انا اصرف على زوجي واهله

بنات بكلمكم بموضوع ,, بصراحه مو قادره اقوله لاحد من اهلي ولا صاحبباتي

علشان الاوضاع الماديه يعني الموضوع محرج شويه

امممممممممم

اول شيء ببدايه الموضوع اختي كان لها تجربه سيئه مع طليقها لانه تزوجها عن طمع وااخذ فلوسها وكذا , علشان كذا لو بقول لاهلي بيقولون زي طليق اختك

وهو حرام الوضع مره غير ,, بس مضايقني

انا موظفه والحمدلله راتبي حلو ,, وحتى زوجي يشتغل بشركه كبيرة وراتبه حلو بس عليه اقساط وديون

هو اخذ قرض علشان اشترى بيت وسكن اهله فيه (امه وابوه بس) وعلشان هم على قد حالهم ماكان عندهم بيت ملك

صح هالموقف مره حلو من زوجي وهو الحمدلله رجال يعتمد عليه واهلي مره يحبون فيه هالصفه انه بار باهله وكذا.

المهم ,,, الوضع الحالي ان راتبه بالمووووت يكف الى اخر الشهر
ومن تزوجت ماقدرت احط شيء بالبيت وودي انه يوفر لو مبلغ بسيط ابي اغير الكنب ( سكنت بكنب قديم) ومره كارهته وهو مب قادر حتى يوفر هالقرشين .

صبرت وقلت عادي , طبعا الوضع مره تغير علي وانا في بيت اهلي ماشاء الله ساكنين بقصر وكل اجازة نسافر برا.
مره صعب علي الوصع الجديد , وكل ماروح لاهلي احس بالفرق وارجع لبيت زوجي ابكي وهو مايدري ليه
ما الومه على الوضع المادي بس اقول انا وين وصرت وين.

المهم ,,, جا العيد ( وهالعيد اول عيد معه وسببب لي ازمه حياتي) قلت لكم الامكانيات الماديه محدوووده جدا .
ولمن جا العيد الاخ طاق الصدر والذابيح عليه وجمعه اهله ماشاء الله مره كثيرين وانسابهم ومادري مين , على اني قلت له ان عند اهلي كل عيد على احد وهو يقول لا عيب والناس ضيوف عندي بالبيت (لان البيت باسمه) قلتله هم ماجو لك
هم جو لانه بيت العايله ومافيها شيء ان كل عيد على احد
وماشاء الله كلهم كبار بالعمر وزوجي اصغرهم وهم رواتبهم ومعيشتهم افضل مننا واوضاعهم مره حلوة
وزوجي اقل واحد ومع كذا اكرم واحد .

تخيلو الذبايح مشيتها , صارو كل ايام العيد يجتمعون وغدا وعشا على حساب زوجي كلهم مع بزارينهم.
وانا اقوله ليه تطق الصدر ؟ عاد مو كل يوم … طبعا هو يزعل علي ويقول اني اكرهه اهله
مع اني والله احبهم بس بصراحه انصدمت من برودهم واتكاليتهم.

ماجا عاشر العيد الا وزوجي يقولي تراني فلست مافي حسابي ريال
والراتب باقي له 3 اسابيع
كسر خاطري… واعطيته بطاقتي

والحين رايح جاي يصرف منها .. ماقول يدلع نفسه على حسابي ..لا بس مصاريف اليوميه ومواجيبه لاهله
ولحد الحين بكل جمعه يصير الاكل على حسابه …
مو بس الاكل وحتى الطلعه والتمشيه مقاضي التمشيه على حسابي

انا هنا انقهرت واقول بقلبي انت خلقه ماعندك فلوس , وانا اعطيتك الفلوس لك مو لهم , طبعا بس بقلبي
وهو بس شافني تضايقك وزعل علي ,,, هذولا اهلي ومادري ايش

طيب اهلك مو اهلي انا بس استحيت اقوله . هو اي كلمه مني مره يتحسس وانا كرده فعل لا شعوريه لازم اطمنه انه عادي وخذ بطاقتي حلالي حلالك ( وبقلبي لا ) بس موعارفه كيف اتصرف

يعني اشوف زوجي بضيقه واصير واقفه كذا مكتفه ايدي , وانا مابيه يتسلف من الغريب, مو حلوه بحقنا وانا اقوله موحلوة ربعك يشوفونك دايم مفلس .. مررره احراج
مره بيعطونك و10 لا .
يعني حفظا لماء الوجه , وكرامتنا قدام الناس.

انا متحسفه على الفلوس اللي راحت , واقول اني حارمه نفسي ولاحطيت شيء بالبيت من حسابي علشان ابيه هو اللي يصرف لانه بيته وهو مسول عنه وصبرت سنه على كنب قديم
والحين اللي عندي راح لغيري !

هو يقول كل اللي اخذه سلف وبيرده لي , بس متى بيرجعه اذا الراتب مايكفينا احنا الاثنين الى اخر الشهر .. فما بالك وهو يصرف على قبيله !!