اللهم اجرني في مصيبتي و اخلف لي خيرا منها .. قصتي مع التلقيح المجهري.. ابي رأيكم !!!!

قبل أي شي … بأختصر لكم قصتي للي ما يعرفوني..
انا متزوجه من خمس سنين تقريبا .. و للحين الله ما رزقني بالاطفال
سويت من قبل … 4 تلقيح صناعي و عملية تلقيح مجهري … لكن للاسف ما نجحوا

و هذي ثاني عملية تلقيح مجهري اسويها:

الحمد لله على كل حال ….
سويت عملية تلقيح مجهري لكن الحمدلله على كل حال …. فشلت
لكن للحين محتاره … تدرون ليش؟ راح أقولكم ليش….
بس بأسولف لكم من الاول و بالتفصيل …
الدوره جتني ب رمضان كانت 19/9/2008
و رحت للدكتور ب ثالث يوم للدوره عشان يسوي لي سونار بعد ما سويت تحاليل هو كان طالبها مني
الدكتور: هو ماجد الشمري في منطقة الجهراء
الكل مدح لي الدكتور …و قالوا شاطر
المهم … عطاني أبر تنشيط المبايض من من ثالث يوم دوره الى ثامن يوم
يعني من 21/9/2008 الى 26/9/2008
يوم 27 ما اخذت شي
يوم 28/9/2008 كان موعد الابره التفجيريه
يوم 29/9/2008 كان موعد سحب البويضات و أعتقد خذوا الحيونات المنويه من زوجي
ملاحظه: الدكتور يسوي عمليات اطفال انابيب و تلقيح و لكن في أي مستشفى خاص …
المهم سويت العمليه بمستشفى منصور العرف …
طبعا كان السحب ب بنج يعني ما حسيت بشي
الحساب: 900 عند السحب + 200 عند الترجيع + 50 بنج للترجيع اذا تبين… تخيلوا زادوا الاسعار قبل عمليتي ب 3 أيام … الدكتور قايل لنا انه 750 عند السحب و 150 عند
الترجيع … لما رحنا انصدمنا … و استلفنا الفلوس ..
و لازم اكون صايمه بيوم السحب … لكن الدكتور ما كان قايل لي …
انصدموا لما قلت لهم اني فاطره …لازمه صايمه …
لكن عادي سوا لي السحب
يوم 2/10/2008 يوم الترجيع
دق علي الدكتور و قال انه سحب 4 بويضات لكن بس 2 اللي راح يرجعهم
طبعا حزنت و قلت دكتور انا بعمليتي الاولى طلعوا لي 9 بويضات و رجعوا لي 4
قال عادي …و قعد يقنعني انه عادي …. لكني حسيت من كلامه انه استعجل
لانه قال : اذا نطرنا نخاف تخرب البويضات الزينه و ورانا عيد …
و قال: تبين عملية الترجيع بعد العيد و لا قبله؟
قلت اي شي اللي يناسب العمليه
المهم كانت عملية الترجيع أعتقد بثاني أو ثالث يوم عيد
كان ضايق خلقي …. كنت اقول بقلبي الناس كلها مستانسه تعيد
و أنا أفكر بالعمليه تنجح ولا لا
طبعا بيوم الترجيع لازم أكون صايمه
و نفس ما قلت لكم دفعت 50 دينار زياده عشان البنج
هي عادي من غير بنج لكني أخاف اتحرك و أضايق الدكتور
و قال لي بعد الترجيع بأسبوعين تسوين فحص الحمل
يعني اسوي الفحص بيوم 1210/2008
لكن ما رضيت أسوي قلت بأنتظر الى يوم الخميس او الجمعه و أسوي الفحص
لاني تعقدت
المهم …
في يوم 13/10/2008 نزل علي شوية دم … قلت هذي دوره … ضاق خلقي و كانت فيني بجيه لكن قلت لا ما راح أبجي و صبرت نفسي عشان ما اضايق امي … كان هالكلام الساعه 2 الا ربع بالليل
لكن لما قمت من النوم ما لقيت لا دم ولا دوره ولا شي … استغربت
احترت هي دوره ولا لا
قلت بأنطر للمغرب ان ما نزل شي بأحلل
و شبكت و سويت بحث عن : دم انغراس البويضه
و لقيت بنات كثير يقولون انه بيوم الدوره ينزل عليهم شوية دم و يطلع حمل
استانست و قلت ان شاء الله اكون نفسهم
نطرت للساعه 7 و رحت المستشفى سويت فحص دم …
طلعت النتيجه 1 فاصله 9
1.9
قالوا لي يمكن حمل … تعالي بعد 3 أيام عيدي التحليل
كلمت الدكتور قال هذا مو حمل …. سالب
قلت ما عليه … بس ليش ما نزلت الدوره؟
قال: يمكن تتأخر يومين … عادي
لكن لليوم ما نزل شي … بس بعض المرات ينزل سائل بني … أتوقع انها بداية الدوره
ما احب أصير معلقه
و الله احساس صعب
لكني حاسه ان الدوره راح تنزل
والله اعلم
قلت بانطر ليوم الجمعه ان ما نزلت الدوره بأحلل مره ثانيه

ملاحظه:
كنت مريحه نفسي ع الاخر في بيت أهلي
طول الفتره اللي طافت نايمه عالسرير و ما اتحرك الا للحمام و الصلاه … أصلي وانا قاعده عالارض
كان عندي احساس اني حامل بسبب:
* تجيني نغزات و حكه خفيفه بصدري
* نغزات و الم بسيط بالمبايض اليمين و اليسار
* حبوب صغيره على جبهتي
* أهلي و زوجي قالوا لي محلوه و و سمنانه ( قلت اكيد من الراحه )

اليوم جيت من اهلي لشقتي مع زوجي …. و يا عمري ما يبيني اشتغل ولا اسوي شي الا لما تنزل الدوره
الكل للحين مأمل انه حمل …. و يقولون لا تتحركين
والله احترت و ما ودي ابين زعلي عشان زوجي و اهلي ما يتصايقون
و الله يا بنات أصعب شي الفتره اللي بعد عملية الترجيع ….
ودي افرح و أقول حامل لكن اخاف أزعل ان نزلت الدوره و ودي ما افرح و اقول العمليه ما راح تنجح لكن ما اقدر
فعلا هالفتره اصعب شي بالعمليه
كل هذا و ما قلت لكم عن احساسي ….. بعد و قبل العمليه …
و الله ما اقدر اعبر عنه بالكلام … لكن ما اتمنى لاي وحده تمر بكل اللي مريت فيه
حتى لو كانت عدوتي ….
الحمدلله على كل حال