الولادة فرج من رب العالمين << من واقع تجربة

كيف الفراشات الكروشات ان شاء الله بخييير

حبيت اقولكم تجربتي فيما يسمى بمحرضات الولادة بحكم اني في نهاية التاسع وتعببت تعببت تعببت من الثقل وطفشت ابي اولد قمت اقرا في هالقصص واجرب ما خليت شي

المشي طبعا انا امشي من اول يوم في التاسع لا يقل عن نص ساعه وتراه ما يسرع الولاده بس ممكن يهون عليك الالم وقت الولادة

الرطب اكلت فيه اكل وبحكم ان حنا في رمضان مساعدني افطر على رطب واكثر منه وبعد في نص الليل تقريبا ارجع اكل ولا جاب ولادة ولا شي سبحان الله اصلا في الآية بما معناه ان الله سبحانه قال لمريم بعد ما جاها المخاض ان تاكل رطب مو قبل

الجلوس في مويه دافييييه مع فتح الارجل او جلسة القرفصاء تحت موية دافية كم وحده كاتبين انهم سووها وولدوا في نفس اليوم او اليوم الثاني انا سويتها اكثر من مرة وما نفعت معي

التمارين فيه موضوع قريته عن تمارين وكان فيه مقطع فيديو انك تمسكين في الكرسي وانتي واقفه وتجلسين جلسة القرفصاء وترجعين تقومين مرة ثانيه مع تكرار العملية الله لا يوريكم سويتها قبل يومين وفخوذي للحين توجعني من هالحركة ولا جابت لي ولادة ولا شي

الجماع مع ان مالي خلق وقرفانه من نفسي الا اني جربته كم يوم وراء بعض ومن غير اي فايدة

القرفة وحده كاتبه انها شربته في نفس اليوم ولدت ان لي يومين اشرب كاسين في اليوم ولا شفت اي اعراض ولادة

الخروع ما فكرت اجربه لاني قريت كلام علمي انه لو انشرب والرحم مسكر خطرررر عالجنييين

الي توصلت له ان نفسيتي تعبت مررره وصارت في الحضيض لاني اجرب كل هالاشياء على اساس انها تجيب الولادة بعد اتكالي على رب العالمين وبعدين انصدم انها ما حركت فيني شي

وتأكدت ان الولادة هي فرج من رب العالمييين كاتبها في ساعة معينه تجي بدون استخدام اي شي والي صادف و جتهم الولادة بعد تجربة اي شي من الي ذكرته فوووق ربي كان كاتب لهم الولادة ذاك اليوم استخدموا شي او ما استخدموا

اتمنى تستفيدون من تجاربي وتتوكلون على رب العالمين وتكثرون من الدعاء والاستغفار