القــيـصــريــه… وتجرتبي التي لا تنسى)”:

حبوباتي الحوامل انا قبل اربع شهور جبت بنتي بعلميه قيصريه وانا بكريه اول مولوده لي وحابه انقل لكم تجربتي معاها وبعد اقول لكم عن اللي استفدته من هالتجربه الاولى لي وبصراحه محد بعيلتنا اعرف مسويه عمليه قيصريه عشان كذا تعبت مره مالقيت احد يدلني ايش اسوي وايش ماسوي تبهذلت والله فالمستشفى اربع ايام انواااااع العذاب وكنت اسوي اشياء على بالي صح والمستشفى ماقصر بهذلني ولا اهتمام ولا شي اقلها لو كنت عارفه ما كان سمعت كلامهم بس للاسف ➡
المهم تجربه وعدت بقول لكم بس اللي استفدته ..

1- لازم تعرفين قبل لا تولدين من الدكتوره حقتك اذا بتولدين طبيعي والا قيصريه لاني انا كنت داخله المستشفى من الساعه 12 بالليل وظليت امشي بالممرات لحد الساعه 10 صباح عشان يفتح الرحم لانه كان 3,5 باقي شوي ويفتح 4 وقالوا لي اذا اربعه خلاص بعدها السته الباقيه تجي بسسرعه والله يا بنات مشيت مشي الويل بالممرات ما ارتاح الا شوي وارجع اقوم امشي طبعا غير المشي اللي قبل بايام بالبيت رجولي انتهت لان الممرضه قالت لي البكريه صعب شوي ينفتح الرحم عندها راح ينفتح لكن ببطء مو مثل اللي عندها عيال والساعه 10,30 جوني 3 استشاريين قالوا انتي لازم قيصريه تصورواوالله لو دريت ما مشيت ولاتعبت حالي كل ذاك التعب بس ماقول الا الحمد لله لاني بصراحه بعد الولاده كل ذاك المشي طلع على يارب لك الحمد ولا تحرمين الاجر يارب

هذا اول شي اعرفي طبيعة ولادتك قيصريه والا طبيعيه وعلى اساسها ضبطي وضعك

2- بعد العمليه القيصريه اهم شي اهم شي اهم شي المشي على طول قومي امشي اول ما تصحين من البنج ويفكون عنك المغذي وتحملي الالم انا على بالي مو بزين امشي لان المي كان شديد بشكل فضيع ثاني يوم من العمليه والله امسك على بطني واصيح وماقدر اتحرك من على السرير غير الممرضه تقلبني يمين يسار وربي حتى لما احاول اقوم من سريري انواع التعذيب كل حركه احسب لها الف الف الف حساب وين احط رجلي كيف امدها كييف انزلها كيف البس الشبشب تكرمون كيف كيف ااااخ ياربي 😀 بس تشجعت انا واللي معاي بالغرفه وقمنا نمشي بالغصب ونصيح ونبكي بس لازم نتحرك لازم عشان نصير اوكي

2-تدفوا زين زين زين زين لاني المستشفى حسبي الله عليهم المكيف شغال و عالي متنا برد وانا مو حاطه احتياطي ابدا ابدا مت من الالم والتعب واساسا كان على بالي عادي بس سالنا وحده والده قيصري خمس مرات يعني خبره وهي قالت لنا

3-خلوا اهلكم يجيبون لكم اشياء دافيه لازم دافي وابعدوا عن البارد حسبي الله على المستشفى يجيبون عصيرات وايس كريم تصوروا وانا اكل اقول اكيد هذا زين لي علي بالي عندهم ذمه وضمير بس للاسف وانا اكل واللي جنبي بالغرفه تقول لي لا لازم دافي قلت لها هم جابوه شدعوه ما بيجيبون شي يضرنا ع<<<<على نياتي حسبي الله عليهم 🙂

4 –امشي وانتي ناصبه ظهرك ابدا ابدا لا تحنينه لان احيان من الالم تحنينه غصب عنك بس حاولي ماتحنينه قد ما تقدرين عشان ما يشد عليك الجرح بعد فتره..
وربي يا بنات كانوا يجيبون لي بنتي عشان ارضعها احيانا اقولهم رجعوها الحضانه ماقدر ماقدر اتحرك من على السرير وابكي بكا الويل ورب البيت كان ودي احضنها اول ماجبتها بس ماقدرت والحمد لله رب العالمين..

