عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم
كيفكم يا أخواتي الفراشات الله يعلم معزتكم عندي واني بعتبركم متل خواتي وبفضفض لكم اكتر من أي حد تاني
أنا إلي متزوجة سنتين و5 شهور و الحمد لله حملت مرتين وأجهضت مرة في الأسبوع 7 ومرة في الأسبوع 10
عادي حياتي استمرت وراضية الحمد لله وكنت بتابع عند دكتوري وما خليت تحليل ما عملته بعد الاجهاض ( الجرثومة والأجسام المضادة وووووو وكل الي طلبوه مني ) والحمد لله طلع كلو سليم
المهم شهر 4/2009 الدكتور بدأ معي كورس منشطات ابر تحت الجلد وابر مينوجون وفستيمون وطلع 3 بويضات ونضجوا والدكتور حدد أيام للجماع وقلي اذا اجا يوم 16/5 وما اجت الدورة فإنتي أكيد حامل بدون متفحصي .. صرت أنتظر وكل يوم الأمل بيزيد وبدعي ربنا يرزقني الحمل وأخذت بالأسباب وبديت أخذ فوليك أسيد وخلص بتعامل مع حالي كإني حامل ,,,, يوم 10/5 تفاجأت انو الدورة اجت , انجنيت لأنه دورتي منتظمة عمرها ما قدمت عليا يعني هيا اجتني يوم 23 وأنا بالعادة دورتي 28 أو 30 يوم بس قلت الحمد لله ارتحت من عناء الانتظار 😆 وبهذه الفترة كان عندي اختبارات وما رحت للدكتور الشهر اللي بعده قلت خلص ما بدي منشطات المهم مشينا حياتنا عادي انا وزوجي ومشي الشهر ويوم 28 من الدورة رحت فحصت دم رقمي وأنا كان عندي احساس اني حامل لأني كنت متابعة الأعراض وحافظاها من الحملين السابقين هذا الكلام يوم 6/ 6 وكان عندي اختبار نهائي رحت عالمختبر قبل الاختبار وأخذوا مني عينة وزوجي ما بيعرف كنت ناوية أعملها مفاجأة لكن الصدمة انو النتيجة كانت
0.0 ( صفر )
انصدمت ,,لكن قلت اللهم اجرني في مصيبتي هذه وأبدلني خيرا منها وروحت البيت عادي ما قلت لزوجي خفت أكسر بخاطره قلت بقوله بعدين
ويوم 30 من الدورة رحت للدكتور عأساس لو بدي أبدأ كورس منشطات يقلي شو التحاليل اللازمة
الدكتور يومها أحبطنا الصراحة … سألني اجتك الدورة قلتله لألأ قالي عادي استني كم يوم وبتنزل ولا استنضف يفحصني أو يعمل التراساوند يشوف يمكن عندي مشكلة وقالي لما تجيكي الدورة تعالي عشان بدك تعملي أشعة الصبغة 👿 أنا لما سمعته انقهرت لأني بعرف انها بتنعمل مرة بالعمر ليش انا أعملها مرتين واشوف الوجع والعذاب كمان مرة بس قلي احتمال صار انسداد في الأنابيب بسبب الاجهاضات وخصوصا اني ما عملت تنظيف بعدهم
وقالي بعدها اما حنعمل حقن أو طفل أنبوب وأنا مااااااا بدي لأنو أنا وزوجي ما عنا مشاكل ليش التعب والمصاريف بعدين الطبيعي أحسن
روحنا انا وزوجي قمة الاحباط ما حكينا مع بعض ولا كلمة طول الطريق لإنو الدكتور فقدنا الأمل انو أحمل طبيعي
مر يوم يومين وما اجت الدورة وكنت ممغوصة كتير وحاساها حتنزل وبستناها
يوم 11/6 قلت اعمل كمان مرة تحليل رحت عملت طلعت النتيجة
6.1
زوجي الي جابها بعتلي مسج قلي حضري حالك لأبرة الزيت ( الصبغة ) لأنو مكتوب في التحليل اذا اكتر من 10 بيكون حمل …. عادي انا كنت متوقعة انو مش حمل ما انصدمت
بس لما روحت البيت قلت لزوجي طيب ليش الهرمون بيزيد المفروض يضل صفر خصوصا اني مش ماخذة ابر هذا الشهر … مسكين تأمل وقلي انتي الدورة ولا مرة تأخرت عليكي يمكن حمل واشترالي فحص بول عملته طلع
ساااااااالب
انا عادي خلص فاقدة الأمل الي مجنني هو متأمل كنت حزنانة عليه وبضل أحكيله عدها اجت ممغوصة تعبانة لكن بردو ضل عنده أمل صار كل ميطلع من البيت يرجع جايب فحص لدرجة صرت أفحص 3 مرات باليوم وكلو سلبي ويوم 13/6 الفجر فحصت طلع خياااااال خط يعني خط وهمي زوجي قلي فيه خط خفيف قلتله لا لأنو طلع بعد مدة مش ع طول يعني الفحص غلط …. ما كذبنا خبر الصبح رحنا عالمختبر وفحصت طلعت النتيجة
17.7
الهرمون تضاعف بس النسبة قليلة انا بحملي الأول طلعت النتيجة 111
المهم كلمنا دكتور تاني غير اللي بتعالج عنده لأني كرهته وقلت ما راح أرجعله , قال تعالولي وأنا ايدي ع قلبي لما رحنا صورني وقال في كيس حمل وكتب لي مثبتات ابر وحبوب .
