انا محطمة حاسة انى ام فاشلة

اخواتى ارجوكم ساعدونا فى حل مشكلتى وهى ابنتى تبلغ من العمر 11 سنة تعبانى جدا جدا حاسة انى مش قادرة اتعامل معاها خالص بأى شئ اسلوبها معى سئ للغاية بترد عليا كلمة بكلمة وكذلك بترد على امى أو اى حد ينقدها و عايزة تعمل اى شئ فى دماغها هى جسمها مليان شوية وطويلة اى جسمها ملفت يبدو اكبر من سنها وكذلك جميلة ولكن عقلها صغير عايزة تلعب على الباب على طول وعايزة تنزل الشارع كل شوية بحجة شراء حاجات حلوة و وطالعة نازلة على السلم او تجيب عيال العمارة كلهم عندى فى البيت و ذلك لو اعترضت على خروجها برة و يبهدلوا لى البيت كلة حاولت معاها كتير انها كبرت لابد ان تحافظ على نفسها وانها تلتزم شوية فى لبسها مفيش فايدة خالص تقولى انها لسة صغيرة
قلت لها بلاش تلعبى على الباب واخرجك على طول برضة مصممة تلعب برة والا نقعد طول النهار خارج البيت وانا ظروفى ما تسمحش اخرجهم على طول لانى عندى اربع اولاد وهى الكبيرة وانا مسئولة عن كل كبيرة وصغيرة فى البيت نظرا لظروف عمل زوجى فى الخارج انة لم ينزل اجازة من سنة و 8 شهور
انا تعبانة خالص معاها ونفسيتى مدمرة لدرجة انى قلت لها انا بكرهك ترد تقولى وانا كمان بكرهك بكل برود
واليوم دعوت عليها كثيرا وانا كنت صائمة و خايفة ان ربنا يقبل منى الدعوات عليها وانا ما اقدرش اتحمل اى شئ على اولادى خالص بس حزنى من تعاملها معاي خلانى عملت كدة
ارجوكم بالله عليكم ساعدونى بحل مشكلتى انا خايفة عليها الدنيا مفيهاش امان زى زمان ممكن حد من ذوات النفوس الخبيثة يطمع فيها هى جسمها اكبر سنها وكمان بتتصرف كالعيال الصغيرة و الجيران بينتقودها وكمان بيقولوا عليها عبيطة ومش بيعبروها لذلك رافضة خروجها على الباب
للعلم ابنتى دى متوفقة جدا فى المدرسة ودايما تطلع من الاوائل و مدرسينها بيحبوها ومطيعة فى المدرسة عكس تماما البيت وبتحب زميلتها اكتر حتى من اختها الصغيرة وغالبا بأشعر انها مش بتحب اختها انتظر ردكم وأسفة على الاطالة ولكنى محتاجة لمساعدتكم وشكرا