الانسان ضعيف >>يارب ارحم ضعفنا

الانسان ضعيف يارب ارحم ضعفنا

يارب ارحم ضعفنا وارزقنا بذرية الصالحة

اسفه اذا ازعجتكم بس احب افضض لكم احس براحة والله

اليوم رحت ازور اختي متنومة في المستشفى دعوااتكم لها الله يسهلها ولادتها

وتقوم بسلامة هيا والبيبي

وانا جالسة هناك قسم بالله جالسة ادعيلكم كلكم
وادعي لنفسي واقول يارب لا تحرمنا
وانا لمن خرجت من عندها شفت الحضانة لا شعور جلست ادمع ادمع
شفت لوحة مكتوب عليها قسم الولادة والحضانة والخ شفتها ودموووع زي المطر دعيت لي ودعيت لكم

انا اتزوجت وكان عمري 16 عشت حياة عادية بعد سنة من زواجي صرت اسمع من حولي اللي ما تحمل خلال سنة تجلس طول عمرها ما تحمل
كلام اهل زوجي
بس ما كنت اهتم كنت اقول لسه بدري مرت سنة سنتين زي اي وحدة تشتاق للامومة
كلما اشوف وحدة من اخواتي و سلفاتي كنت اقول يارب متى يجي هاليوم متى اشوف كرشتي ومتى ومتى

كنت اروح ارافق مع اخت زوجي وسلفاتي

وبداءت اتعالج من مستشفى الى مستشفى كلما اسمع هذي الدكتور كويسة اروح لها
كلما اسمع عن الداية
اروح لها

بصراحة زمنها لا كنت استغفر ولا اقراء البقرة ولا اي شي
بس زي المجنونة من دكتورة الى دكتورة من دايه ل دايه جهل مني طبعا

مرت سنين وانا على هذا الحال
بعدها نقلنا جده وتركت العلاج لفترة ورجعت اتعالج
عند دكتورة الله يسامحها كل همها الفلوس
جات فترة حسيت اني ما راح احمل
حاولت اروح دار الايتام اتبنى بطفل بس عشاني اجنبية ما اعطوني
طلعت لبلدي وهناك بعد تعب لقيت بنوتة توها عمرها 5 ايام
مرة فرحت فيها اتعلقت فيها وربي النعمة حسيت انها بنتي اني انا اللي جبتها
مرة كنت طايرة فيها سميتها وجود
كل يوم افكر لمن ارجع السعودية وكيف اسويلها حفلة وكيف زوجي راح يستقبلها وكيف تكون حياتنا

بعد شهر البنت مرة تعبت مررررررررة صحيح انها بلدتي بس انا هناك كنت غريبة مرة ما اعرف المستشفيات ولا اي شي
رحت مع عمتي مستشفى وعلى طول دخلوها عناية المركزة مرة كنت خايفة وانا في بلدتي بس والله اني كنت في الغربة

المهم البنت جلست يومين في المستشفى 3 يوم جات الممرضة سحبتها مني واخذتها في عناية خاصة
انا كنت في الانتظار قمت ادور مصحف يوم لقيت المصحف جلست اقول الحين اقراء وادعي ربي ان شاء الله يطمنوني عن البنت
وانا جالسة اقراء نادوني قلتلهم نعم قالو بنتك اتوفت يالله يالله يالله اتوفت بكيت بكيت
بكاء هستريا
كل اللي حولي يهدوني جلست يوم وانا بس ابكي تاني يوم رجعت على جده

وانا متحطمة منكسرة

مرت الايام وشهور اتصلت بنت خالتي
وقالتلي ان في وحدة في مكه حامل ببنت وما تبغاها قلت كيف ما تبغاها قالت عندها درزن بنات قلت ولو قالت اول ما عرفت انها بنت تبغى تنزلها قلت
تكفا لا تنزلها انا ابغها لالا تسوي في البنت اي شي

