عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ..
كيفكم يافرشات؟
بصراحة السنة اللي فاتت كنت حامل وكنت كل الوقت اتصفح هالقسم واقرأ قصص اللي ولدوا بالسلامة واقول في نفسي إذا ولدت ان شاء الله بجي اكتب قصتي هنا خاصة وانها اول ولادة لي وبالغربة وماعندي امي ولا اي احد غير زوجي الله تعبته معي شوي والله 😛
لكن اكتشفت بعد الولادة ووجود اطفال ..الوقت مايكون ملكي ويروح بسرعة من غير ما اقدر اسوي شي
وبعد 9 شهور ..رجعت ابكتب لكم قصتي كما قطعت الوعد على نفسي لما كنت حامل ➡
فبالنسبة لي كانت اول ولادة لي لحالي صعبة و مخيفة لكن سهلها رب العالمين وصارت تجربة رائعة رغم كل الألام اللي فيها
والحمدلله اللي ساعد ان مدينتي صغيرة فالمستشفى كان فاضي او شبه فاضي(ماولد معي غير وحدة في نفس اليوم) فكان فيه اهتمام وكانوا معي كل الوقت ونفسية الممرضات جدا رائعة وحتى الدكتور اخذ يشرح لي كل خطوة يسويها ويوريني وش قاعد يصير وجابوا لي مراية عشان اشوف الجنين وهو يطلع
استغرقت ولادتي 12 ساعة ..رحت لهم الساعة 4 الفجر لأن مويتي نزلت الله يكرمكم وبعدين شافوني الممرضات وعملوا لي واجراءات الدخول وقالوا استني الدكتورة المناوبة تجي وسبحان الله ذيك الليلة مانمت مو من الم ولا شي بس النوم ماجاني وزوجي نفس الشي
وجلست استنى وبعدين دخلوا علي الساعة 7 وقالوا ان الدكتورة تقول ما ابي امسك الحالة وانا مناوبتي تخلص الساعة 8 خلوا الدكتور اللي بعدي يمسكها من البداية لأن شكل الممرضات قالوا لها ان الوضع مو مستعجل لأن ماكان معي طلق ابدا
وجاء الدكتور الساعة 10 (شكلهم ينتظرون الطلق يجيني ) وكشف علي وقال الرحم مفتوح 3 سم وراح نعطيك طلق صناعي
وسألوني إذا ابي ابرة الظهر او اي ابرة ورفضت لأني اسمع انها تخوف وبعدين ماكان الألم بدأ معي لسى ..
والساعة 11 ونص نقلوني على غرفة الولادة لأني زي ماقلت كانت طوارئ الولادة فاضية ومافيها غيري واعطوني المغذي ومعه الطلق وقالوا كل ساعة بنزيد النسبة وقتها كان معي الم خفييييييييييف مرة يروح ويجي واول مادخلت غرفة الولادة كنت خايفة منها بس بعد ماشفتها وجلست على سرير الولادة ارتحت لأن ماكان فيها شي غربيب او يثير الخوف وكانت كبيرة شوي وداخلها حمام خاص والسرير بالنص وفيه لمبة كبيرة (كشاف) وخلفي الميزان حق البيبي واشياء ثانية وطبعا ركبوا علي الجهاز اللي يقيس نبضات الجنين والطلق
وكان زوجي معي وممرضتين ويسولفون وانا اسمع وشوي اشارك والألم بدأ يشد والساعة 12 ونص زادت النسبة شوي وجت ممرضة ثانية عشان الثنتين اللي عندي يروحوا يتغدوا (انا اعطوني فطور على الساعة 7 وقالوا ترى مافيه اكل بعدها) وصرت اخليها تتكلم علي عشان يخف علي الألم واتلهى بالسواليف وقالت ان لها اكثر من 10 سنوات بالمجال هذا واغرب قصة مرت عليها في امريكا لما جتهم حرمة كبيرة بالسن وقالت لهم انا حامل من كائن فضائي وهي ولا حامل ولا شي وبعدين الساعة 1 ونص زادوه كمان وزوجي من الساعة 12 وشوي طلع لأنه قالي ماراح احضر ولادتك وكان يوم جمعة فتحجج بصلاة الجمعة وخاصة انه شافني بديت احس بالألم
ويمكن على الساعة 2 إلا ربع او بعدها او قبلها بشوي (ما اتذكر) كان الألم قوي مرة وقلت للممرضة ينفع اخذ ابرة العضل الحين لأني شايلة فكرة ابرة الظهر من راسي وقالت ما اعتقد لأنك تأخرتي شوي وماراح تفيدك كثير بس خليني اشوف الرحم كم سم مفتوح واقولك ولما شافت قالت لي 9 فحمدت ربي اني قطعت شوط طويل وخلاص مابقى شي ويطلع الولد ..ماكنت عارفة ان اللي بقى اصعب..فطلبت منها الغاز المخدر او ما ادري وش يسوي بس انه يسبب خمول واحس ودي انام
