق فى الرحم وانا قولتلهم انا عندى بنتى صغيره لازم اروح فخلونى امشى وروحت وزاد الطلق وكان بييجى كل ربع ساعه وعلى بالليل كان بييجى كل 10 دقائق وروحت المستشفى وكشفت الدكتوره وقالتلى لسه روحى ولما الالم يزيد يبقى كل 3 دقائق او مش قادره تستحملى الالم تعالى او لما ينزل عليكى ميه او دم والحمد لله المستشفى قريبه من البيت ورغم كده كنت اروح بتاكسى لانى وصلت لدرجه لا تحتمل من الالم وكنت بخلى بنتى مع واحده صحبتى وهى ساكنه تحتى واروح المستشفى لغايه ما روحت البيت الالم كان بيزيد بطريقه لا تحتمل واخدت طول الليل حاسه ان الراس بتضغط لتحت واصرخ واعض فى جوزى ومنمتش طول الليل انا وجوزى وعلى الصبح كنت هموت من الالم وروحت انا وجوزى المستشفى ووعملوا تخطيط وكان الطلق عندى قوى جدا وسريع وكشفت الدكتوره وقلتلى بسرعه ولاده الرحم مفتوح 6 سم الحمد لله وعلى طول جابولى سريرى ودخلونى غرفه الولاده وحطونى على كرسى الولاده والحمد لله بعد 3 ساعات معاناه والم وصريخ وطلق من نار وسريع قالتلى الدكتوره ياللا ادفعى بسرعه علشان الراس ظهرت وانا كنت خلاص مفيش نفس عندى ولكن الحمد لله دفعت لغايه ما الاستاذ محمد شرف على الدنيا واحلى شئ انى حسيت بكل الام الولاده وخروج الراس والجسم منى وده اجمل احساس انى بساعد فى خروج ابنى منى لان فى ولادتى فى بنتى كان الرحم مقفول والميه نزلت وادونى طلق صناعى 3 ايام وبعدين طلبت الحقنه وولدت بدون الم نهائى ومحستش بخروجها منى لكن المره دى ولدت بجد والحمد لله الدكتوره كانت شاطره لدرجه انها وسعت بايدها ومش رضيت تقصلى علشان توسع وحاولت معايا لغايه ما الحمد لله ولدت بدون جرح لكن الحمد لله ابنى الله يخليه قام بالواجب وجرحنى باظافره وهو خارج منى والكتوره قالتلى ان الدم مش راضى يبطل علشان ابنك عورك بظوافره واضطرت انها تخيظ الجرح علشان ميحصلش نزيف لا قدر الله والجرح من جوه بس الحمد لله نسيت كل الالم اول ماشفت ابنى وحطوه على صدرى وجوزى كان معايا طبعا فى كل لحظه وكان حالته ربنا يعلم بيها من القلق عليه وكان بيهدينى وفرح لما ولدت بالسلامه وقص الحبل السرى لابنه زى ما عمل فى بنتنا لما اتولدت وعلى فكره انا دعيت لكل الفراشات الحوامل ربنا يسهلهم الولاده ويقوموا بالسلامه كلهم ودعيت لكل الفراشات اللى نفسهم فى الحمل ربنا يكرمهم ودى قصه ولادتى