الحقوني الله يسعدكم تحولت من انسانة لآلة

يا بنات انا صرت آلة تعرفو يعني ايش آلة ؟؟؟ يعني تحولت لمكينة تشتغل 24 ساعة حتى وقت النوم !!

تخيلوا يا بنات معايا

انا بنت عمري 27 سنة ، اشتغل في شغل مختلط طبعا و كله ضغط في ضغط ، من اول اليوم صحيان بدري لحدت اخر دقيقة منه

و بعد هالشغل فين تتوقعو اروح ؟؟؟ اروح للبيت انام و ارتاح زي البني آدمين ؟؟ لا ، اروح الكلية لاني ادرس الماجستير و دوامها من الساعة 6 الى الساعة 11 الليل ، و برضو صارت شبه مختلطة !!!

يعني تلات ارباع اليوم انا برا البيت ، نجي لنفسيتي ، لمن ارجع البيت اكون جدا هلكانة و تعبانة ، و ابدأ أفكر بمشاكلي ، طبعا عندي مشاكل عاطفية ممكن بسببها تخليني افكر انتحر ، و كمان علاقتي مع امي مو كويسة و احلم كتير انه نصير انا و هي صحبات و اشكيلها مشاكلي من غير خوف ولا قلق ، لكن هيهات !!!

لا و لسه ، قبلها اخدت اجازة تسعة ايام لانه كان عندي اختبارات final ( نهائية ) و بعد الاختبارات ما ارتحت دغري رحت الشغل لانهم طلبوني !!!

بالله عليكم بنت عايشة هالعيشة ، فين ما تروح مشاكل و مشاغل ، بالله ما راح يكون عندها 100 سبب و سبب عشان تفكر تنتحر ؟؟

و الله انا اشوف مشاكل البنات في افتح قلبك و الحياة الزوجية و قسم المطلقات ، قال ايش ؟؟؟ زعلانين عشان لا شغل و لا مشغلة و لا وظيفة و لا عريس ؟؟ نفسي اعرف من فين يتحصلو على هالوقت الفاضي ؟؟؟ و الله اني احسدهم عليه ، صارت اكبر احلمي احس بوقت فراغ + انام مرتاحة البال و سعيدة !!!

انا حطيت لكم يوم من ايام حياتي عشان البنت اللي زعلانة لانه عندها وقت فراغ ، تحمد ربها على النعمة اللي هي فيها ، غيرها جاته امراض نفسية مزمنة بسبب كترة المشاكل و قلة النوم !!!

و دحين انا طالبة المساعدة ، اللي عندها اي وسيلة من وسائل الاسترخاء ، للشعور بالراحة ، ، للحصول على نوم عميق لمدة يومين فقط يتفضل يحطللي هي هنا ( اختكم اصيبت بالارق و الامراض النفسية المزمنة )

و ابغا اسأل سؤال ، تتوقعو التنويم المغناطيسي مفيد لحالة زي حالتي ؟؟ ، او تعرفو اي طريقة لفصل البني آدم عن الحياة ( غير الانتحار ) ؟؟؟

اعرف ممكن تقرو كلامي و انتو تضحكو ، بس ياللي تضحكي و فاضية في دا الوقت و في اي مكان كنتي فيه تراني اغبطك على حالك ، و الله اني بحاجة للراحة