رحت اكلم زوجي مررررررررررررة ما اقتنع مررررررررة صرت اترجاه شاف حالتي اقتنع

مرة كنت مبسوطة دائما الانسان طماع
كنت اعد الايام عشان تولد واخذ البنوتة

يوم جات تولد اتصلت عليا وقالت انا في المستشفى تعالي على طول انا واختي وزوجي طيران رحنا على مكه

يوم رحت كانت والده وقالت خلاص خذيها ما ابغاها انا
شلتها وضميتها مرة كنت فرحانة فيها

جبتها عندي بعد اسبوع تتصل عليا ام البنت وتقول رجعي بنتي
اقلها نعم رجعي بنتي

قلتلها انا ما طلبت انتي اعطيتني برضاكي

قالت سلفتي تبغاها ما عندها اطفال
قلت انا بعد ما عندي الحين تضحكي الخلق عليا حرام عليك قالت الا ابغى بنتي

قلت ل اختي خلاص اوديها ل امها
وديتها وانا ابكي
رجعت البنت وعلى طول رحت الحرم

وادعي من ربي يارب انت اعطيني ما ابغى من احد الا منك يارب انت تعطي ماتزل الناس زلتني

يارب ارحم بضعفي
ما ادري اول مرة احس اني اقتربت من ربي ودعيت من قلبي

رجعت جده وعرفو اهل زوجي اللي صار يضحك عليا واللي يتكلم عليا

مرت كم سنة رحت اتعالج في مستشفى الولادة
جلست حوالي سنة وسويت تلقيح صناعي وفشل
رحت للتخصصي عشان اسوي انابيب قالو الامر موقف حاليا
هناك جلست ابكي اقول من كل مكان مقفله بوجهي
اختي هدتني قالت ندخل بفلوسنا على الدكتور عادي ما فيها شي هديت واخذت موعد عند دكتور مازن بشارة

رجعت البيت وكلمت زوجي زوجي قال اشبك انتي مستعجله على الانابيب
قلت عمر راح 14 سنة وتقول مستعجلة على ايش حرام عليك

وكلما اكلم اختي الكبيرة عن الانابيب كان ردها مرة قاسي تقول ما جات على الفلوس هذيك سوت وفشلت ومدري مين سوا وفشلت ومديرتنا سوت فشلت مو على الفلوس

كنت اقول حتى لو تفشل ما تجلس حسرة في قلبي اني ماسويت

المهم فترة اللي زوجي قال مرة مستعجلة على الانابيب زعلت ونزلت عند اختي اللي في نفس العماره وحكيتها قالت بكلم زوجي يقنع زوجك زوجها صاحب زوجي
اقتنع زوجي على العملية وبدينا ندبر الفلوس والله عالم بضروفنا امي ساعدتني شوي من هنا ومن هنا والباقي زوجي اتسلف
رحنا للدكتور اول مرة
زوجي مرة ارتاح للدكتور

بديت مرحلة الابر يا متعبة كل اللي جرب عارف
جا يوم السحب كنت مرة مرة خايفة

عدا على خير الحمدلله سحبو 8 بويضات
واتلقحت بس 2
كنت فرحانة في الاتنين
رجعوها وانا استودع اجنتي ومبسوووووطة
انتظار 14 يوم مرررررررررررررة صعب
جا يوم النتيجة رحت المستشفى احلل قال ارجعو بعد ساعة
وانا راجعة اقول لزوجي ان شاء الله يبشرونا بس لو فشلت لا تزعل محنا اول ناس اللي تفشل معاهم
زوجي كان ساكت
عدت الساعة ودخلنا على الممرضة قمت ارتجف من الخوف بس لمن عرفت النتيجة مرة عادي عندي قلت اللهم اجرني في مصيبتي
كل الفترة هذي اللي راحت انا كنت اصلي قيام الليل وكنت اقراء البقرة واستغفر وكتير كنت ادعي يارب اجعلني من الشاكرين وعند البلاء من الصابرين

