اللهم لك الحمد من قبل ومن بعد

بفضل من ربي ولدت يوم الاحد 20 رمضان الساعة عشر ونص الصبح

بعد طلق استمر اسبوعين والرحم مفتوح 2 سم لكن الحمدلله ربي يسرها..

كنت مرة متضايقة عشان دكتورتي سافرت يوم 15 “دكتورة عبير بمستشفى غسان فرعون”

بس الولادة تساهيل من رب العالمين وولدتني دكتورة أمل اللي أول مرة أشوفها وكانت حبوبة..

للعلم المستشفى قمة بالعناية والنظافة والاهتمام وماشاءالله هذي ولادتي الثالثة عندهم وما فكرت أغير رغم إن التأمين يشمل كل المستشفيات الكبيرة مثل الطبي الدولي والاطباء المتحدون والالماني وسليمان فقيه..

أنا كتبت الموضوع لأني حبيت أفيدكم مثل ما استفدت منكم الله يسعدكم وهذا اللي عندي:

– من دخول التاسع وأنا دايم أشرب زعفران وماء زمزم وآكل تمر وملعقة عسل ع الريق..

– أول مابدأ الطلق وميزته عن باقي الالام عبيت البانيو ماء داااافيء وقعدت فيه والحمدلله ساعد على فتح الرحم وحمى الطلق وهذي نصيحة دكتورتي

كان يجي كل عشر دقايق وبعد ما طلعت من الحمام تكرمون صار كل أربع دقايق وعلى طول ع المستشفى وبالسيارة كل دقيقتين..