عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم و رحمة الله و بركاته
بكتب لكم قصتي عشان العظه و عشان كل وحده ترضى بلي كتبه الله لها و تعرف انه كل شي مقدر و مكتوب من قبل ما تنولد
قبل سنه و شوي أبوي توفى الله يرحمه و حزنا حزن فظيع و نفسياتنا كانت عدم و أول أسبوع بعد وفاته قالتلي أمي تكفين و قفي منع الحمل الي تاخذيه عشان تحملي و ننشغل فيك و انشاء الله تجيبين ولد و تسميه على اسم ابوك
و انا عندي بنتين و لمن قلت لزوجي قال خلاص أول ولد لنا بإسم أبوك و شجعني إني أحمل و فعلا حملت و كنت أدعي يارب ارزقني ولد صالح و كان زوجي يقولي ادعي ان الله يرزقنا الذريه الصالحه
ولمن سويت تصوير في الثامن قالتلي الدكتوره بنت صراحه انصدمت لاني كنت متوقعه ولد بنسبه كبيره و فكرت وقلت خيره انشاء الله يمكن لو كان ولد كان طلع عاق و البنات احن على الام و ابر فيها
ولمن جاني الطلق و رحت المستشفى و ولدت بنتي و جا الدكتور عشان يكشف عليها قالي البنت ما فيها فتحة إخراج مضطرين ننقلها حضانة الاطفال الين يشوفها دكتور الجراحه و نشوف ايش يصير و من يوم ما قلي الدكتور الين نقلوني غرفتي و أنا أبكي و سألتني أمي ليش تبكي و فين البنت و قلتلها و صارت تصبرني و خرجت من المستشفى و بنتي بقيت فيها و ثاني يوم من ولادتها أتصلوا على زوجي و قالوله تعال وقع على العمليه و رحت مع زوجي والله لمن شفتها جلست أبكي تخيلوا يدينها و رجولهاكلها ابر و فمها خارج منه انبوب موصل بانفها لمن سألنا الدكتور قال عشان العمليه و سولها العمليه و فتحولها في جنبها اليمين فتحه تخرج منها و بقيت في حضانة الاطفال اسبوع كل يوم أروح أشوفها و أبكي مره رحت المستشفى لقيتهم حالقين شعرها و حاطين المغذي في راسها لانهم ما لقوا عرق في جسمها
بعد أسبوع طلعوها غرفه عاديه و نادوني أبات معاها و علموني شلون انظف مكان الفتحه و كنت كل ما أنظفها هي تبكي و أنا أبكي ولمن مرني الفريق الي سوولها العمليه سألتهم لمتى بتستمر كذا و فاجأتني الاستشاريه لمن قالت راح تجلس تبرز من الفتحه هذي الين يصير عمرها أربع شهور و يكون وزنهايساعد على عمليه ثانيه و بعد كذا راح نعمل عمليه نفتحلها فتحه من تحت بس راح تستمر تبرز من الفتحه الجانبيه و بعد كم شهر ما ندري متى راح نقفل الفتحه الجانبيه و راح تبرز طبيعي و لازم عنايه فائقه للفتحه عشان ما تلتهب لان هذا الشئ يأخر العمليات و خرجنا من المستشفي بعد ثلاث ايام
و الحين عمر بنتي اربع شهور و الى الان تبرز من جنبها حتى اني ما صرت البسها ملابس ولا حفاظ لانها تعدمهم و برازها فيه انزيمات كبد عشان كذا تبرز كل ربع ساعة تقريبا عشان كذا أحط تحتها مشمع و ما ألبسها إلا وقت النوم بس
عندها يوم الاحد القادم موعد مع دكتور الجراحه عشان يكشف عليها و يقرر يعمل العمليه الثانيه ولا لسى بدري تكفون أدعولها أن ربي يعجل بعمليتها إذا كانت لها خير فيها
