انتي عانس…انتي مسكيييينه

بسم الله الرحمن الرحيم
.
.
.
انتي عانس…انتي مسكيييينه
ايه مسكينه..
.
كل سنه يزيد عدد العوانس..
انتي متخيله حجم الكارثه..
كثروا البنات إلي بدون رجال..
لاتقولين مالي ذنب ولا مو بيدي..
اصلا وش الفايده من وجودك في الحياة ..لازوج ولاهم يحزنون..
بس زيادة عدد..زحمه ع الفاضي..
لانك مثل البضاعه الي انتهت صلاحيتها خلاص..
.
اصلا مين بيرضى يتزوج وحده عمرها 30 او 35 ..
من المجنون الي بيرضى..؟!!
لاتقولين لي والمطلقات والارامل بدون أزواج..
لاتقارنين نفسك بهم لأنهم نالوا شرف الإرتباط برجل..
أما انتي..على قولة ( m!ss.e ) الباص راح عليك وانتي جلستي في الشارع>> احسن من القطار لان ماعندنا قطارات خخخ
.
.
.
كذا ينظر لك المجتمع والإعلام..
هذا إلي يبغاك تفهمينه .. وهذا إلي يبغونه يصير..
انتي قضية ولازم يدورون لها حل..
خصوصا بعض الرجال
لانه يبغى ينقذك من وحش العنوسه المخيف عشان تقابلين وجهه المليان تجاعيد ونكد
.
.
مقابل العنوسه عند البنات فيه شباب تعدوا 30 سنه وماتزوجوا
بس ليش البنات مشكلة وهم مو مشكلة ولا قضية!!!!
و المشكلة اساسا هي عزوف عن الزواج من الشباب؟؟!!
.
لانك انتي وببساطه بنت وهو ولد
ولانك ملطشه المجتمع و الشماعه الي نعلق عليها وماتعارض
.
.
.
.
تأكدي انك مو المشكلة
بالعكس عقولهم وافكارهم ونظرتهم الحقيرة للمرأة هي المشكلة مو انتي..
سواء كانوا رجال او نساء> للأسف
انتي وحدك الي تقدرين تسكتينهم
اثبتي لهم انك تقدرين تعيشين بدون رجل
وياكثر اليتيمات وعايشين بدون اباء مو ازواج
.
انتي مو عاله على احد
انتي جزء من المجتمع برجل او بدون
اعترفوا بك او ان شاء الله عمرهم مااعترفوا
.
لاتسمحين لهم يهمشونك ولا تحطين انتي نفسك في الهامش
.
.
ولاتجلسين حاطه يدك على خدك تنتظرين شيء ربي وحده أعلم فيه
وقولي للعالم كله انك راضيه بنصيبك
واثبتي وجودك
وسكتي مجتمعنا المتخلف
.
.
.
خلاصة الموضوع:
ربي ماراح يدخلك النار لأنك عانس
ولا راح تدخل المتزوجه الجنه لانها تزوجت
.
ربي العدل وقسمته عدل
لو بيدك تغيرين القدر ماراح تختارين احسن من الي اختاره لك ربي
لان الي خلقك مابينساك
.
اللهم لك الحمد حمدا كثيرا طيبا مباركا فيه يملأ السموات والارض