الهم اخذنا النتيجة ورجعت البيت وعشت حياتي عاديه

وبعد 3 شهور رجعت ابغى اعيد العملية

وبرضووو كله سلف وامي ساعدتني وفي بنات الله يجزاهم كل خير ساعدوني ما انسى اي وحدة ساعدتني الله يريح قلوبهم
دائما اذكر كلهم بالخير وادعيلهم

في شهر 8 رحت للدكتور قال امورك تمام اول ما تجيك الدورة تعالي
تاني يوم الرمضان جاتني الدورة
ورحت للدكتور واعطاني ابر ابره في العضل وابرة في الكتف حااااااااااااااره كانت

بس هالمرة كان احساسي يقول ان شاء الله بحمل
كلما كنت اروح اخذ الابرة كنت ادعي ربي مسني الضر وانت ارحم الراحمين
كل الادعية اللي تيجي في بالي ادعيها
كلما كنت اروح اخذ الابرة الممرضة تقول هذي ابره مرررا حار كنت اقلها اعرف بس الله يسهلها

جا يوم السحب ما كنت خايفة زي مرة اللي قبلها
هذي المرة كان بنج كامل وسحبو ماشاء الله 13 بويضة
بعدما فوقت من البنج جلست ابكي مررررررررة زوجي خاف قال تتالمين قلت لا
جات الممرضة تقول اشفيك فيك الم اقلها لا

انا ما كنت ابكي من الالم لا والله كنت وقتها ادعي لنفسي ولكم وربي كنت اقول يارب لا تحرمنا
يارب ارزقنا وكنت ادعي يارب تكون اخر عملية يارب

واتلقحت ماشاء الله 5

رجعوها كلها

ومرت الايام على العيد ابغى انزل المدينة
ليلة 26 نزلنا المدينة وقتها اختي كمان عرفت انها حامل ماشاء الله
المهم تاني يوم من نزلتي حاسة بمغص
جبت تحليل الحمل
اتوكلت على الله ودخلت الحمام الله يعزكم وربي كنت افتح العلبة وانا ارتجف
سويت التحليل وشف خط غامق وخط فاتح على بالي الفاتح يعني مو حمل لا زم تكون
الخطين غامقة المهم دخلت عند اختي الكبيرة اقلها شوفي يعني مافي حمل وهيا دوبة صاحية من النوم شافت قالت الا ماشاء الله تبارك الله
في حمل
قلتلها امانة قالت شوفي الخطين قمت ابكي ابكي راحت نادت اخواتي وامي
امي ياقلبي عليها شافتني ابكي قالت لالا تقول انها فشلت قالتلها اختي لا حامل ما استوعبت قالت ها قالت حامل
على طول سجدت لله وهي تبكي واخواتي يبكو

ما كنت مصدقة قلت ل اختي نمشي المستشفى قالت طيب
رحت المستشفى سويت التحليل الدكتور قال مبروك حامل قلت لو انت متاكد قال ايوا يا مدام حامل ارجع اقول متاكد

اتصلت على زوجي ماقدرت اصبر الين اشوفه قلت له سويت التحليل قال طيب قلت حامل سكتتتتتتتتتت زوجي يقول كان في السوق صار يدمع ويمشي يقول الناس تشوفني وانا دموعي تنزل
راح السيارة ويقول انتي متاكدة قلت اي في المستشفى انا قال اجيك قلت لا بروح الحرم اسجد شكر رب العالمين قام يقول انتبهي قولي للسواق لا يمشي بسرعة

المهم رحنا الحرم انا واختي وسجدنا لله وانا ابكي واشكر ربي واختي تبكي

جا يوم العيد وكان عيدنا عيدين الحمدلله

تاني يوم العيد رجعت لبيتي وكلمت الدكتور قال لازم تعملي تحليل هرموني هنا خفت رحت حللت قالو النتيجة على الساعه 9 من الظهر وانا خايفه وانتظر متى تصير 9
صارت 9 زوجي اتصل قال الحمدلله النتيجة كويسة قلت كيف يعني قال في حمل اول ما قفل سجدت يارب
لك الحمدلك الشكر يارب مااكرمك

