اليوم سويت أشعة الصبغه ..تعالوا أقولكم شصار و اخر اخبااااااااااااااااري ,,,,,,,,,,,,,

السلام عليكم ورحمة الله وبركاته

شلونكم بنات !!
والله لكم وحشه
بالاول أحب أشكر كل البنات اللي سألوا عني و دعوا لي …
الله يرزقني و يرزقهم بالذريه الصالحه اللي تقر عيننا
و ألحين بأقولكم شصار معاي…
من فتره ( أكثر من 4 شهور)
حولوني المستشفى الحكومي لمستشف الصباح ( حكومي لكن فيها مركز متخصص لعلاج العقم و أطفال الانابيب)
استانست انهم نقلوني و قلت يمكن الله يرزقني من الحكومي …و ارحم زوجي من مصاريف الخاص ( الاهلي)
و عطوني موعد …قالوا تعالي بعد 3 شهور !! هذا اول موعد لي مع الدكتور …اسمه حازم
المهم … مرت الثلاث شهور كأنها 3 سنين …و الحمدلله كان موعدي أمس …
حضرت الموعد انا و زوجي ..
كان الدكتور طيب و خفيف ظل …كل شوي يضحك معانا 😡
الصراحه ونسني …رغم اني كنت داخله عليه الغرفه وانا ضايق خلقي …و قاعده أقول لزوجي ابي اتبنى بنت وأخلي اختك ترضعها … عشان تحرم عليك 😆 🙂
قال : مو وقته هالكلام …. و قال لي : ليش التفكير هذا؟
قلت ما فيها شي اننا نتبنى …و التبني فيه أجر …و انا زهقت من العلاجات و التفكير ..و حتى لو تبنيت ان شاء الله راح نحاول بالحمل …ما اترك العلاج بالحمل ..
قال: وان جبتي …وين راح تودين البنت اللي تبنيناها؟
قلت : راح اخليها معاي …الى ان تكبر ا ن شاء الله وراح نربيها مع عيالنا ( اختهم بالرضاعه)
سكت و قال بعدين يصير خير …
تدرون يا فراشات …مرات اقول ما همني كلام الناس … كل اللي يهمني انه الله يرزقنا بعيال نسمع منهم يمه …لكن المشكله لما تكبر … أخاف أحد يعايرها ولا يجرحها ….كلام الناس ما يرحم 🙁
المهم …دخلنا على الدكتور و تكلم معانا عن المعلومات اللي بلمفنا …انا سوينه مره تلقيح صناعي ومره تلقيح مجهري
قال الدكتور فحوصاتكم صارت زينه لاني عالجت هرمون الحليب و زوجي ترك التدخين
و قال شلون ما تنجح معاكم التلقيح الصناعي وانتوا ما فيكم شي و توكم صغار
و .. قال : أبيج تسوين أشعة صبغه و بعدين أبدأ أسوي لج تلقيح صناعي وان شفت انه البويضات ما استجابت او صار اي خلل …راح أقطع اجراءات التلقيح الصناعي و أبدأ بالتلقيح المجهري و اطفال الانابيب
ف اليوم رحت سويت أشعة الصبغه … والله يا بنات حسيت اني بأموت من الالم و العوار ( علما بأني مسويتها قبل هالمره ) يعني هذي ثاني مره أسويها …. قمت اصارخ و أبجي 🙂
و لما خلصت الحمدلله قال لي الدكتور انه الانابيب مفتوحه 💡
و ان شاء الله لما تطلع اوراق النتيجه راح أوديها لدكتور حازم و يحدد لي متى أبدأ بالتلقيح الصناعي
نسيت أقولكم انه لما شفت الدكتور حازم قلت له ليش ما تختصر و تسوي لي اطفال انابيب على طول!!!
قال : لا … ما يصير …هذي اجراءات لازم اسويها لج …
أدعوا لي يا بنات …
لا تنسوني من دعائكم ➡
أحس اني زهقت …
لكن الحمدلله على كل حال