انا بنت سعودية ، يا بلدي ارجوكي حني عليا :(

اعرف انكم كلكم راح تهبو فيا و تهجم عليا كالعادة ، بس يا بنات قبل لا اقلكم اي شي راح اقلكم اني ترا احب بلدي و بالزات احب مدينتي ” جدة ” اللي كتير ناس ما تحبذها لأنها مليانة ” طرش بحر ” … هادا كلام جارح كتير اسمعه

يا بنات انا سعودية ، و ان كان اصلي مو سعودي بس ما اعرف بلد تاني غير بلدي ، بس ممكن احد يقوللي ايش هي امتيازات جنسيتنا السعودية اللي نحصل عليها كوننا مواطنين سعوديين ؟؟؟

اذا بتسألو ليش انا أسألكم هالسؤال راح اقلكم ايش هي ظروفي ، و اللي يخليكم لا تهاجموني بس قوليلي اذا انا صح ولا غلطانة

اول شي التعليم ، انا سعودية و ما قدرت ادخل جامعة الملك عبد العزيز ، دقيت ابوابها مرتين مرة كنت ابغا ادرس بكالوريوس في التخصص اللي طول عمري حبيته و رفضتني و اضطريت ادرس تخصص ما احبه في واحد من كليات اتربية و و تخرجت و رجعت برضو للجامعة ابغا ماجستير ، و رفضتني رغم اني عديت اختبار التوفل !!!!!!!! ليش ؟؟ كتر عليهم العدد ؟؟؟ طفشو من الطالبات ؟؟ و لا صارو ما يقبلوا الا بالواسطة ؟؟؟ ، و بعدين سمعت من وحده بنت تقول انها تعرف بنات دخلو الجامعة و هما ما عدو التوفل بس ايش السر ؟؟؟ طبعا انتو عارفين ” فيتامين واو ” و لعلمكم هالجامعة ترتيبها 2999 من 3000 !!! ما اعرف اللي يبغا يدخلها بواسطة يدخلها على ايش ؟؟؟ ، بس اتوقع عشان لا يتكلف و يصرف فلوس من جيبه عشان يتعلم ، و الجامعة هي اللي تصرف مكافآت و تعبانة من كتر الصرف و ما تبغا زيادة عدد !!!!!!!!!

و دحين انا ادرس في جامعة اهلية بادفع فلوسها من جيبي الخاص زيي زي اي اجنبية بس ناقصني اقامة ، ما لقيت الا هي لانها جامعة معتمدة من الوزارة!!! لا نفعتني لا بعثات لا داخلية و لا خارجية و حتى البعثات الداخلية ما تشمل الماجستير و ما تبغا اي احد ، طبعا تحط شروط معينة 🙁 آه يا قلبي لا تحزن بس

تاني شي العلاج : من فيكم يتعالج بمستشفى حكومي ، و ايش الفرق بين الحكومي و الاهلي ؟؟ انا عن نفسي لو مستغنية عن نفسي اروح مستشفى حكومي و الاقي معاملة زي الزفت و اخد سرا بالشهر عشان يفضا سرير اتنوم فيه !!!!

يعني ايش بقي خدمات ما وفروها لنا ، احنا بنات الوطن و سعوديات و انا كنت احلم اتعلم في جامعة عزوز بس دخولها مستحيل !!! ليش كده ؟؟؟

و لا الوظايف ، انا اعرف انه البطالة صارت مشكلة كل بلد ، بس حتى انا سعوددية و الله احلم بالوظايف الحكومية ، بس طبعا اي وحدة تتخرج تفكر بالقطاع الخاص لانه بالحكومي محد راح يعطينا وجه !! ، خلاص فقدنا الامل !!! 🙁 ، و اخرتها يطلع وزيرنا المصون يقول ” خلو السعوديات يشتغلو خدامات في البيوت “!!! و قسم حتى الغرب يستغربو مننا !!!

بالله عليكم ادوني فايدة واحدة ، و لا حق واحد اكتسبه لاني سعودية ، يمكن انا غلطانة ؟؟ يمكن انا فاهمة غلط ؟؟ يمكن انا نسيت شي ، و ربي يسعدكم يا بنات لا وحده تجي تقوللي قبايل و اصل و فصل ، لانه انا مو بدوية و لا قبيلية و حتى لو كنت راح أسأل سؤال واحد ” ايش اعطتني القبيلة ؟؟؟ ” وظفتني بحكم انا عتبيبة و لا غامدية و لا زهرانية ؟؟؟ !! درستني بارقى المدارس ؟؟؟ او زوجتني باحسن الرجال او قالت لا ما عندنا احنا البنت لولد عمها ؟؟؟؟

انا مو متمردة يا بنات ، بليز انا احب بلدي حتى لو ما اعطتني اي خدمات لا في التعليم ولا في العلاج او عيشتني كاني اجنبية ، بس عن جد احد يبصرني ولا ينورني ، ممكن احد يقوللي انتي غلطانة بس تحطي دلائل انه اللي بيصير لي كابوس و راح اصحى منه قريب ؟؟؟