مرت اسبوعين رحنا المراجعة الدكتور عمل سونار وقال مو مبين اي شي هنا زوجي انفجع بس انا كان عندي امل انو في حمل
قال بعمل سونار من تحت لا تخافي
قلت طيب عمل سونار وهوا سااااااكت فجاءه قال كم بيبي تبغى طالعت في زوجي وفي الدكتور قال تبغى واحد ولا اتنين ولا 3 قلت اللي يجي من الله
الحمدلله قال تعالو بعد 3 اسابيع عشان النبض
رجعنا ونشكر ربي اخير اخير اتحقق حلمنا وصرت ادعي للكل رحنا بعد اسبوعين والحمدلله في نبض
وعدت الشهور وصلت لشهر 3 نزلت بيت اختي كنا نتسولف الا شوية احس بشي حااار ينزل حطيت منديل الا اشوف دم
هنا انفجعنا اختي مرة خافت
اتصلت على الدكتور قال روحي مستشفى الفقيه
على طول اتصلت على زوجي قلت بروح المستشفى مع اختي انت الحقنا

رحنا ما وصلنا عند الباب الا زوجي جاي وباين من وجهو خايف مفجوع قلت اشبك خايف اللي اعطانا يحفظ لنا
دائما هذا كان كلامي اللي اعطانا هوا يحفظ لنا
طلعوني فوق قسم الطوارئ كانت الساعة 12 في الليل خف النزيف صارت الساعة 1 ما جات الدكتور ة صارت 2 ماجات اختي قالت
قالت ماصارت راحت كلمتهم قالت اصبري يجي دورك وتسوي سونار
الساعة 3 نزلوني تحت عشان الاشعة ولمن زوجي سال الدكتور قالت له اجهاض
المهم نزلت تحت الدكتور جالس يكشف الا الحمدلله كل شي تمام بس يوم شاف الاجنة قهرني قال بفجعة هما 2 ولا ايه قلت اي قالهم كلهم كويسين قلت الحمدلله
اعطوني مثبتات وابره وطلعت الحمدلله مافي اي شي
ماشية الامور كويسة دخلت الرابع رحت اعمل اشعة ثلاثية قال الدكتور كل شي تمام ماشاءالله شوفي هذي عروسة فرحنا قال وهذا الولد رجع يشوف قال وهذي كمان العروسة هنا عرفت انهم 3 ماشاء الله
يارب ما اكرمك
قلت لزوجي كان احساسي يقول عندي بنتين
من زمان كنت اقول لرزوجي راح نسمي الولد عمر والبنت وتين
الحين عندنا بنت تانية كمان ماشاء الله
نفسي اروح اشتري لهم لبس ممنوعة من الحركة دخلت الخامس اول جمعة من شهر الخامس حسيت بحركة مررة فرحت

وانا في الخامس حلمت ان صارت لي ولادة مبكرة حلم مرة كان يخووف

والله اني صحيت ابكي احسب جد ولدت واحضن بطني واقول لا تسيبوني
وادعي من ربي يارب لا تحرمني منهم
وكل شوي ادعي واستودعهم طبعا من اول حملي وانا مداومة على الاذكار وسورة البقره اموري كلها تمام الحمدلله

كنت احس بحركتهم افرررررررح واشكر ربي وفي الليل لمن ابغى انام ماشاء الله مرة يتحركو كتير كنت اخاصمهم ا قلهم نامو خلو ماما تنام واضحك
كنت اتخيلهم يكبرو قدامي فين ينام وكيف حياتنا معاهم وزوجي كل يوم يقراء على بطني ويستودعهم

