الله يسامحك يابوي ,,, الله يوفقها اللي ترد علي ويجعل لها من كل ضيق فرج

السلام عليكم ورحمه الله وبركاته

انا خطبني شاب عمره 27 سنه مهندس ماشاء الله عليه قبيلي طايع والدين ومحترم جدا
اتصل على ابوي الاربعاء اللي فات مو اللي اللي راح لا يعني قبل اسبوع وخطبني واستقبله ابوي بكل استهتار
طبعا الولد ماخطب بشكل رسمي بالجوال قال ابي اشوفك قال بخصوص قال موضوع خاص طبعا عند ابوي خبر انهم يبوني الموهيم اصر عليه ابوي وش تبي قال ابي اخطب وهذا يكفي انك تقابلني ابوي خلقه شايف نفسه يعني متكبر
الموهيم قال للولد وخير ان شاء الله من بيخطب عندي خالد الفيصل 😆
رد الولد وقال يابوي انا فلان الفلاني اللي بخطب قال ونعم انا الام بطلع عند الامير فلان وبعد ساعه اتصل علي اشوفك
قال الولد اوك
الولد هذيك الليله صار عنده ضرف واتصل واعتذر من ابوي انه ياجل اللقاء ليوم الجمعه قال ابوي افكر ارد عليك مره ثانيه واعطيك موعد 💡
المهيم وتتصل الحرمه على امي وهي زعلانه قالت ليش ابوكم يتكلم على ولدي كذا احنا نبي بنتكم بالحلال مانبيها تطلع مع الولد ماتبونا قولو لنا البيوت مليانه
الموهيم وامي تعتذر وقالت يابنت الحلال الله بيسهل الامر حقكم علينا
وتنحل المشكله ويجي الولد يوم الجمعه بيتنا
واول مادخل ويصكه ابوي بذيك الكلمه عند المدخل قاله انتبه تدخل على حريمي عاد الولد رد عليه بوقتها قال يابوي انا ابوي علمني مادخل الا على الرجاجيل
وبلعها المسكين ودخل المجلس وخطبني بشكل رسمي ويقول ابوي نشوف افكر والله لو اعطيتني ملك ابوك ماعطيك بنتي لكن ذي سنه الحياه زي ماتزوجنا بنات الناس الناس بيتزوجون بناتنا
الموهيم وقعدو يسولفون وبعدها طلع الولد
قال ابوي انا برد لك بعد يومين
واسحب عليه اسبوع
طبعا الرجال ممسوك بكلمته في مجلسه
الموهيم ويروح ابوي يسال عنهم في ديرتهم ومدحو في الولد
ماكتفى راح لبيوتهم ولقى عمه تقريبا في سن الولد عمره 32
الموهيم ويقعد ابوي يسب في الولد مع عمه
قال ان ولدكم جاني وقال ان ابوه مريض عنده الخبيث ومقعد بكرسيه مايقدر يجي والولد ماقالها قال ابوي تعبان عنده كيس دهني في رقبته ومايقدر على السفر الا بالطياره اما بر مايقدر
قال عمه لابوي والله اذا هو قال في ابوه كذا مافيه خير لبنت الناس
المهم ابوي سوى الفتنه ذي ومشى
اتصل علي وقالي الناس ممتازين بس في الولد شغله وحده قلت وش قال عاق
ذكرني ابوي بمالمثل اللي يقول ضربني وبكى سبقني واشتكى
طبعا انا ماصدقت لان عندي خبر بالمصيبه اللي سواها ابوي بس ابوي من حبه لي مايبيني اطلع
قلت انا الله يهديه وان شاء الله مايكون صحيح هالخبر
قال طيب يابنتي حالتهم بسيطه جدا قلت الفقر مو عيب انت متى جاك بيت ملك الا يوم صار عمري 22 سنه
قال يعني مافيه امل تغيرين رايك قلت لا لاني استخرت الله
بعدين قال طيب انا الاحظ انه متكبر 😥 الله يسامحك يابوي تشوف الناس بعين طبعك
رديت عليه وقلت ابوي ومتكبر وش فيها التكبر على المتكبر قمه التواضع حسيته بلع العافيه وسكر
رجع بعدها بنص ساعه قال طيب انا عندي اقتراح قلت وش قال تملكون والزواج بعدين قلت طيب وانا وش قلت لك من اول اقلها بين الملكه والزواج 5 شهور قال لا خليها سنه يمكن تغيرين رايك وتطلبين الطلاق
قلت الله يكتب اللي فيه الخير
جاء ابوي امس من سفرته ويقعد يحس بالولد مع اخوي ويقول هذا مالقى غير بنتي ياخذها
الحين احنا في مشكله كبيييييييييييييييييييييييره
الاوله اني تعلقت بالولد
والثانيه عمه راح قال لابوه باللي قاله له ابوي والابو زعلان على ولده يقول كيف تقول في المجالس اني مريض ومقعد لانت ولدي ولااعرفك
الولد مقهور عشان ابوه زعلان عليه
انا فكرت اتصل واعتذر من اللي سواه ابوي لامه بس احسها بايخه في حقي بتقول ذي مطفوقه ميته على ولدي وفكرت اخلي اخوي الكبير عمره 28 سنه يتصل ويتعذر
دعواتكم يابنات ان الله يفرج همي
والله ماوقفت لي دمعه
هذا الانسان الوحيد اللي استخرت الله فيه وارتحت له
ادعووو لي تكفون الله يفرج كربكم
انصحوني وش اسوي ادق والا يدق اخوي لانه مستحيل ابوي يدق