المهم صارت كل شوي تقيس وبعد ثلث ساعة يمكن قالت خلاص 10 وسحبوا مني الغاز عشان ما اتخدر اكثر وانام وطلعوا من تحت السرير قطعتين حديد ركبوها عند الرجلين عشان تسندني وقت الدفع( ذكروني فيها بالسيارات الرالي) وابتدوا يقولون لي PUSH PUSH PUSH وانا ادف واتألم الم قوي وإذا راح الألم اريح شوي وفوق راسي ممرضة صغيرة لسى متدربة ووقت الألم تقولي بش بش بش بش بش بسرعة ..كان وقتها ودي اضربها كنت متوقعة اني نص ساعة بالكثير واولد ..خاصة انه كان ودي اولد قبل مايجي زوجي وتكون مفاجأة له بس السالفة طولت وجلست لحد الساعة 2 وشوي وجاء الدكتور وجهزوا الأغراض وفتحوا اللمبة الكبيرة وقلت خلاص بولد الحين خاصة انهم كل شوي يقولون طلع راسه وعنده شعر وما ادري ايش وسألوني إذا ودي اشوفه وقلت لهم ايه وجابوا مراية كبيرة بيدفونها على كفرات وحطوها قدامي وفعلا شفته راسه من فوق طالع شوي وتحمست اكثر وبعدين قالي الدكتور ترى بعطيك بنج عشان بسوي شق بسيط يساعد(هذا احسن شي فيهم مايسون شي إلا ويقولون لي ويعلومني كل شي وصدرهم وسييييييييع مرة
مع اني كنت اتألم ومو بحالهم بس كانوا طبين معي ويعطوني ثلج اكله بين طلقة والثانية لأنه نشف فمي واحتريت وممنوع الموية
وبالأخير بدأ يضعف نبض الجنين وانا بديت اتعب فجابوا لي اكسجين(غير الغاز المخدر) عشان كان فيه نقص شوي ويحطونه لي وانا منهد حيلي وما اصدق يروح الألم عشان انام والله مع انهم يمكن دقيقة بس احس اني خلاص بنام لدرجة اني افكر واقول مايحتاج اولد اليوم بكرة اكمل ولادة مرة تعبانة ومرهقة بس من شدة الم الطلق لما يجي غصب احس اني ابي اولد واخلص وبعدين الحمدلله ولدت على الساعة 4 إلا ثلث ونظفوه وحطوه على صدري وطلع ولد وسبحان الله انا لما شفته راح كل التعب والإرهاق اللي كان فيني ومبكى على طول وسحبوا شوي شي من فمه وبعد شوي اخذوه ووزنوه وكشفوا عليه كشف مبدأي ورجعوه لي ووقتها الدكتور قالي بننتظر المشيمة ولما طلعت خلاني اشوفها وشرح لي كيف كانت وبعدين خيطوني وكلمت زوجي من نفس الغرفة وقلت له تعال لأنه ماجاء يحترني اولد وهو بعيد بس ماعلمته ولد ولا بنت ولما جاء قالوا لي الممرضات وعلموه انه ولد 😳 (وماكان يعرف انه ولد لأنه ماكنا متأكدين من جنسه لما كنت حامل وكان ممنوع السؤال عن جنس الجنين وقت الأشعة الصوتية ..خوفا من المشاكل) وبعدين اخذوا الولد مع ابوه للحضانة عشان يكملون كشف ويغسلونه ولما خلص مني الدكتور كان معي شوي نزيف وصاروا يضغطون بطني بقوة ..مررررررررة يؤلم..اثكر من الولادة وصاروا كل ربع ساعة يجون يضغطون بطني وبعد ساعة (يعني اربع مرات) وقف النزيف وطلعوني غرفتي يمكن الساعة وقتها كانت 6 المغرب وقالي زوجي ان فيه وحدة ثانية توها جايتهم وقالوا لها امشي بالممرات شوي عشان تسرع الولادة وشوي جابوا الولد وقالوا رضعيه لأنهم سألوني اول ماجيت إذا برضعه طبيعي ولا لا..واستغربت صراحة اني برضعه الحين او كان فيه شوي دهشة وخوف وتجربة جديدة ورضعته شوي وخلوه عندي فترة وبعدين شالوه وجت جارتي ولما راحت يمكن على الساعة8 نمت بس طبعا مافيه راحة كل ساعتين كانوا يصحوني عشان ارضع والساعة 12 بالليل جابوا اللي كانت تولد للسرير اللي جنبي (الغرفه فيها سريرين) ..
وطبعا جلست 8 ايام بالمستشفى لأن كان معه صفار ومارضوا يطلعونه لحد ماتنزل النسبة وكان بالنسبة لي طفش مرررررررررة لأن ما احد يزورني كثير ولا فيه شي اسلي نفسي فيه ..فتخيلي اسبوع على السرير ماتشوفين احد ولا تكلمين احد غير كم ساعة إذا جاء زوجي ولا وحدة من العرب اللي اعرفهم مرت علي نص ساعة 😛
لكن الحمدلله مرت ذيك الأيام على خير وبعد شهر نزلت السعودية 3 شهوروتعبت شوي بالرحلة لأنه المشوار طويل وكل الوقت جاسلة (تقريبا يوم كامل) وبعدين رجعت كندا
ومازلنا بغربة ومازالت لاصقة بولدي 24 ساعة لأنه مافيه اهل او احد ممكن يساعدني فيه شوي ويشيله عندي ساعات غير زوجي اللي يساعد في اشياء معينة 😈
انتهى 😉