فرحة ما توصف

دخلت السادس اموري كانت كويسة والمشيمة ارتفعت قلت لزوجي بس مرة اروح اقضي لعيالي امنيتي هذي رحنا ما ني عارفة ايش اشتري من فرحتي فيهم اخذ لبس واحد للبنت واخذت فنايل ما عرفت اشتري
ورجعنا البيت وبعد اسبوع خرجنا نتمشى شوية كانت يوم الجمعة نزلت تحت الا قدامي زوج جارتي يطالع في بطني اعوذ بالله نظراتو قهرتني
قلت لزوجي شوف كيف يطالع اول ما زوجي شافو قام الاخ يقول تبغاني اوصلكم وهوا عارف ان زوجي عنده سياره
المهم مشيت للسيارة الا اطالع ورا الاخ واقف يطالع
زوجي قال امشي ركبت السيارة قلت شفت كيف يطالع قهرني قال ما عليك ممكن ماهو قاصد
المهم لفينا بسيارة ورجعت للبيت
جارتي دقت الباب قالت ماشاء الله الجيران كلهم عرفو انك حامل قلت عادي بس انتي مين قالك قالت جارتي واشرت على بيتها قالت زوجها شكلو شافكم
وراح قال لزوجتو ان بطن فلانه هالكبر واشرت بيدها انو مرة كبيرة

اتضايقت من حركتو وحكيت زوجي قال عادي يمكن يحكي لزوجتو
هذي الفترة كننت احس بحركتهم مرة كثير ة ماشاء الله
جا يوم الاربعاء وكنت جالسة مع اختي وصحبتي ومافيا اي شي الا احس شي نزل
قلت يا بنات شكلو دم قالو كثير شفتهم خافو قلت لالا
قمت عشان ادخل الحمام الله يعزكم الا الارض كلها دم نزلت الكلوت ارش مويه الا الدم يزيد الحمام كله دم ناديت اختي شافت قالت يالله
وصحبتي جابت لي ملابس
اختي اتصلت على زوجي قالت الحق دم ماهو طبيعي
واتصلت على الدكتور قالت مرة معاها نزيف قال على طول ودوها على الجامعة نزلنا وانا امشي انزف دم والمصعد دم والدرج دم ولد اختي وقف التكسي وحنا نازلين
شفت زوجي شاف الدم قال لا حول ولا قوة الا بالله
على طول مسكني ووداني ع السيارة يوم وصلت المستشفى كنت غرقانة بدم
حتى الدكاترة حسبو انو صار لي حادث
جات الدكتورة تكشف ما عرفت قالت غيرو ملابسها جابو لي روبهم والله العظيم الدم كان واصل الين الرقبة لاني لمن جلست في السارة رجولي كانت مقفلة فصار الدم ما ينزل يطلع على فوق
المهم غيرو ملابسي وكشفت الدكتور قالت الرحم مقفل
قلتلها مسوية ربط قالت ايوا بس الرحم مقفل دخلوني في كشك الولادة بداء الدم يوقف الين الصبح وقف الحمدلله
نزلوني عشان يشوفو الاجنة شافت قالت الاجنة كويسين بيتحركو قلتلها والدم من فين قالت والله ماني عارفة كل هذا الدم من فين نزل

بس وضعك كويس مافي خوف ابد طلعوني فوق خرجوني من كشك الولاد لغرفة التانية جات اختي وجا زوجي جالسة احكيلهم انو كل شي تمام ما عرفو سبب الدم
قلت لزوجي روح جيب لي شيخ يقراء عليا خرج زوجي حسيت فيا نوم قلت على جهة اليمين ونمت شوية الا احس ظهري
مرة يوجعني قلت ل اختي قالت ظهرك ولا طلق قلت ما اعرف الطلق
شوية وبداء يزيد ويزيد الا ختي قالت هذا طلق وقتها جلست ادعي واقول يارب رحمتك يارب ارحمني وجلست اتشهد مرة كثير حسيت اني راح اموت
رجعوني في كشك الولادة
اتصل زوجي قال معايا الشيخ اختي قالتلو خلاص اخذوها ع الكشك لا تجيبو
الشيخ قال لزوجي باين انو فيها عين ما تبغاني اقراء عليها
وانا في الكشك خف الطلق
اعطوني ابره واعطوني ابره حقت الرئه
جات الدكتور تكشف قالت يا ماما الجنين نزل عند الرحم لو ما افك الربط راح يتمزق الرحم
قلتلها طيب افتحي اتوكلي على الله
فكت الربط الساعة 10 كانت في الليل
الساعة 12 جاء زوجي استغربت قلت كيف دخلت قال اترجيت فيهم عشان اشوفك ما ادري ليش فيا خوف قلتلو انا كويسة الحمدلله ومافي طلق
وعلى طول خرج عشان ممنوع في كشك الولادة احد يدخل

