عالم البنات النسائي كل ما يخص المرأة العربية من ازياء وجمال والحياة الزوجية والمطبخ
انهاردة جايالكم طريقة الرز المعمر في الفرن من مطبخي …
المقادير:
رز مصري بالكمية االلي تحبيها
لبن ( اللي هو بيسموه حليب في السعودية مش لبن رايب و لا حاجة )
بهارات و ملح و فلفل و قرفة
قشطة بالكمية اللي تحبيها ( انا بحط علبة قشطة و زياده شوية على البرام )
الطريقة :
طبعا أهم حاجة هو البرام الفخاااااار .. مش حينفع لا في حلة و لا بيركس و لا أي حاجة غير البرام الفخار بتاعنا و بس …
1- من قبل ما تعملي الرز بيوم خدي الكمية اللي تحبيها و اغسليها كويس و بعدين انقعيها في البرام مع اللبن الحليب ( انا بستعمله قليل الدسم عشان يكون خفيف )بحيث ان اللبن الحليب يغطي الرز تماما …و تنقعية على الأقل 3 أو 4 ساعات و انا بنقعها من قبلها بيوم (12 ساعة )..بس أوعي تملي البرام لان الرز حجمة بيتضاعف ..خلية ياخد تلتين البرام كده ..
2- قبل ما نحطها في الفرن نضيف البهارات و الملح والقرفة و القشطة …( برضو في قشطة قليلة الدسم في الأسواق لو حابين )
3-تحطيه في الفرن على نار متوسطة لحد ما يستوي و يعمل وش كده ( و انا بشيل الوش بعد كده عشان مش بيحبوه عندي
4-طبعا لو حنعملي معاها فراخ أو حمام …أنا بسلق الفراخ الأول كويس و بعدين بدهنها خلطة مكونة من ( زيت زيتون -صلصة -بهارات – ملح وفلفل و زعتر – ليمون معصور -قليل من الشوربة ) و ادهن بيهم الفراخ و احطهم في الفرن لحد ما تاخد وش حلو و أحطها على البرام …..و يتسخنوا سوا في الفرن قبل الأكل مباشرة ..
طبعا مع الحمام المحشي بيكون أحسن من الفراخ …معاهم شوربة لسان عصفور أو شوربة فراخ بالكريمة ….. تبقى خطيييييرة
عند ابوشقرة بالشئ الفلاني الأكلة دي 💡
و بالهنا و الشفا …..