5-حاولي لا تبكين ولا تضحكين ولا تسولفين كثير والجوال ابعدي عنه الضحك والبكا بيشد الجرح معاك وتحسين انه بينفتح حاولي تمسكين نفسك يا كثر ما بكيت والله يوم جت امي واهلي يزوروني امسك على بطني واصيح يارب رحمتك بس الحمد لله والجوال لا تكلمين فيه كثير وربي تحسين الهوا يدخل يدخل بشكل غريب سبحان الله مع اذونك وفمك وخشمك ومع جرح العمليه سبحان الله وربي شي غريب حتى ايام النفاس وربي احس اني مفتوحه من كل مكان الهوا يدخل من رجولي واذني وخشمي وجلدي وراسي وشعري شي غريب والله العظيم بس اهم شي تدفين وتتغطين زين..

6 –امي يوم جاتني جابت لي مره منقوعه بماي وقالت لي مسحي فيها اظافر ايدينك ورجلينك وشمي منها؟؟؟ استغربت بس حتى اللي معاي بالغرفه والده قيصري وتسوي نفس الشي وهي عندها 8 عيال ما شاء الله رايحه جايه على هالمره..بس بصراحه مدري ليش يسوون كذا ؟؟؟؟

7 –لرجعتي البيت اهتمي بالجرح استخدمي المسحه الطبيه وامسحي فيها الجرح كل يوم ولا تنسين اذا تسبحتي عادي ترى تتسبحين حتى لو جت ماي على الجرح والشامبو والصابون بس لاتفركين مكان الجرح ولما تطلعين نشفي مكان الجرح زين بفوطه نظيفه او كلينكس وامسحي عليها بالمسحه الطبيه على فكره انا كانت خياطتي تجميليه واليوم الثاني من العمليه فكوا اللزقه اللي عليها وفكوا شي ماشفته بس حسيته مثل دبابيس الدباسه غريب والله

8-خذي ملينات ولاتاكلين اشياء صلبه عشان ما تتعبين بالحمام وانتي بالكرامه
9- اكرر واقول المشي المشي المشي والحركه لا تخلين الالم يخليك حبيسة الفراش والله ماشفت العافيه الا بعد ما قمت اتحرك قسما بالله اول مارجعت البيت حتى الشراب ما قدرت البسه وناديت اختي وقلت لها بطلب منك طلب وانا ابكي حزينه على حالي احس بعجز مو طبيعي يارب لك الحمد على العافيه والله لبستني واشوف الحزن بعينها 😆 idea: يارب لك الحمد على كل حال
بفضل لله ثم فضل امي اللي دارتني مداره والله انها كانت نعم الام الله يحفظها ويخليها لي هي وابوي وخواتي ومرة اخوي وكل اللي بالبيت جزاهم الله عني كل خير وجميلهم ماراح انساه شالوني شيل وربي شفت الموت لولا الله ثم هم ما ظن كان عشت بعد اللي شفته

وانا بحمد الله شفت العافيه وتحسنت تقريبا بعد عشرة ايام يعني صرت امشي شوي شوي والالم خف وشوي شوي امي تدخل لي اكل قاسي واطلع اسولف مع اهلي واضحك شوي شوي ويارب لك الحمد الحين بنتي اربع شهور ما شاءالله
الدكتوره قالت لي الحمام المغربي والبخار بعد 3 شهور والرياضه بعد 6 شهور هذا كلامها لي والله تعالي اعلم

واعيد واكرر ان اكبر سبب بمعاناتي هي الجهل بالولاده واقول اعرفي من دكتورتك كيف راح تكون ولادتك طبيعيه والا قيصريه عشان ما تتفاجئين مثلي و تتخذين اللازم تقرين وتعرفين وتستشيرين وتسالين اكثر والله يعينكم وييسر لكم اموركم يارب وتفرحون يشوفة عيالكم
مابي اخوفكم بس حبيت افيدكم باللي مريت فيه واهم شي البكريات عشان تعرفون وتستفيدون واكيد فيه غيري عندهم خبره اكثر واذا فيه شي خطا باللي سويته يقولون عشان اتفاده مره ثانيه وان شاءالله تستفيدون باذن الله وعسى القى لي دعوه طيبه ولزوجي وبنيتي الله يحفظهم لي قولوا امين