جات الساعة 2 رجع الطلق واحس شي ينزل رجع خف قمت ادعي واقول انا احبكم بس ربي يحبكم اكثر مني

رجعت احس شي بينزل صرخت سستر جات قلتلها في شي نزل فكت الشرشف وصرخت بيبي بيبي وجات ممرضة تانية وشالو البنت سمعتها تبكي صوتها مرة كان خفيف
قالت اذا وزنها 500 بنحطها في الحضانة كان وزنها 450 واتوفت اللهم اجرني في مصيبتي واخلف لي خيرا منها

خف الطلق ولا كانو كان في المشيمة لسه كان جوا
قالو الحين لا تدفي عشان ما نبغى البيبي اللي جوا ينزل قلت طيب
جات الساعة 4 الا احس شي بينزل ادف غصب عني وهم يقولو لا تدفي لا تدفي اقلهم مو انا هما يدفو
طلع الولد وبعدو على طول البنت
ما اعرف كانو عايشن ولا لا
المهم جلست ادعي مدري ليش مرة سكت سكوت غريب
دخلو عندي ممكن 10 ممرضات ما ادري ايش يشوفو شافوني وخرجو
وفي ممرضة كانت تبكي شفتها قلتلها ليش تبكي هما حق ربنا وهيا تطالع فيا انا ولا دمعة ما اكذب عليكم الحين صرت ادمع لمن اتذكرهم واقول ياليت شلتهم
بس وقتها ولا دمعة
ما كلمتهم الساعة 5 اتصلت على زوجي وقلتلو انا ولدت تعال وجيب اختي قال طيب
وقفلت
جات الممرضة قالت ماتو اطفالك طالعت فيها قلت كلهم قالت ايوا سكت
قالت تبغى تشوفيهم قلت لا رجعت قلت الا ابغى اشوفهم
جابوهم عندي طالعت فيهم ياقلبي زي الملاك كانو نايمين شفتهم نظرة وقلت خذوهم
جا زوجي قال مبروك الحمد ع السلامة قلت ليش تبارك لي اتوفو قال لا هم في الحضانة قلت لا اتوفو انا شفتهم سكت شكلو ما كان عارف
رجع راح يتاكد تقول اختي شافهم وقال الحمدلله وعيونو كلها دموع لمسهم

ااخذهم للدفن
يقول هناك الشيخ وهوا يغسلهم قال شوف ولدك زوجي يقول الولد كان رافع اصباعه كانه يتشهد لا اله الا الله
والحمدلله على كل حال يارب عوضني يارب
وتاني يوم طلعت من المستشفى وفي الليل لمن جيت انام اتذكر رفستهم حركتهم واقول الحمدلله
ومرة ما يجيني نوم اقول في نفسي كنت من التعب اقلهم نامو الحين فين راح النوم
الحمدلله على كل حال
نزلت المدينة وانا نفاس بس من غير عيالي
جات ناس تعزيني بس ما نسى كلام سلفتي
قالت ربي رحمك واخذهم عشان هوا عارف انك ما تقدري تربي 3

سميناهم وتين وريتال وعمر يارب يكونو شفاء لنا