عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمة الله وبركاته
.. مساء الخير يا بنات يا حلوات يا قمورات
هل تعانين من ألام في فروة رأسك ؟
هل شوشتس توجعتس إذا تحركت بعكس اتجاهها ؟ وتجلسين تعملين تدليك لفروة راسك ويزيد الألم اكثر ؟!
هل تشعرين بوخز مستمر بعد غسل شعرك بيوم يستمر معك حتى يتم غسله مره أخرى ؟
وكانت النتيجه إنهم كرشوك وقالوا لك ضفي مافيك إلا العافيه ؟!
واستغربو من حالتك ؟ واللي قال انها نوع من الصداع واللي قال واللي قال ؟!!
هل أزعجتي أهلك شعري يعورني وجلسو يتحمدون عليتس ويقولون مافيتس إلا دلع ووسوسه ؟ 
هل بلعتي من الفيتامينات والزنك والحديد لين قالت معدتس أطلبي الله ؟
الآن عزيزتي أم شوشه معوقه
بقولك : تروشي عادي ولكن شعرك غسليه بماء وسدر فقط
بتقولين : لا السدر يجفف الشعر ويعدمه ويسويه كيرلي 
وخليه يجفف الشعر اهم شي العافيه ويروح الألم
يعني خليك مستمره كذا لمدة شهر لا تغسلين شعرك بشامبو !
وبعد الشهر أو الثلاث أسابيع الخاليه من الشامبو ابدئي بالتدريج بالنوعية الجديده اللي بدلتيها من
الشامبو بغسل شعرك مره وحده كل اسبوع ولا تلطين الشامبو مباشرة على فروة راسك غلط ×غلط 😀
لا خليك حرمه سنعه خففيه بماء ثم لطيه على عكاريشك المبلله مسبقا بالماء ونظفيه من الشامبو كويس وشيئاً فشيئاً
<< يمديكم على شيئاًفشيئاً
اغسليه بالشامبو مرتين كل اسبوع بكمية قليله جداً ومخففه بالماء
وشي ثالث كنت أسويه : يومياً اشربي كوب عصير فواكه كوكتيل بصفة يوميه أو شبه يوميه
بتقولين ما أحب الفاكهه ولا أقدر آكلها بقولك سوي مثلي غمضي عيونك الحول وسمي بالله ولطيه بسرعه
< ما تحب الفاكهه ولا الخزروات
((عصائر حلوة ومستساغه )) 😆 hy:
حليب بارد وموز وعسل وماء بارد
حليب بارد وموز وشمام وعسل وماء بارد
برتقال وليمون وعسل
لكن بقية الفواكه إذا صعب انك تاكلينها او تشربينها
اعمليها طبقات مثلاً حطي بالخلاط :
منقا وعسل وحليب بارد وحطيه طبقة اولى بالكوب
ثم اغسلي الخلاط وحطي موز وحليب وعسل كطبقة ثانيه مع مراعاة وضع الملعقه اثناء صب العصير بالكاس حتى لا تختلط الطبقات
ثم اغسلي الخلاط وحطي فراوله وحليب وماء بارد وصبيها كطبقة ثالثه
ثم اخر شي مثلا عنب وماء بارد وسكر أو أي فاكهه موجوده عندك وبالاخير حطي شوكليت هرشي باخر طبقه وتمتعي بالمذاق الحلو والشكل المرتب واهم شي الفيتامينات
ولا تنسين الخضروات والسلطه لو كميه قليله اهم شي تاكلينها بصفة مستمره
كل هذا يغنيك بإذن الله ويبعد الألم عن شوشتك الحلوة
وإن شاء الله تطلع شوشكم أكوس الشوش الخاقوقيه 
أول مره انقل شي 
