عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمه الله وبركاته
الاكلات البحريه طبعا اساسها بورسعيد واسكندريه انهارده قلت بما انى بورسعيديه 
يبقا لازم اعملكوا حاجه من المطبخ البورسعيدى فعملتلكم جمبرى وسيبيا ومعاهم بيتنجان بطريقتين يارب يعجبوكم ❗
الجمبـــــــرى
كميه الجمبرى الموجوده بقشروا
3 طماطم متوسطه
4 فلفل اخضر
بصله كبيره
فلفل وملح
الطريقــــــه
قطعى البصل والطماطم والفلفل لشرايح او حلقات وضيفيهم على الزيت كده
قلبى مره او مرتين وضيفى الجمبرى المغسول طبعا وضيفى الملح وفلفل وقلبى كويس
بعد شويه قلبى تانى هتلاقى الجمبرى نزل الميه بشكل دا من غير متضيفى انتى حاجه
ودا الشكل الاخير كان روعه
السيبيــــا :
سيبيا مقطعه شرايح
ملح – فلفل – كمون
4 فصوص توم
كارى
للقلى :
دقيق – بقسماط
تبلى السيبيا بالثوم والملح والشطه والفلفل والكارى والكمون ( زودى الكمون ) وسيبيه وقت ميقلش عن ساعتين كده
وبعدها حطى السيبا فالدقيق والبقسماط
واقليها فالزيت
سبيها عالنار تستوى براحتها علشان تطلع مستويه
ودا شكلها الاخير
عملت بتنجان مدئلج فالزيت زى مبيقولوا عليه
طريقتوا
اغسلى البتنجان وسخنى زيت وتكونى فاتحه البتنجان من النص بالطول واقليه فالزيت وتكونى محضره توم مفروم وشطه وملح وفلفل اخضر ودقيهم كلهم مع بعض لحد ميبقوا مهروسيين خالص احشى بيهم البتنجان
واعصرى على البتنجان ليمون بيكون روعه مع اكلات كتير .
الفلافله والبتنجان
اكيد معظمنا عارفها هى مش مسقعه
بتجيبى البتنجان وتقطعيه والفلفل بردوا
وتقليهم فالزيت وبعدها تكونى مقطعه حبتين طماطم ومقشراهم وفصين توم ومجهزه خل
تحطى حبه زيت وضيفى عليهم التوم يادوب يحمر ضيفى الخل وقلبى شويه وبعدها ضيفى الطماطم
وزودى الملح والفلفل بتوعك وضيفيه على الفلفل والبتنجان المقلى بردوا دا حلو فالتلاجه مع اكلات كتير
ومنستش طبق الطحينه
ودا طبق سيبيا بالبطاطس لمحبى التغيير 
دى طريقتها زى مبنعمل صينيه البطاطس بالضبط بس مع البصل ضيفى السيبيا
وبالهنا والشفا 😆