يالله … ما صدقت… قديش فرحناااااااااااااا 😛 معقول أنا حامل بعد كل هالعناء والتفكير والتعب
روحنا البيت طايرين من الفرح وخبرنا حماتي باركتلي واجو أهلي في الليل والحمد لله ربنا فرحنا
ومرت الأيام وأنا طبعا مرتاحة عالآخر وبتدلل 😎 لأنو حملي عزيز متل مبيقولو وكنت ما أطلع من البيت إلا للضروري بس كنت أروح أقدم امتحاناتي وأرجع ( على فكرة انا كان أخر فصل الي بالجامعة يعني الفرحة صارت 2 فرحة الحمل وفرحة التخرج )
وخلصت امتحانات يوم الأحد 5/7/2009 وكل شي تمام ورحت للدكتور أتطمن صورني قلي مبين كيس بس مش مبين النبض وأنا كنت بالأسبوع 7 مفروض بس قلي انتي حملك صار متأخر عادي ما تقلقي يعني
واعطاني موعد 11/7 عشان أسمع نبض البيبي وأنا كنت كتير قلقانة وبعد الأيام باليوم عشان أتطمن على جنيني وكنت استودعه دايما وأدعيله …….
لكن يوم 8/7 الأربعاء صار اللي خايفة منه وما بدي اياه
نزل عليا دم وافرازات بني
انا من أول م شفت هذا المنظر خلص اتحطمت مش مستوعبة نفس اللي صار معي الحمل اللي فات والغريب انو بنفس التوقيت يعني الأسبوع 7 قعدت أقرأ على بطني وأدعي طول اليل وانا من جوه عارفة انو خلص هذه بداية النهاية لكن قلت ربنا كبير قادر يعمل كل شيئ ممكن تكون شغلة عابرة وتروح
وتاني يوم رحت للدكتور صورني وأنا قلبي بيدق مليون دقة في الدقيقة خايفة يقلي ما في نبض اول محط الجهاز على بطني يدور وأنا أتطلع عالشاشة مش شايفة اشي قلت شكله الكيس فاضي ( معذورة والله الي شفته قبل مش سهل )
المهم بعد دقيقتين ثبت الصورة وقلي هي البيبي تمام والنبض كويس وانتي بالأسبوع 7 واعطاني موعد ولادتي وقعد يطمني وقلي لازم راحة تامة وأهم شي النفسية تكون مرتاحة
قلتله كيف تكون مرتاحة ما تضحكوا عليا انا حاسة انو الأيام بتعيد حالها كل شيئ بيتكرر زي الحملين اللي فاتوا…. روحنا وتوكلت على الله وفعلا ضليت مرتاحة وقرأت سورة البقرة على بطني وضليت أدعي
يارب تجبر بخاطري وخاطر زوجي
يارب تثبت حملي وتتمم لي على خير
يا رب لاتذرني فردا وأنت خير الوارثين
يارب استودعك جنيني اللي في رحمي
يارب احفظه وفرحني بشوفته سلم معافى
وأدعي وأدعي يوم الخميس زاد الدم وصار ينزل قطع صغار زي الخيوط وكمان يوم الجمعة زاد أكتر واهلي يقولوا ما تقلقي فلانة صار معها هيك وضل وفلانة وفلانة وانا بسمعهم لكن من جوه قلبي بيقلي انو خلص حينزل:P وكنت ممغوصة كتير يروح وييجي الوجع ……
وامبارح الجمعة الساعة 6 ونص العصر نزل الجنين 3 قطع صغار بعد تعب ربنا يعلم فيه لكن وجع الجسد خلص بيروح وبينتسى بس وجع القلب ولا عمره بيروح حاسة قلبي بيتقطع نفسي أحمل وأجيب ولاد يملوا عليا البيت وأدللهم وألاعبهم يارب ما تحرمني هالنعمة,,,,,,,, انا على فكرة لهلأ مش مستوعبة شو اللي صار كإنه حلم مش قادرة أصدق انو خلص كل اشي راح ورجعت لتحت الصفر والله نفسيتي محطمة ومالي نفس لإشي ولا طلعة ولا اجازة ولا شي 👿
ربنا يعوضني أحسن منه يارب
➡ 😉 😐 😛 😡 ❗ 😐
اللهم أجرني في مصيبتي و أخلفني خيرا منها
اللهم أجرني في مصيبتي و أخلفني خيرا منها
اللهم أجرني في مصيبتي و أخلفني خيرا منها
يارب عوضني خير وارزقني اجر الصابرين
والله يابنات اني دعيت لكل وحدة محرومة ومتأخرة انو ربنا يرزقها الحمل
والحامل ربنا يتمم لها ع خير ويسهل ولادتها
معلش سامحوني يمكن الأسلوب والأفكار مش مرتبة كنت اكتب هيك تلقائي بس ياريت كل وحدة تقرأ موضوعي تدعيلي ربنا يرزقني الحمل السليم الثابت المعافى ويارب ولا وحدة تشوف اللي شفته
